په کابل ښار کې د الحیات روغتون د یولړ مراسمو په ترڅ کې پرانیستل شو

اصلاح رسنیزګروپ، عبدالرزاق حبیبي

د افغانستان د اسلامي طبي ټولنې په ابتکار :
په کابل ښار کې د الحیات روغتون د یولړ مراسمو په ترڅ کې پرانیستل شو

د افغانستان اسلامي طبي ټولنې (ايما) لخوا د يوه تن افغان پانګوال په مرسته د کابل په کمپنۍ سیمه کې د” الحيات” په نوم روغتون د روان کال د تلې د میاشتې په څلورمه نېټه د يو لړ مراسمو په ترڅ کې پرا نیستل شو.

د افغانستان اسلامي طبي ټولنه د جمعيت اصلاح اړوند د ډاکټرانو یوه صنفي ټولنه ده، چې د تېرو څو کالونو راهيسې په هېواد کې د ډاکترانو د راټولونې، خوارو او بې وزله وګړو ته د روغتیایي خدمتونو دوړاندې کولو او په ډاکترانو کې د طبي اخلاقو د لوړونې په اړه فعالیت کوي.

د الحیات روغتون د پرانیستنې غونډه د ډاکټر محمد امين محمودي په تلاوت سره پيل شوه چې ورپسې د ايما ټولنې دوره یي مشر او د اعصابو نامتو جراح ډاکټر احمد عبيد مجددي د غونډې ګډونوالو ته د ښه راغلاست تر څنګ د ايما په فعاليتونو رڼا واچوله.

ډاکتر مجددي په خپلو خبروکې وویل چې ايما په لنډ وخت کې په بېلابېلو برخو کې ښې لاس ته راوړنې درلودلې دي او په دې هڅه کې ده، چې د هېوادوالو په چوپړ کې اوسي، چې د همدې موخې لپاره یې د يوه افغان پانګوال په مرسته د با کيفيته روغتیایي خدمتونو وړاندې کولو لپاره خپله لومړۍ شفاخانه نن پرانيزي.

هغه په عاجلو حالاتو کې د هېوادوالو لپاره روغتيايي وړيا کمپونه، دډاکترانو د طبي اخلاقي معیارونو د لوړ والي لپاره هغوی روزنه او له همدا ډول د ډاکټرانو د ظرفيت د لوړولو لپاره د مختلفو سيمينارونو جوړونه د ايما فعاليتونو په توګه ياد کړل.

غونډې ته د خصوصي روغتونونو د انجمن مرستیالې ډاکټر “عنقا امين” د خپلې وينا په ترڅ کې وويل، چې د افغانستان له اسلامي طبي ټولنې څخه مننه کوي چې د هېوادوالو لپاره يې دغوره خدماتو د وړاندې کولو په برخه کې يو اقدام ترسره کړ او لکه څنګه، چې د شفاخانې له شعار څخه ښکاري دوی هيله لري، چې شفاخانه به هم همدا ډول خدمات وړاندې کړي.

همدارنگه د ايم اس ایچ د موسسې يو تن چارواکي ډاکټر مبارک شاه غونډې ته د خپلې وينا په ترڅ کې وويل، چې ايما د خپلو ټولو ټيمونو په مرسته د روغتون د جوړښت له لومړي سره خپلې هڅې کړي دي او دا دی نن مونږ او تاسو په ټولو معيارونو د پوره يوه روغتون شاهدان يو او زه هيله لرم، چې ان شاء الله دا لړۍ به نورو ولايتونو ته هم وغځېږي.

ورپسې د پغمان يو تن قومي مشر له جمعيت اصلاح څخه مننه وکړه، چې هم په روحي او هم په صحي لحاظ د خلکو مرسته کوي.

نوموړي زياته کړه، جمعيت اصلاح د اصلاح غږ راډيو په مرسته د خپلو هېوادوالو روحي پالنه او د الحيات روغتون په مرسته يې روغتيايي پالنه کوي.

د نوموړي ترڅنګ د سيمي د خلکو په استازي توب تورګل مياخيل هم د الحيات روغتون له ډاکټرانو او د هغوی له خدمت مننه وکړه، چې وخت په وخت يې د هغوی د مریضانو لپاره خپلې هڅې کړي دي.

د غونډې وروستی ويناوال د جمعيت اصلاح د مرکزي شورا رییس استاد نصير احمد نويدي و چې د ايما هڅې يې وستايلي او د اسلام او روغتيايي خدماتو په اړه يې تفصيلي وينا وکړه.

استاد نويدي له ټولو ډاکټرانو او په روغتيايي چارو پورې اړوندو کارکوونکو څخه هيله وکړه، چې په خپل چاپيريال کې اسلامي او طبي اخلاقو ته پاملرنه وکړي او هم له خپلو مریضانو سره غوره سلوک اختيار کړي.

ياده غونډه د سلام پوهنتون د اداري مرستیال دکتور رفيع الله عطاء په دعاء او د مولوي صاحب عبدالسلام عابد لخوا د پټۍ په پرېکولو سره پای ته ورسېده.