په لغمان ولایت کې د شهید مولوي حبیب الرحمن د ۳۶ تلین په یاد غونډه وشوه

راپور: جمعیت اصلاح – لغمان
پرون (جمعه) د ۱۳۹۲ل کال د چنګاښ د میاشتې په ۱۴مه نېټه، په لغمان ولایت کې د جمعیت اصلاح د لغمان ولایت د ځوانانو د څانګې له خوا په سراج بڼ کې د افغانستان د اسلامي نهضت د مخکښ غړي او د داوود خان د رژیم پر وړاندې د نامتو مسلمان مبارز، شهید مولوي حبیب الرحمن د شهادت د ۳۶ تلین په یاد غونډه وشوه. غونډه د سهار په اتو بجو د انجینر عبدالرحیم میاخېل په ویاندويۍ پیل شوه. په سر کې قاري صاحب سیداکبر ته بلنه ورکړل شوه، چې د قران کریم څو مبارک ایتونه تلاوت کړي.

د قران کریم له تلاوت وروسته، په لغمان کې د جمعیت اصلاح مرستیال، ښاغلي محمد عثمان اخلاص غونډې ته پرانیستونکې وینا وکړه. ښاغلي اخلاص ګډونوالو او د غونډې مشر مېلمه، استاد محمد زمان مزمل ته تود هرکلی ووایه. ښاغلي اخلاص د دغه ډول غونډو په اهدافو رڼا واچوله او عمده موخه یې ځوان نسل ته د اسلامي نهضت ورپېژندل وګڼل.

ورپسې د مولوي حبیب الرحمن شهید د تره زوی او په لغمان کې د جمعیت اصلاح فرهنګی مسئول، قاري احسان الله دعوتیار ته د شهید د ژوندلیک لوستلو بلنه ورکړل شوه. ښاغلي دعوتیار د مولوي حبیب الرحمن شهید د ژوند په مختلفو پړاونو رڼا واچوله. ده وویل: «مولوي صاحب حبیب الرحمن شهید په ۱۳۲۵ل کې په لغمان ولایت کې زېږېدلی. خپلې لومړنۍ زده کړې يې له خپل پلاره، مولوي صاحب عبدالحی څخه ترلاسه کړي. منځنۍ زده کړې يې د ننګرهار په نجم المدارس کې ترلاسه کړي او وروسته ابوحنیفه مدرسې ته او بیا کابل¬پوهنتون ته د لوړو زده کړو لپاره تللی. له کابل¬پوهنتونه تر فراغت وروسته په یاد پوهنتون کې استاد او د شرعیاتو د مجلې مسئول مدیر وټاکل شو». ښاغلي دعوتیار په خپله وینا کې د مولوي حبیب الرحمن شهید خاطرې او یادونه هم له ګډونوالو سره شریک کړل.

د غونډې مشر مېلمه، د اسلامي نهضت مخکښ غړی، لیکوال او سیاسي فعال، استاد محمد زمان مزمل و. استاد مزمل د غونډې ګډونوالو ته د اسلامي نهضت، له مولوي حبیب الرحمن شهید سره د خپلو خاطرو او د روانو چارو په اړه هراړخیزه وینا واوروله.

ښاغلي استاد مزمل وویل «لغمان څه چې افغانستان به بیا داسې دعوتګر ونه مومي. په اسلامي نهضت کې مولوي حبیب الرحمن او مولوي صیب خالص د د علماوو او مکتبیانو تر منځ پيوند او ولسي دعوتګران وو.

مولوي حبیب الرحمن شهید د فرصتونو په قیمت آګاه و، بوخت داعي و، لالهانده ژوند یې لاره». استاد مزمل زیاته کړه، چې د ۵۴ل کال پاڅون نورو ته هم وښوده، چې کمونیزم افغانستان ته خطر دی؛ خو استاد پر پاڅون د نیوکې په دود وویل « قاسم خان، چې د ننګرهار پېژندل شوی خان و او د نهضت پلوی و، چې کله د مولوي صاحب له زنداني کېدو خبر شو، ډېر خواشینی شو او ویې ویل، دا کار خو «ګلک» (د خان مزدور) هم کولای شوای، مولوی صاحب ولې دې کار ته په خپله ته!». استاد، د نهضت ژوندي لارویان د شهیدانو په اړه په بې تفاوتۍ تورن کړل:

«پر موږ د دې شهیدانو د ژړا پورونه پاتې دي، موږ په بدترینه مرحله کې ژوند کوو». استاد محمد زمان مزمل د نهضت د نړیوالو اغېزو په اړه وویل «د افغانستان اسلامي نهضت د دنیا تاریخ بدل کړ». استاد نوي نسل ته په خپلو سپارښتنو کې وویل: «مذهبي اختلافات پرېږدئ. موږ د یوه ګډ تهذیب میراث خواره یو، که موږ دا تهذیب له مولوي صیب څخه سم سمبال کړای وای، اوس به مو دا حال نه وو. په نوې روحیه اسلام ته کار وکړئ، څوک چې بې اتفاقي کوي، عقلاْ مبتذل دی».

د غونډې وروستی ویناوال د لغمان ولایتي شورا غړی، ګلزار سنګروال و. ښاغلي سنګروال پر تېرو جهادي مشرانو نیوکې وکړې، چې پر خپلو تعهداتو یې پښې ایښي دي. ده له جعیت اصلاح څخه د دغه وړ پروګرانو لپاره مننه وکړه. ښاغلي سنګروال د مصر پر وروستیو بدلونونو هم رڼا واچوله، ده وویل، هلته پر یوه مشروع نظام کودتا شوې ده.

غونډه سهار په یوولسو بجو د مولوي صیب صاحب حق په دعا پای ته ورسېده. د یادولو وړه ده، چې په غونډه کې د لغمان ولایت مخه ورو سپین ږيرو، پخوانیو جهادي قومندانانو، دولتي چارواکو او ځوانانو پراخ ګډو کړی و.