په جلال آباد کې د قرآن پوهنې د کلنۍ اجتماع څلورمه ورځ هم پای ته ورسېده

اصلاح رسنيز ګروپ جلال آباد / مبارز
د يادې اجتماع څلورمه ورځ د چهارشنبې په ورڅ د روان هجري کال د حوت د مياشتې په ۷ نېټه د ماسپښين په دوه بجو او دېرشو دقيقو د مولوي صاحب عتيق الله ثاقب په تلاوت سره پيل شوه.

د ننګرهار پوهنتون د شرعياتو پوهنځي استاد دکتور نجيب الله صالح يادې اجتماع ته د حديثو درس وړاندې کړ دکتور صيب پخپل درس کې وويل: حضرت ابوهريرة رضی الله عنه روايت کوي چې رسول الله صل الله عليه وسلم وفرمايل: څوک چې د يوه بې وزله مسلمان سره مرسته وکړي الله تعالی به د هغه مرسته وکړي، يو مسلمان بايد د بل مسلمان سره مرسته وکړي د هغه عيبونه راونسپړي په هغه پرده واچوي او د يو مسلمان د لاس او خولې نه بايد بل مسلمان په امن وي.

په افغانستان کې د مجمع علمي علما افغانستان مشر شيخ القرآن مولوي صيب عبدالصبور يادې اجتماع ته د څلورمې ورځې درس د اخرت فکر تر عنوان لاندی وړاندې کړ، مولوي صيب په خپلو خبرو کې وفرمايل : انسانان دې نړۍ ته د يو هدف او مقصد لپاره راغلی دی او هغه هم د الله تعالی عبادت دی. دا نړۍ زمونږ لپاره د امتحان ډګر دی مونږ بايد په دې نړۍ کې د يو مسافر په توګه ژوند وکړو او دا نړۍ د اخرت لپاره مزرعه وګرځوو زمونږ اصلي هدف د الله په ځمکه د الله د نظام حاکمول دي او بايد دې دنيا کې د دې لپاره کار وکړو.

د يادونې وړ ده چې په څلورمه ورځ هم په زرګونو وروڼو او خويندو په يادې اجتماع کی برخه اخستې وه، د دې ترڅنګ د يادې اجتماع په ميدان کې د هېوادني توکو نندارتون هم په لاره اچول شوی ؤ.
د يادې اجتماع څلورمه ورځ هم د مازيګر په څلورو بجو د مولوی صيب عبدالصبور په دعايه سره پای ته ورسېده