د افغانستان اسلامي فرهنګي مرکز کې د يوې غونډې په ترڅ کې د سيرت ستوري ونازول شول

د روان کال د حوت د مياشتې په شپږمه نېټه د يکشنبي په ورځ ماسپښين دوه بجې د افغانستان اسلامي فرهنګي مرکز د سيرت د يوې پرتمينې غونډې شاهد ؤ غونډه د قران کريم په تلاوت پيل شوه.

ورپسي د افغانستان اسلامي فرهنګي مرکز رئيس قاضي محمد حسن اسلامي راغلو مېلمنو ته ښـه راغلاست ووايه په مسابقه کې ګډون کوونکواو په ځانګړې ډول ګډونکو او دهغوى کورنيواو اړونده تعليمي ادارو مسئولينوته يې مبارکې وويله د مرکز په فعاليتونو او په نزدې ورځو کې د سيرت دورې او مسابقي باندې يې رڼا واچوله او د هغې اهميت او هدف يې ګډونوالو ته بيان کړ.

وروسته د شهاب الدين غوري لېسي شاګرد سيد فداء الحق په زړه پورې شعر واورولو .

ورپسي په پيښور کې د معارف د اتشي رئيس عبدالغني هدايت خبرې وکړې د مرکزفرهنګي فعاليتونه يې وستايل او د ځوان نسل په روزنه کې يې ددوې هڅې د قدر وړ وبللې او په ځانګړې توګه د سيرت دوره او مسابقه يې د ځوانانو لپاره ډېره ګټوره وبلله او په دې هکله يې مرکز ته د همکارۍ ډاډ ورکړ.

وروسته د شهاب الدين غوري او صديق اکبر د لېسو شاګردانو د سيرت مسابقي په اړه خپل خاطرات حاضرينو سره شريک کړل او ويې ويل: چې د سيرت دغې مسابقې مونږ ته ډېره ګټه کړې او زمونږ په ژوند کې يو ډول بدلون راوستی. او د مرکز نه يې مننه وکړه چې د دوې لپاره يې داسې يوه ګټه وره زمينه برابره کړه.
وروسته د هېواد پياوړي عالم او شيخ القرآن والحديث مولوي عنايت الرحمن د سيرت پيغام په موضوع تفصيلي او ګټوره وينا د غونډې ګډون کوونکو ته واوروله چې د هغوى پام يې هغو مهمو ټکو ته راواړوه چې يو مسلمان ته د رسول الله صلى الله عليه وسلم په وړاندې اړين دي او مسلمان يې بايد په خپل ژوند کې پلې کړي

وروسته د مرکز فرهنګي د مرستيال شکرالله مخلص لخوا نتائچ اعلان شول او د قدرمنو ميلمنو په لاس په ٢٢ تنو ممتازو شاګردانو جوائز وويشل شول .

غونډه مازيګر پاوکم پنځه بجې د صديق اکبر د عالي لېسې د استاذ مولوي صاحب غلام احد په دعاء پاى ته ورسېده.