مکرویانو کې شمالي ولایتونو ته مرستې راټولې شوې

شمال کې چې کله تېره اونۍ سیلابونو او ځمکې ښوېدنې ګڼو ولایتونو کې په سلګونو وطنوال ووژل او په زرګونو نور یې بې کوره کړه، جمعیت اصلاح د مرستو راټولولو یو ملي کمپاین په ترڅ کې له بېلابېلو ولایتونو نغدې او جنسي مرستې راټولې کړې، چې ځینې یې لا د مخه ولایتونو ته رسېدلې او ځینې نورې به یې ډېر ژر ولایتونو ته ورسېږي.
کابل کې د جمعیت اصلاح افغانستان د مکرویانو ساحوي دفتر د چهار شنبې ورځې له ماسپښینه د دریمو مکرویانو مارکیټ سیمه کې د مرستو راټولولو درې ورځنی کمپ پیل کړ. په لومړۍ ورځ، چې د مکرویانو اوسېدونکو د مرستو راټولولو غږ واورید د خیر او اجر ګټلو په سیالۍ کې یې یو له بله مخکې والی کوه. د مازیګر او ماښام لمانځه تر منځ شاوخوا لس زره افغانۍ راټولې شوې.

راتلونکې ورځ سهار د مکرویانو ساحوي دفتر غړو د سیمې د وګړو په همکارۍ کمپ د دویمې ورځې لپاره پرانیست. د ورځې تر پایه خورا ډېرو نارینه، ښځینه، ځوانانو او ماشومانو په خلاص لاس او پرانیستي زړه مرستې وکړې. پدې ورځ د مرستو شمېره نږدې ۱۰۰،۰۰۰ افغانیو ته ورسیده.

د جمعې په ورځ د مکرویانو ساحوي دفتر ټاکل شوي هیئت د ښاغلي مفتي شمس الرحمن فروتن تر مشرۍ لاندې د سیمې د مسجدونو له خطیبانو سره وکتل او له هغوی یې وغوښتل، چې د خطبې په ترڅ کې خلک له کمپاین سره د همکاري لپاره راوبلي.
پدې ورځ پر کمپ برسیره په بېلابېلو مسجدونو کې مرستې راټولې شوې او د ورځې په پای کې د مرستو شمېره نږدې ۲۰۰،۰۰۰ افغانیو نغدو پیسو او یو موټر جنسي موادو ته ورسېده.

دا مې د مړ ورور پیسې دي
ماسپښین مهال د کمپ خیمه کې ناست وم، چې یو ځوان له موټره کوز شو او په خیمه راننوت. له مینه ناک روغبړ وروسته یې جیب ته لاس یوړ او د ډالرو سلګون یې د مرستو صندوق ته کوز کړ. لکه په زړه کې یې، چې څه ورګرځیدلي وي لاس یې له صندوقه بیرته راپورته کړ او سلګون یې راته ونیو ویې ویل: دا مې د ورور پیسې دي، چې اوس مړ دی. بیا یې له جیبه نورې پیسې، چې د خپل کور یې وې، صندوق ته واچولې.

په تاسې مې باور دی
د پاخه عمر میرمن، چې موټی یې بند نیولی وه، خیمې ته راوړاندې شوه، په ټیټ غږ یې وویل: دا مرستې به په سم ډول ورسوئ که نه؟! په سړه سینه مې ورته د جمعیت اصلاح د مرستو راټولولو او اغیزمنو ته د رسولو پروسه تشریح کړه. میرمن، چې قانع شوه نو یې ویل په تاسې مې اعتبار دی، پدې مې اعتبار دی، هغه لوډ سپیکر ته یې اشاره وکړه چې ترانې پکې غږیدې (منظور یې اصلاح غږ راډیو وه). بیا یې موټی د صندوق په لور وغزاوه او ویې ویل: بچیه کمې دې خو په ډیرو یې ومنئ. نوموړې جمعیت اصلاح ته د بریا دعا وکړه او په خوشالۍ خوشالۍ رخصت شوه.

دا دوه روپۍ ورکوم
خیمې ته ماشومان، ځوانان، لویان ټول راتله. چا سره به سودا وه، هسې پوښتنه به یې وکړه، چا به پدې اړه مشوره راکوله، چې د مرستو په ویش کې د درغلۍ هر ډول امکان مخه ونیسو.
ځینې نورو به که څه هم خپله مرسته نکوله خو پدې اړه یې ډاډ تر لاسه کول غوښتل، چې دا مرستې به په سمه شمالي ولایتونو ته ورسېږي که مونږ به ځانونو ته پرې شیان اخلو.
د جمعې ورځ ماسپښین سپیلنو والا یو ماشوم څو ځل د خیمې مخې ته د ایښي میز او صندوق تر څنګ تېر شو. هر ځل به یې صندوق کې پرتو نوټونو ته وکتل او وړاندې به لاړ. وروستی ځل چې د میز مخې ته تېرېده موټی یې د صندوق په لور وغزاوه او په ټیټ غږ یې کړه، چې زه مې دا دوه روپۍ مرسته کوم.

طالبان راغلي؟
د مکرویانو مارکیټ کې ټوله ورځ ښځې او نر ګرځي راګرځي. د خیمې مخه هېڅکله د خلکو له تګ راتګه نه خالي کیده. یوه شیبه له خیمې راووتم، پدې تکل چې ګواکې په تن زیړ واسکټ، چې په شا یې د جمعیت اصلاح نوم لیکلی، د خلکو پام ځان ته راواړوي. پدې کې یوه ډله نجونې خیمې ته رانږدې شوې او د ترانو په اورېدو یې په پوښتونکې لهجه وویل: طالبان آمده؟

دا بند کړئ
د خیمې لوډ سپیکر له سهاره تر ماښامه د مرستې د کمپاین لپاره جوړ شوي اعلانونه او ترانې غږولې. یوه میرمن، چې له لرې یې د ترانې غږ اوریدلی وه، ګړندۍ د خیمې لور ته راغله او له څه خبرې یا پوښتنې پرته یې د لوډ سپیکر لینونه بې دریغه سره کش کړل او د لوډ سپیکر غږ یې خپ کړ، ورسره یې په قهریدلې لهجه زیاته کړه: ای چه است؟

ټول جیب یې خالي کړ

یو ځوان، چې ښکارېده له دفتره کور ته روان و، تیز له خیمې تېر شو. د سترګو په کونجو یې د صندوق په مخ لیکلې لوحه (با هموطنان تان در بدخشان کمک نمایید!) لوستې وه. د خیمې له کونجه بېرته راوګرځېد، او په خیمه راننوت. د پتلون شا ته جیب ته یې لاس کړ، او له فکر پرته یې د جیب ټولې پیسې صندوق ته وغورځولې. له شا مې، چې پسې کتل د اطمینان لپاره یې د جیب کڅوړه راوویسته او ځان یې ډاډه کړ، چې خپلې ټولې پیسې یې مرسته کې ورکړي.

له مکرویانو مننه
د مکرویانو ساحوي دفتر د مکرویانو له ټولو اوسیدونکو مننه کوي، چې د مصیبت ځپلو هېوادوالو مرستې ته یې غاړه کېښوده او په پوره احساس یې مرستې وکړې. مونږ د دریمو مکرویانو د مسجد شورا، امام او خطیب، د مارکیټ دوکاندارانو او د سیمې له اوسیدونکو مننه کوو، چې د کمپ په چلولو او د مرستو په جلبولو کې یې له مونږ سره پوره همکاري وکړه.