جلال اباد- اصلاح رسنیز ګروپ: شنبه، د ۱۳۹۱ کال د سلواغې ۲۸ مه-جمعيت اصلاح ختيز زون د چاپيريال ساتنې په اړه په سيمه کې د خلکو د پوهې د کچې لوړولو په موخه د (نيالګي وکرئ – هيواد شين کړئ – اجر ترلاسه کړئ) تر سر ليک لاندې يو کمپاين په لاره واچاوه.
ياد کمپاين چې دننګرهار کانال رياست او جلال اباد ښاروالۍ سره په نږدې همغږۍ ترسره کيږي، پيل يې د يوې پرانستونکې غونډې په ترڅ کې وشو چې دجمعيت اصلاح د مسؤولينو ترڅنګ ګڼ شمېر ديني عالمانو، پوهنتون استادانو، محصلينو او سلګونه عامو وګړو پکې ګډون وکړ.
د دې کمپاينموخه هيوادوالو ته دا پيغام رسول دي چې د نيالګيو کرلو له لارې د چاپيريال په پاکۍ او سمسورتيا او په ټوله کې د هيواد په بيا رغونه کې فعاله ونډه واخلي او د الله رضا ترلاسه کړي.
د کمپاين له پيله وړاندې د عامه پوهاوي په موخه دښار په مختلفو واټونو کې د موضوع اړوند شعارونه او لارښونې د بينرونو په شکل ځړول شوي او ۵۰۰۰ معلوماتي لاس پاڼې د خلکو د پوهې د کچې دلوړولو په موخه چاپ شوې وې، چې پر خلکو وويشل شوې.
له پرانستونکې غونډې وروسته د جمعيت اصلاح او نجم درضاکارانو لخوا د جلال اباد ښار په حاجي عبدالقدير واټ کې ۴۰۰ بوټي د نمونې په توګه وکرل شول.
امير محمد چې د جلال اباد ښار يو اوسېدونکی دی د نوموړي کمپاين په اړه يې خپله خوشحالي په دې ټکو څرګنده کړه:
د بوټو کرل هېواد سر سبزه کوي چې د ملت او دولت لپاره دا يوه سرلوړي ده. دا کار د هېواد او بيا د جمعيت اصلاح لپاره يوه بريا ده ځکه چې خلک دې ته تشويقيږي چې بوټي وکري او په نتيجه کې يي افغانستان زرغون شي. زه له نورو هېوادوالو هم دا غوښتنه کوم چې خپل هېواد زرغون او سرسبزه وساتي او سږکال لږ تر لږه يو بوټی وکري.
د اسلام مقدس دين د ځان د پاکۍ ترڅنګ د چاپيريال پاکۍ ته هم ډير پام کوي او همدا علت دی چې په مبارکو احاديثو کې د چاپيريال پاک ساتلو په موخه د ونو او بوټو په کرلو باندې ډير تاکيد شوی دی.
جمعيت اصلاح چې د فرد، کورنۍ او ټولنې د اصلاح لپاره يې ملا تړلې، نوموړی کمپاين يې د هغه هڅو يوه کړئ ده چې د خپل ملت د دين او دنيا دواړو د جوړولو لپاره يې تل کړې دي. د جلال اباد ښار د پاکوالي کمپاين، د فقراؤ لپاره د مرستو راټولولو کمپاين، د قران پوهنې دورې، د پيغمبر صلی الله عليه وسلم په دفاع کې کانفرانس، د معارف اسلامي کورسونه او د سيرت النبي او نورو موضوعاتو په اړه علمي مسابقې د جمعيت اصلاح د فعاليتونو عمده بيلګې دي.
راپور: محمد ګلاب توحیدیار
9 Comments
نویدی
ما شاءالله
الله تعالی دی تاسو ټولو ته ددی نیکی بدله پوره پوره درکړی
حلیم وردګ
درنښت
هرکال زرګونه نیالګي یوازې د کابل ښاروالۍ په دایره کې کرل کیږي، خو دوه فیصده ېې هم د کال تر نیمايي ځان نشي رسولی.
پدې هیله چې د نیالګیو د کینولو نیمه پانګه د هغه د پاللو او اوبولو لپاره ځانګړې شي.
هیله ده دغه ټکي ته پدغه برخه ټول فعالان پام وکړي
سعد عمار
ډیر زړه خوشحالوونکی خبر دی!
الله دي ټولو برخوالو ته اجرونه ورکړي. نور یې هسې په خوله او د کاغذ پرمخ وایې او دغه ځوانان یې عملي نسخه وړاندي کوي.
حنيف
ما شا الله يو ښکلی ابتکار مو کړی الله متعال دی نیکی بدلی په دنیا او اخرت کی درکړی
دالكاموي ګروپ
الله تعالي مو راته ژوندي لره پداسي خلكو ابتكاراتو يقينا زمونږ وطن هر اړخ كي خدمت ته ضرورت لري چي بايد ددي وطن بچي يي ورته ترسره كړي
جزاءكم الله خير ا
كامران نورزی
ما شا الله – څومره منظم ګروپ دی.
د ورور حلیم وردګ له پیشنهاد سره موافق یم. باید هر نیالګۍ یو څښتن ولری او هر ورځ یا اونۍ دوه دری واری تری لیدنه وکړی، خبر یی واخلی ترڅو چه هغه رالوی شی. په بله معنی هر منطقه کی یو یو کس ته یو یو یا څو څو نیالګی ور وسپارل شی او بیا تری پوښتنه وشی چه څومره یی لوی کړی دی. کیدای شی دا کار د اصلاح غړی یا عام خلک وکړی.
دا یو ستونزمن کار دی ولی پوخ کار دی.
مننه
کامران
سیدعلم سدید
الله ج دي ټولو برخوالو ته اجرونه ورکړي شه ابتکار دی
میرزااغا(عادل)
ماشاالله دیره په زره پوری کمپاینونه دی چی انشاالله په تول ا افغانستان کی به دجمعیت اصلاح لخواجریان وکری
فصیح الله عبدالباقی
د جلال آباد جمعیت اصلاح او د نجم ځوانانو ته په دی کامیاب کمپاین د زړه له کومی مبارکی وایم.
الله پاک دی موږ او تاسی ته ددی وطن د معنوی او مادی جوړونی توفیق رپه برخه کړی. امین