د جمعیت اصلاح د کامې دارالعلوم څخه په لسګونو طالب علمان فارغ شول

راپور: اصلاح رسنیز ګروپ – کامه
د کامې اسلامي دارالعلوم چې د جمعیت اصلاح د کامې څانګې تر سرپرستۍ لاندې پرمخ ځي د قرآن کریم د ناظره او حافظانو ته د ختم قرآن کریم او دستار فضیلت په مناسبت غونډه جوړه شوه.
غونډه د مولوي صاحب قدرت الله په ویاندویۍ سره پیل او د پیل لپاره یې قاري صیب محمد شعیب ته بلنه ورکړه چې د قرآن په تلاوت سره غونډه پیل کړي.
غونډې ته د پیل وینا د دارالعلوم مدرس مولوي صاحب عبدالرحیم عابد وکړه. عابد صاحب د مدارسو او دیني مراکزو په اهمیت رڼا واچوله او خلکو نه یې غوښتنه وکړه چې مونږ باید د الله تعالی شکر ادا کړو چې داسې دیني مراکز او مدارس لرو.
د غونډې بل ویناوال د پښتو ژبې لیکوال، شاعر او دیني عالم قاضي فضل غني کاموال وو چې په افغانستان کې یې په مدارسو او دارالعلومونو په حالت رڼا واچوله او یې ویل چې پخوا په افغانستان کې د ګوتو په شمیر مدارس وو خو اوس لله الحمد، یواځې په کامه کې په هر کلي او جامع جومات کې مدارس او د قرآن کریم درسونه روان دي. کاموال زیاته کړه، چې قرآن کریم د ژوند ټولو اړخونو ته یو شامل او جامع کتاب دی، د قرآن کریم د زده کړې سره باید تربیه او اخلاق هم ولرو، کچیرته تربیه نه وي نو دا زده کړې هیڅ ګټه نلري. غونډې ته د کامې ولسوالۍ مختلفو علماؤ لکه مولوي محمود جان، مولوي غلام حضرت او مولوي فضل الله هم ویناوې وکړې.
د غونډې بل ویناوال د کامې درالعلوم د لومړۍ درجې طالب العلم قاري صاحب سلیمان وو چې د مسلمانانو د وحدت او یووالي په اړه یې خپله وینا په عربي ژبه ګډونوالو ته واوروله.
غونډې ته د هیواد پیاوړي عالم، د سلام پوهنتون استاذ او د جمعیت اصلاح افغانستان د ختیز زون مسؤل مولوي محمد نعیم جلیلي هم وینا وکړه. جلیلي صاحب د ولس له مشرانو اوعلمأ کرامو څخه مننه وکړه چې په ډیر شوق سره په دیني مجالسو کې برخه اخلي. د جلیلي صاحب وینا په درې عمده اړخونو څرخیده ۱) د قرآن مقاصد ۲) دیني مدارسو اهمیت او ۳) فارغو طالب علمانو ته نصایح. جلیلي صاحب په خپلو خبرو کې وویل چې دیني مدارس د دین سنګرونه دي نو ځکه خو د رسول الله صلی الله علیه وسلم د وفات څخه وروسته صحابه وو دغه مراکز جوړ کړل او د نموني په ډول یې د عبدالله ابن عباس، ابو موسی اشعري او عبدالله ابن مسعود رضی الله عنهم نومونه یاد کړل. جلیلي صاحب د خپلې وینا په یوه بله څنډه کې د ولس څخه غوښتنه وکړه چې د مدارسو معنوي او مادي ملاتړ او همکارۍ ته دوام ورکړي.
د غونډې په پاې کې د کامې اسلامي دارالعلوم لنډه پیژندنه او تاریخچه د مولوي صاحب فضل الربي وحدت له لورې وړاندې شوه. مولوي صاحب زیاته کړه چې د کامې دارالعلوم په ۱۳۸۸ کال کې تأسیس شوې چې د خپلو ولس په مالي او معنوي ملاتړ یې د حفظ او ناظرې په برخه کې د هیواد په سلګونو بچې روزلې او دا پروسه لا دوام لري.
د غونډې په پاې کې د حفظ او ناظرې فارغو طالب علمانو ته د فضیلت پګړۍ وتړل شوې. یاده دې وي چې تیر کال هم د نوموړي دارالعلوم څخه په لسګونو طالب علمان فارغ شوې وه.