د افغانستان اسلامي طبي ټولنې (ايما) کلنۍ غونډه ترسره کړه

د افغانستان اسلامي طبي ټولنې يا ايما کلنۍ غونډه په کابل کې په یولړ شانداره مراسمو کې د دې ټولنې د غړو، همکارانو او سلګونو ډاکټرانو لخوا ولمانځل شوه.
د افغانستان اسلامي طبي ټولنه چې يوه غير انتفاقي او خپلواکه ټولنه ده، په افغاني ټولنه کې د غوره صحي خدماتو د وړاندې کولو، د طبابت د اخلاقو د لوړولو او ډاکټران او طبي پرسونل خپلي اصلي رسالت ته د متوجه کولو په تکل جوړه شوې ده.

غونډه د قاري صاحب لودين لخوا د قرآن کريم د څو مبارکو آیاتونو په تلاوت سره پيل شوه، ورپسې د جمعیت اصلاح افغانستان رئیس ښاغلي دکتور عبدالصبور فخري په اسلامي تمدن کې د طبي خدمتونو په موضوع خپله وينا وکړه، او زياته يي کړه، چې هغه څه چې اسلامي تمدن په طبي برخه کې بشريت ته وړاندې کړي دي، د هېڅ بل تمدن لخوا نه دي وړاندې شوي ښاغلی دکتور فخري د اسلامي تمدن په ترڅ کې د مسلمانانو او يا په خاص ډول د اسلامي خلافت خلفاء لخوا د غوره طبي خدماتو د وړاندې کولو څو داسې نمونې وړاندې کولې، چې په ډاګه کوله يې چې د څو سوه کاله وړاندې اسلامي تمدن لخوا وړاندې کېدونکي طبي خدمات د اوسنۍ زمانې د خدماتو سره په ډېره پیمانه د مقايسې وړ و، او مسلمانانو هغه وخت له داسې لارو څخه استفاده کوله، چې آن اوس هم په ګڼو هېوادونو کې د هغو لارو چارو څخه د طب په برخه کې ګټه اخستل کېږي.

طبي اخلاق هغه موضوع وه، چې د معالجوي طب پخواني رئيس او د عامې روغتيا وزارت اوسني مشاور ښاغلي ډاکټراحمدشاه شکوهمند وړاندې کړه، نوموړي د طبابت په تاريخ لنډه رڼا واچوله او زياته يي کړه، چې اسلام هم په طبي برخه ډېر تاکيد کړی دی، ځکه يې نو د انساني خدمت او هوسانيې لپاره ګڼ شعارونه هم وړاندې کړي دي، نظافت د اسلام شعار دی او د ايمان برخه ګڼل شوې، چې ايمان د انسان د هرڅه دي، علم د اسلام بل شعار دی، چې خپل ټول پيروان یی د هغه د ترلاسه کولو ته تشويق کړي دي او چې علم نه وي نو انسان هيڅکله په طب نه شي پوهېدی. نوموړي اخلاقو ته د انسان د اړتيا، د اخلاقو په رعايت، په طبابت کې د ابن سينا خدمتونه او علميت، د طبي اخلاقو عامول او تطبيق په اړه تفصيلي بحث وکړ، او ډاکټران يې وهڅول، تر څو د طبي خدماتو په وړاندې کولو کې دا مهمه برخه هېره نه کړي.

د ايما پخواني رئيس او د عامې روغتيا وزارت مشاور ښاغلي ډاکټر عبدالولي يوسفزي د ایما لنډه پېژندنه وړاندې او پرفعاليتونه يې رڼا واچوله، نوموړی زیاته کړه، چې د ایما مرکز په کابل او د کابل په شمول په ولايتونو کې فعالیتونه لري، د طبي اخلاقو تر عنوان لاندې کنفرانسونه او سیمینارونه جوړول او نور اغېزمن فعاليتونه تر سره کول يې د فعاليتونو يوه برخه تشکيلوي، نوموړي زیاته کړه، چې ایما غواړي ډاکټران خپل اصلي رسالت ته متوجه، د ډاکټرانو ترمنځ اسلامي طبي اخلاق عام او ټولنې ته هغه خدمات وړاندې کړي، چې په اوسني سختو شرایطو کې ورته زمونږ ټولنه اړتيا لري. ډاکټر يوسفزي د ويډيو له لارې خپل فعاليتونه د کنفرانس ګډونوالو ته وښودل او له ډاکټرانو يې غوښتنه وکړه، چې د دوی ترڅنګ او اوږه په اوږه ودرېږي او د ټولنې د بهبود لپاره خپله رغنده رول ولوبوي.

روغتيا پالنه، مسلک او رسالت، هغه عنوان و، چې ډاکټر سيد خالد راشد پرې بحث وکړ، او زياته يي کړه، چې زمونږ په ټولنه کې يوه غټه ستونزه دا ده، چې محصلين مو اووه کاله د طب پوهنځي ولولي او بيا خپل اصلي مسلک او رسالت ته په شا کولو سره نورو مسلکونو ته مخه کړي، نو ځکه مهمه ده، چې ډاکټران بايد خپل اصلي مسلک ته متوجه کړي، نوموړي د خپلو خبرو په ترڅ کې د عامې روغتيا وزارت سروې (په ياده سروې کې ویل شوي دي، چې په بهرنيو هېوادونو او د افغانستان په داخل کې شوي تشخيص ۶۰ فيصده يو ډول دی، خو خلکو په افغاني ډاکټرانو خپل اعتماد له لاسه ورکړی دی) ته په اشارې سره وويل، چې تر ټولو مهمه داده، چې مسلکي ډاکټران بايد ټولنې ته وړاندې شي، تر څو د خپلې ټولنې باور ترلاسه کړي، نوموړي زیاته کړه، چې طبي پرسونل او په ځانګړي ډول ډاکټران بايد د ماديت په ځای خدمت خپل هدف او ترجېح وګڼي او طبابت ته د يو سپڅلي مسلک په توګه وګوري نه د پيسو ترلاسه کولو سرچينه، ښاغلي راشد طبي مسلک او د مسلک لپاره نړيوال تعريفونه وړاندې او هغه ارزښتونه چې ددې مسلک سره تړلي دي، تشرېح کړل.

د ايما پر راتلونکي ستراتيژيک پلان د ايما نوي رئيس د اعصابو د جراحۍ متخصص ښاغلی ډاکټر احمد عبيد مجددي خپله وينا وړاندې کړه، او زياته يي کړه، چې ايما غواړي، چې د ښوونيزو او تحقيقي لارو څخه په راتلونکي کې د خپل ټولنې ته خدمت وکړی، پر ډاکټرانو د خلکو اعتماد لوړل، په پوهنتونونو او ښوونيزو مؤسسو کې د لوړو او معياري ښوونو وړاندې کول، طبي څېړنې، له ډاکټرانو او مريضانو څخه د دفاع او حيثيت د لوړتيا او داسې نور هغه پلانونه دي چې ايما غواړي په راتلونکي وخت کې يې عملي کړي.

د پروګرام بله ويناواله آغلې غلې ډاکټره کريمه وه، چې د خپلې وینا په ترڅ کې يې ټول ډاکټران دې ته وهڅول، چې د خپل مسلک له لارې خلک نېکې رويې ته وهڅوي او زياته يې کړه، چې ډاکټر په ډېرې اسانۍ سره کولی شي، خلک په دیني روحيه وروزي، نوموړې زياته کړه، چې د خپل کار او معالجې پر مهال مېرمنې د اسلامي احکامو عملي کولو ته هڅوي او دخپلو نسخو له لارې يې ټولنې ته ديني اخلاق رسوي.

په پای کې يو شمېر هغو ډاکټرانو ته چې په مختلفو برخو کې يې د هېواد په داخل او بهر کې تخصص کړی و، ستاينليکونه او هغو شرکتونو ته چې ياد کنفرانس يې تمويل کړی و لوح تقديرونه ورکړی شول.