«اصلاح کاروان» د جلال آباد دقرآن پوهنې دورې کې ګډون وکړ

د جمعيت اصلاح افغانستان د کارته نو ساحوي دفتر په نوښت لسګونو تنو په جلال آباد کې د قرآن پوهنې د پای ورځې په مبارکه غونډه کې ګډون وکړ.

د  جمعې ورځې (۱۳۹۱لمريز کال د کب ۱۱مه) په سهار، نږدې دوه سوه تنه د کارته نو په «القدس معهد» کې سره راټول او په ګروپونو کې ویشل کیدو وروسته په شپږو کاسټر موټرو کې يې د جلال اباد په لور حرکت وکړ. د لارې په اوږدو کې په هر موټر کې د نجم د ځوانانو له لوري فرهنګي پروګرامونه ترسره شول.

جلال اباد ښار ته له رسېدو سره سم په جلال اباد کې د جمعيت اصلاح د غړو له لوري له کابله ورغلو مېلمنو ته ښه راغلاست وويل شو او د امام ابويوسف په مرکز کې د غرمې ډوډۍ تر خوړلو وروسته يې په جومات کې د جمعې لمونځ ادا کړ، بيا په منظم ډول په يوه ليکه ټول وروڼه د تکبير د نارو په بدرګې سره د جلال اباد د عيدګاه په لور وخوځېدل. هلته په ټاکل شوي ځای کې له ځای په ځای کېدو وروسته د جمعيت اصلاح د ختيځ زون مشر دوکتور نجيب الله صالح د «اصلاح کاروان» ته ښه راغلاست ووايه.

هغه زياته کړه : “د تاسو راتګ زموږ روحيه لا پياوړې کړه، موږ به ستاسو د نوښت په پل قدم ږدو او په کابل کې د قرآن پوهنې په دورو کې به ګډون کوو. له کابله ستاسو راتګ د دې څرګندونه کوي چې جمعيت اصلاح د ټولو ولسونو يوځاى کول غواړي او د ايمان په کلک مزي يې سره تړي.”

ددورې په ورستۍ ورځ چې د اسلام حکومت اهميت، اړتيا او برکتونو ته ځانګړې شوې وه، شيخ القرآن مولانا عبدالصبور، هراړخيزه وينا وکړه. د مازيګر تر لمانځه وروسته د هغه ځاى فضا په دعاګانو، الله ته په زاريو او ژړاوو ملکوتي بڼه غوره کړې وه، د ټول امت د ښېګڼې او اصلاح لپاره دعاګانې وشوې، د افغانستان د مسلمان ولس د برياليتوب او د هېواد د پرمختګ او سوکالۍ لپاره په داسې حال کې چې د ټولو ګډونوالو له سترګو اوښکې روانې وې، لاسونه پورته شول.

ددورې له پای وروسته «اصلاح کاروان» بېرته د کابل په لور حرکت وکړ او د ماخوستن په نهه بجو د کارته نو سيمې ته ورسېدل.