د خوست په سېلاب ځپلو اړين خوراکي توکي وويشل شول

د پنجنشنبې په ورځ  ۱۳۹۲-۵-۳۱د جمعیت اصلاح د خوست ساحوي دفتر له خوا د خوست د سیلاب ځپلو سره هغه مرستې چې د جمعیت اصلاح د خدماتو د څانګې له خوا د کابل د شریفو ښاریانو له لورې راټولې شوې وې د خوست ولایت د ( دولس سوه فامیلې ) په جامع مسجد کې په اړو کورنيو ووېشل شو.
په دې اړه یوه پرتمینه غونډه جوړه شوې وه چې په کې د خوست ولایت د جمعیت اصلاح د ساحوي دفتر غړو ، همکارانو او همفکرانو، د خوست ولایت علماء ، قومي مشرانو او د سیلاب ځپلو کورنیو استاذو ګډون کړې و.

د غونډې په شروع کې د خوست د ساحوي دفتر د ارشاد او دعوت مسول انجنر صاحب سخي رحمان له خوا د قران کریم تلاوت وشو او بیا د علماء په نمایندګی د ماڼی د جامع مسجد خطیب محترم مولوي صاحب محمد رحمن خپله عالمانه وینا واوروله ،نوموړې د اخوت او مسلمانو وروڼوسره د انساني همدردی په لړ کې د اسلامي لارښونو په رڼا کې خبرې وکړې او په دې اړه يې د جمعیت اصلاح کارکردګي او دا راجمع شوې مرستې یوه ممتازه نمونه وګڼله اود جمعیت اصلاح څخه يې زیاته مننه وکړه .

ورپسې د جمعیت اصلاح د ساحوي دفتر مسول ډاکتر محمد ګلاب طوطاخیل په خپلو هراړخیزو خبرو کې د جمعیت اصلاح په نمایندګی راغلو خلکو ته د ښه راغلاست وروسته دوي ته د سیلابونو په نتیجه کې د ځاني او مالي تاوان په اړه د تعزیت او تسلیت خبرې وکړې او زیاته يې کړه چې دا الهي ابتلا او ازمایش دی او دالله ج په نیکو بندګانو په هر وخت کې راځي او باید په داسې وختو کې له صبراو زغم څخه کار واخستل شي او بیا يې په دې برخه کې د جمعیت اصلاح افغانستان د هر اړخیزو برخو په اړه خپل معلومات وړاندې کړل او زیاته يې کړه چې دولت او موسسیې د سینما او تیاتر لپاره په میلونونو ډالر ورکوي؛ خو په خواشینۍ سره چې زمونږ د سیلاب ځپلو هیوادوالو لپاره د هغوي کورنیو ته د پوښتنې لپاره یو سلام هم نه اچوي او همدا جمعیت اصلاح ده چې د خپلو مسلمانو هیوادوالو په غم او مصیبیت کې د دوي سره خپل ځان شریک بولي چې دا ننی مرسته يې یوه نمونه ده.

وروسته بیا دخوست ولایت د عامه اړیکو مسول محترم بریالی روان د جمعیت اصلاح څخه شکریه او مننه ادا کړه چې دوي د خوست د خلکو د سیلاب ځپلو غم وخوړه او دوي ته يې په دې سخته کې خپل ځانونه راورسول دا دوي یوه لویه او ستره قرباني ده چې د خپلو هیوادوالو سره يې هرو خت په داسې مواقعو کې کوي او کړې دي، له دې وروسته بیا د هغو مرستو ویش لړۍ پیل شوه کوم چې د دې ځای د سیلاب ځپلو لپاره راوړل شوې و په دې برخه کې د ساحوی دفتر محترم مسول،طوطاخیل، محترم داکترصاحب محمدقیوم شاه، محترم انجنرصاحب سخي رحمان، محترم حاجې صاحب اسلام الدین، محترم استاد محمدثناء الله روښان او محترم استاد زرولي صدیقي د دغو موادو د توزیع چارې په مخ بولې.
یاده دې وي چې په توزیع شوو موادو کې یوه بورې وړه، یوه بورې وریجې، یو قطی غوړي، یوه کمپله، چای او بوره شامل و چې د یوې کورنی د خوراکي اړتیاو د پوره کیدو لپاره بسنه کوي، دا مواد تقریبا په هغو شپیتو کورنیو وویشل شول چې لومړی درجه مستحقې تثبیت شوې وې .

دا هم د یاد ولو وړده چې دې کورنیو د جمعیت اصلاح افغانستان د دې مرستو څخه زیاته مننه کوله چې دوي ته يې پرته له کوم تبعیضه په ډیر ښه شان وویشله او هم ېې د دوي نظم زیات ستایه چې د توزیع لړۍ زیاته ارامه او منظمه وه او په دې کې دوي ته هیڅ ډول کومه ستونزه نه وه..

یوتن رفیق زمان د صبریو د نورۍ کلي اوسیدونکې چې په سیلابونو کې يې د خپل فامیل درې غړي له لاسه ورکړې و په خپلو څرګندونو کې وویل الله ج دې جمعیت اصلاح ته د دې اجرونه او عوضونه ورکړي چې زمونږ سره يې په دې برخه کې مرسته وکړه او مونږ يې یاد کړو په داسې حال کې چې دولتي ادارو تراوسه زمونږ هیڅ غم نه دی خوړلی.

یو بل نفر چې مولا محمدرسول نومیده د خوست ولایت د ځدراڼو د دوه مندو کې يې لرګي پلورل او سیلاب يې ټوله دارايې وړې وه د جمعیت اصلاح د دې مرستو او په ځانګړې توګه د کابل شریفو خلکو ته په دعاګانو سرشو چې زمونږ په شان د بې چاره خلکو سره يې مرسته وکړه.

د غونډې په اخر کې په مرسته ویشونکو د موادو د نقلولو لپاره کرایه هم توزیع شوه چې خپل مواد پرې نقل کړي او دا غونډه د دعايې په ویلو سره پای ته ورسیده.