د افغانستان اسلامي فرهنګي مرکز کې د سيرت مسابقې ازموينه واخستل شوه

د روان لمريز کال د دلوې د مياشتې په ٢٩ نېټه ديکشنبې په ورځ ، د افغانستان اسلامي فرهنګي مرکز لخوا د دغه مرکز په انګړ کې د سهار په نهو بجو د سپيڅلي نبوي سيرت شانداره مسابقه ترسره شوه . چې د سيمې د مختلفو تعليمي ادارو ګڼ شمېر محصلينو او شاګردانو په کې ګډون کړې و. د مسابقې غونډه د قرآن کريم د څو مبارکو آيتونو په تلاوت پيل شوه ، ورپسې د افغانستان اسلامي فرهنګي مرکز رئيس قاضي محمد حسن اسلامي د مسابقې په اهميت رڼا واچوله او ددغې مسابقې موخې او اهداف يې ګډون کوونکو ته بيان کړل او د خپلو خبرو په ترڅ کې يې وويل: د خوښۍ ځاى دى چې نن د خوږ پيغمبر صلى الله عليه وسلم د سيرت په سيالۍ کې قرار لرو او د غه سيالي د نړۍ د نورو هر ډول سياليو نه په زرهاو ځله غوره ده او دا ځکه چې مونږ غواړو خپل راتلونکی د اسلامي ارزښتونو په رڼا کې روښانه ووينو ،

وروسته د مرکز مرستيال شکرالله مخلص د مسابقې په هکله لارښونې او معلومات گډون کوونکو ته وړاندې کړل . او د مسابقې د سوالونو پاڼې چې د سيرت په پنځوسو پوښتنو مشتملې وې په گډونوالو وويشل شوې او مسابقه عملا پيل شوه .

ياده دې وي چې ددغې مسابقي لپاره دوه هفتې وړاندې اعلانات شوي و د سيمې مخلتفو تعليمي ادارو کې بروشرې تقسيم شوې وې او د محترم استاذ عبدالواسع صابر لخوا د مرکز په انګړ کې د سيرت النبي صلى الله عليه وسلم درسي دوره هم شوې وه

د مسابقې لپاره د محمد عبدالحى ( د محمد صلى الله عليه وسلم سپيڅلې ژوند) کتاب ټاکل شوې و .

د دغې مسابقي د اعلاناتو په برخه کې د پيښور د نهاد جوانان مسلمان ( نجم ) منډې ترړي او کو ښښونه هم د يادولو وړ دي د الله جل جلاله څخه ورته د دعوت په سپيڅلې لار کې د لابرياليتوب او اجر عظيم غوښتنه کوو

د مسابقې د صحنې د کنترول او خدمت په برخه کې لاندې محترمو استاذانو او ځوانانو برخه اخيستې وه

مولوي صاحب غلام احد ، استاذ نعمت الله ، استاذ محب ربي ګران ، مولوي صاحب عبدالمالک ، ډاکتر صاحب عطاء الرحمن فطرت ، محمد بلال خدمت ، ګل احمد هاتف ، امان الله تاند ، قاري عبدالحى قانت او ذبيح اسلامي .

دغه په زړه پورې مسابقه د ورځې په يوولسو بجو د پوره تنظيم په ساتلو پاى ته ورسېده چې ان شاء الله نتايج به يې راتلونکې يکشنبه د حوت د مياشتې په ٦ نېټه د يو شاندار کنفرانس په ترڅ کې اعلانېږي او ممتازو ګډون کوونکو ته به جوائز هم په همدغه کنفرانس کې ورکول کېږي .