د رسول الله صلی الله علیه وسلم د بیبیانو دسترې سیالۍ تحریري آزموینه واخیستل شوه

په کابل کې د څه پاسه ۹۰۰ ښځینه زده کوونکو او محصلاتو په ګډون :
د رسول الله صلی الله علیه وسلم د بیبیانو دسترې سیالۍ تحریري آزموینه واخیستل شوه

راپور: اصلاح رسنیز ګروپ، خالدملکزی
په کابل کې د ښځینه زده کونکو اومحصلاتو لپاره د پیغمبر ( صلی الله علیه وسلم ) دمبارکو بی بیانو د سیرت په اړه دیوې سترې مسابقې لپاره تحریري آزموینه واخیستل شوه.

داصلاح رسنیز ګروپ دخبریال درپوټ پر بنسټ دغه ژمنۍ مسابقه د جمعیت اصلاح افغانستان د خویندو دڅانګی په ابتکار او نوښت جوړه شوې وه چې د نهه سوه تنو شا او خوا نجونو په ګډون یې تحریري آزموینه دجمعې په ورځ د سلواغې په ۲۷مه نېټه په کابل کې دسلام د خصوصي زده کړوموسسې په تالار کې واخیستل شوه.

د راپور په اساس ددې تحریري آزموینې بهیر د سهار په ۹:۰۰بجو د کشری خور عطیه معتصم په تلاوت سره پیل شو چې تر هغې وروسته د غونډې د ستیژ د چارو مسؤولې او دکابل پوهنتون محصلې علیا په مخ بیولې.
دغونډې په پیل کې د جمعیت اصلاح د خویندو دڅانګې د دعوت او ارشاد برخې مشرې اود دې سیالیو عمومې مسؤولې استاد هایدې اکبري لنډې خبرې وکړې او ددې ډول سیالیو د جوړښت پر موخو یې ړنا واچوله.

هایدې اکبري وویل چې نن ډير د خوشحالۍ ځای دی چې ګڼ شمېر خویندی د نړۍ د بهترینو بی بیانو دسیرت په اړه په دی علمي سیالۍ کې په ډیری لیوالتیا سره ګډون کوي، تر څو د نړۍ د بهترین شخصیت جناب پیامبر (صلی الله علیه وسلم ) اودهغه دبی بیانو د ژوند په اړه معلومات تر لاسه کړي.

د دغې ژمنۍ سیالۍ عمومې مسؤولې ددی ډول سیالیو هدف ته په اشارې سره څرګنده کړه چی غواړو ددې ډول سیالیو له لارې د خویندو ذهنونه فعال او د دوی افکار تنویر شي، او هم له بله پلوه دوی وکولای شي په فساد کې کې له ښکیلتیا ځان وژغوري.

هایدې اکبري وروسته بیا د سیالیو ګډونوالو څخه غوښتنه وکړه چې په سپیڅلي نیت سره په دی علمي سیالۍ کې برخه واخلي ،او سپارښتنه یې وکړه چې خویندې دې یوازې دنیوي توکي او جایزې په دې مسابقه کې د ګډون لپاره خپله موخه نه ګرځوي ،بلکې تر ډېره بریده خپله موخه باید اخروي

د امهات المومنین په نامه ددغې سیالۍ عمومي مسؤولې له دغه ډول پروګرامونو څخه د جمعیت اصلاح موخې ته په اشاري سره وویل” جمعیت اصلاح چې دیني او اجتماعي ارګان دی غواړي چې په ټولنه کې دا ډول اسلامي ارزښتونه پیاوړي کړي ،تر څو د فرد ، کورنۍ او د ټولنی اصلاح را منځ ته شي.

د دې سیالۍ یوې بلې مسؤولې او د جمعیت اصلاح د خویندو دڅانګې د تربیتي چارو مشرې مسعوده جامي اصلاح رسنیز ګروپ ته وویل چې ددی سیالۍ د نوم لیکنی لړۍ او د امتحان لپاره د ټاکل شوي کتاب وېش ، دکابل ښار په لسو سیمو کې یوه میاشت مخکې د مرغومي په میاشت کې پيل شوی وه،او ګډونوالو خویندو ته یو میاشت وخت ورکړل شوی ؤ تر څو په ډاډ سره د رسول الله صلی الله علیه وسلم د بيبیانو دغه سيرت په آرام ذهن سره ولولي .

مسعودې جامې وویل د پیغمبر ( صلی الله علیه وسلم ) د مبارکو بی بیانو په اړه دسیرت دغه سیالي په مختلف ډول پوښتنو مشتمله ده ،لکه څلور ځوابه / تشریحي / تکمیلي او صحیح وغلط سوالونه .

د نوموړې په وينا، ددغې سيالۍ په ترڅ کې به د لومړي مقام ګټونکې ته د ٤٠زرو افغانيو په ارزښت لپ ټاپ کمپيوټر، ددویم مقام ګټونکې ته د ٣٠زرو افغانيو په ارزښت لپ ټاپ کمپيوټر او د درېم مقام ګټونکې ته به د شل زرو افغانيو په ارزښت ډيسک ټاپ کمپيوټر ډالۍ ورکړل شي.

ددې سیالیو عمومې مسؤولې هایدې اکبري اصلاح رسنیز ګروپ ته د یوې مرکې په ترڅ کې وویل چې ددوی له نظره ددا ډول جایزو ورکړه ډېره مهمه نه ده،خو مهمه داده چې ددې ډول سیالیو د پرلارې اچولو له لارې دوی هڅه کوي چې یوې خواته د ځوانو خویندو په منځ کې هدفمندې مطالعې ته تشویق کړي او ددوی په ذهن کې د اسلامي ارزښتونو ترسیخ او ددین د پوهاوي زیاتوالی دی.

د ښځو او نجونو په کچه ددې سترې سیالۍ یوې ګډونوالې ،د کابل ښار د یوه ښځينه ښوونځي زده کونکې تمنا، له دې سيالۍ خوښي وښوده او په داسې حال کې چې د جمعیت اصلاح ددې ډول پروګرامونو ډېره ستاینه یې وکړه ، له دولت اونورو ارګانونو يې هم وغوښتل ترڅو دا ډول سیالۍ په لاره واچوي.

د جمعيت اصلاح د خويندو د برخې د تربيت مسوولې د معلوماتو له مخې، دا ټولنه د خويندو لپاره هر کال دغه ډول سيالي ترسره کوي،دغه راز بېلابېل نور فعاليتونه، لکه کنفرانسونه، ديني سيالۍ او غونډې يې هم په لاره اچولې دي.

د اصلاح رسنیز ګروپ د راپور په اساس ددې سترې سیالۍ دبهیر د لیدنې په موخه د جمعیت اصلاح د مرکزي شورا ريیس استاد نصیر احمد نویدي هم دسلام د لوړو زده کړو موسسې ته راغی او په داسې حال کې چې د آزموینې له بېلابېلو ټولګیو څخه یې لیدنه وکړه،د سیالۍ ګډونوالې خویندې یې دې ته تشویق کړې ترڅو ددې ډول آزموینو کې د ګډون له لارې خپل دیني معلومات زیات او نه یوازې ښې جایزې ترلاسه کړي، چې آن د آخرت لپاره هم ځان ته ښه توښه برابره کړي.

دیادونې وړ ده چې تېر کال (١٣٩٠) هم، د جمعيت اصلاح د خويندو د برخې له لوري (د اسلامي فقهې ستوري) سيالي په لاره اچول شوې وه، چې څه باندې ١٥٠٠ نجونو په کې برخه اخيستې وه.

ددې سترې ژمنۍ سیالۍ د پایلو د اعلان په اړه د پروګرام مسؤولې اصلاح رسنیز ګروپ ته وویل چې د کب په شلمه نېټه به ددې امتحان د بریالیو خویندو نومونه د اصلاح غږ راډیو، د مسلمانې ښځې ویب پاڼې او اصلاح آن لاین ویب پاڼې له لارې اعلان شي.