دجمعیت اصلاح افغانستان درسنیو (اصلاح رسنیز ګروپ) کلنی سیمینار په کابل کې تر سره شو

اصلاح رسنیز ګروپ، نعمت الله عزیزي
د جمعیت اصلاح افغانستان درسنیو کلنی سیمینار دلړم په ۲۲ او۲۳ مه د سیدجمال الدین په تالار کې (د رسنیز نوښت په لور یا بسوی ابتکار رسانه ی) تر عنوان لاندې دپنجشنبې په دریو بجو پیل او د جمعې ورځې تر غرمې پورې یې دوام وکړ.

دغه دوه ورځنی سیمینارله بېلابېلو ولایتونود جمعیت اصلاح درسنیو کارکونکو او مسؤولینو پکې ګډون درلود، پداسې حال کې ترسره شو چې د تالاردېوالونه په بېلابېلو شعارونو او درسنیو په برخه کې دعالمانو په ویناوو سره پوښل شوي وو.

سیمینارد کابل د اصلاح غږ راډیو د پخواني مدیر مولوي شمس الحق فروتن په آواز د څو مبارکو قرآني آیتونو په تلاوت پیل شو چې ورپسې د جمعیت اصلاح د نشراتو او فرهنګي څانګې رئیس او داصلاح رسنیز ګروپ عمومي مشر استاذعبدالظاهرحمیدي خپله پرانیستونکي وینا وکړه.

استاذ حمیدي پداسې حال کې چې دسیمینار ټولو ګډونوالو ته ښه راغلاست وویل، تر څنګ یي د دوه ورځني سیمینار څرنګوالی او د بحثونو او درسونو څرنګوالی حاضرینو ته تشریح کړ.

ورپسې د ( کابل، ننګرهار، کندز، بغلان، بلخ ) اصلاح غږ راډیو ګانو؛ او د ملي اصلاح اونیزې(قافلې، ژوند، معرفت، بینې) مجلو، اصلاح پروډکشن اود هرات اصلاح تلویزون مسؤولینو یا استازو د خپلو خپلو رسنیو د روان وضعیت په اړه ګډونوالو ته معلومات ورکړل، همدارنګه هر مسؤول د خپل کاري بهیر ځیني ستونزې او ګواښونه هم په ډاګه کړل او له خپله انده یې ورته د حل لپاره یي خپل وړاندیزونه څرګند کړل.

لدې وروسته د وړاندیزونو په برخه کې بېلابېلو ګډونوالو خپل وړاندیزونه شریک کړل چې تر ډېره یي تاکید پدې و چې باید د اصلاح انلاین او راډیو ګانو کې دخبرونو برخه جوړه او له نورو رسنیو سره نژدې اړیکې رامنځ ته شي.

د سیمینار دوهمه ورځ، دجمعې په ورځ سهار وختي، د قاري عرفان الله همدرد په غږ دقرآنکریم دڅو آیتونو په تلاوت سره پیل شو چې ورپسې نامتودیني عالم او د جمعیت اصلاح دټولنیزو مرستوڅانګې(الاحسان) مسئوول شیخ القرآن عبدالسلام عابد د قرآن په رڼا کې درسنیو په اهمیت باندې درس وړاندې کړ؛ او په اوسني وخت کې یې د اسلامي رسنیو کار تر ټولو غوره جهاد وګڼلو.

ورپسې دجمعیت اصلاح د عامه فعالیتونو یا دعوت ارشاد د څانګې مشر استاد عبدالفتاح جواد، د “ټولنیزې رسنۍ، اهمیت او ضرورت یې”، تر سرلیک لاندي یو درس وړاندې کړ او ټینګار یي درلود چې باید دټولنیزو رسنیو څخه په سمه توګه کار واخیستل شي.
استاد جواد د ټولنیزو رسنیو له ډلې یوه مهمه رسنۍ فیس بوک وګڼله او د فیسبوک منفي ټکو ته یې په اشارې سره وویل، چې که دغه شبکه په سمه توګه ونکارول شي ګڼې ستونزې زیږولي شي.

ورپسې دعلومو اکاډمۍ دژونالیزم د څانګې علمي غړي څیړنیار محمد داود ناظم د معیاري رسنیو دځانګړتیاوو په هکله خبرې وکړي او د خپلو خبرو په ترڅ کې یې وویل، چې لویدیز وال غواړي، د رسنیو له ځینو دغه معیارونو څخه د اسلام او مسلمانانو پر خلاف کار واخلي.
ورپسې استاد نصیر احمد نویدي دجمعیت اصلاح دمرکزې شورا مشر ټولو ګډونوالو ته دښه راغلاست تر څنګ ( خپلو رسنیو ته په ټولنه کې څنګه ځای پیدا کړو ) تر عنوان لاندې هر اړخیزه وینا واوروله.

استاد نویدي د خپلو خبرو په دوام وویل: ددریو لاملونو په نظر کې نیولو سره کولاي شو خپلو رسنیو ته په ټولنه کې ځای پیدا کړو؛ لومړی دا چې ښه فکر او نظر ولرو، دوهم دا چې له مناسبو لارو چارو څخه دخپل پیغام رسولو لپاره کوښښ وکړو، درېیم داچې دخپل پیغام درسولو لپاره مناسب وسایل ولرو.

استاد نویدي د وړاندیزونو په برخه کې وویل، چې باید داصلاح پیغام د بروشرونو خپروای له سره شروع شي، باید په راډیو ګانو کې پیاوړې ویندویان استخدام شي، په اصلاح آن لاین ویب سایټ کې دخبرونو برخه فعاله شي.

د جمعیت اصلاح د مرکزي شورا مشر دټولو څخه غوښتنه وکړه چې له فیسبوک څخه دی د رسنیزو اخلاقو او د خپل رسالت د اهدافو په نظر کې نیولو سره ګټه پورته کړل شي.

ور پسې استاذ عبدالخالق احسان چې دهرات داصلاح تلویزیون په استازیتوب يي په دغه غونډه کې ګډون کړي و، درسنیزو اخلاقو تر عنوان لاندې لنډ درس وړاندې کړ.

د جمعیت اصلاح رئیس عبدالصبور فخري دغونډې په وروستیو شېبوکې داصلاح رسنیز ګروپ رسنۍ په هر اړخیز ډول سره وارزولی چې په وینا يي دستونزو سره سره ټاکل شو موخو ته په رسېدو کې تر اتیا سلنې پورې بریالي دي.

دکتورفخري داصلاح رسنیو استقلال ته اشاره درلوده او زیاته کړه، چې داصلاح رسنيو دهېچا څخه پلان نه دی اخیستی او له هېڅ بهرنۍ موسسې څخه یې پلان او بودجه نده ترلاسه کړې، یوازې د خپلو خلکو په مرسته یې ټولنې ته دقیق معلومات وړاندې کړي دي.
د جمعیت اصلاح رئیس د اصلاح رسنیز ګروپ کاري ستونزوته هم اشاره درلوده او ویې ویل چې مالي ننګونې اود تخصصي کدرونو کمښت دوه مهمې ننګونې وې، چې اصلاح رسنیز ګروپ تل ورسره لاس اوګرېوان وو.

استاد فخري د اصلاح رسنیزګروپ مسئوولینو ته وړاندیز وکړ چې باید دځوانانو او نشراتو ادارې تر منځ همغږي پیدا کړي، دوامداره ستراتیژي او درسنیو د لرلید پلانونه جوړ شي، دنورو رسنیو سره اړیکې پراخې شي، درسنیو لپاره دایمي تمویلي منابع پیدا کړل شي.

د دکتور فخري تر وینا وروسته د ډالیو دورکړي مراسم پیل شول چې د اصلاح رسنیز ګروپ اړوند بېلابېلو ادارو او کارکونکو ته د ادارې له اړخه برابرې کړې ډالۍ وړاندې کړای شوې.
د سیمینارپه پای کې یوځل بیا د اصلاح رسنیز ګروپ عمومي مسؤول استاذ عبدالظاهر حمیدي، په داسې حال کې چې د دوه ورځني سیمینار د بریالي پای ته رسېدو خوشحالۍ څرک یي په څېره کې له ورایه څرګنده و، د جمعیت اصلاح له قیادت، د نشراتي کمیسیون له غړو او نورو ګډونوالو او د سیمینارد تنظیمونکو څخه یې مننه وکړه.

استاذ حمیدي زیاته کړه، چې په غونډه کې د ګډونوالو له اړخه د کارونو د پرمختګ او تنظیم په موخه راغلي وړاندیزونه به په نژدې راتلونکې کې د جمعیت اصلاح رسنیو اونشراتو کمیسیون په غونډه کې وڅېړل شي اود عملي کېدو په اړه به یې تصمیم ونیول شي. د سیمینار پای د قافلې د تربیتي او فکري مجلې د مسؤول مدیر او نامتو عالم مولوي امین الله ازره وال په وینا سره وشو، چې په دعا کې یې ټولو کارکونکو ته بریالیتوب وغوښت او د اسلامي امت او افغانستان خلکو ته یې د سولې او نېکمرغۍ غوښتنه وکړه.پای