د ننګرهار اصلاح غږ راډیو دهمکارانو کلنۍ غونډه ترسره شوه

راپور: محمدالدین احمدي

د روانې (سلواغې) میاشتې په ۷مه نیټه د ننګرهار اصلاح غږ راډیو دهمکارانو کلنۍ غونډه د جمعیت اصلاح دجلال آباد په مرکزي دفتر کې تر سره شوه.

غونډه سهار په نهه بجو پیل شوه، په سر کې د کلام پاک څو مبارک ایاتونه د قاری عرفان الله همدرد لخوا تلاوت شول.

ورپسې د غونډې پیلیزه وینا په ننګرهار کې د جمعیت اصلاح مسؤول استاد عبدالرحیم صراف وکړه.

نوموړي په خپله وینا کې د اصلاح غږ راډیو خپرونې وستایلي او له ټولو همکارانو څخه یې مننه وکړه چې د دغه اسلامي دعوت په مخته وړو کې هر راز همکاري کوي.

د استاد صراف له خبرو وروسته د خوږ ژبي ترانه ویونکي جواس سودايی لخوا ترانه وویل شوه، ورپسې د جمعیت اصلاح د ختیځ زون مسؤول دوکتور نجیب الله صالح (دمسلمان ژورنالیست اخلاق) تر عنوان لاندې درس د غونډې برخه والو ته وړاندې کړ.

دکتورصالح په یوه اسلامي ټولنه کې د ژورنالیست په مسؤولیت او د رسنیو په رول خبرې وکړې.  نوموړي همدا راز وویل چې د اصلاح غږ راډیو په اوسني پیر کې د اسلام د خپراوي او رسونې یوه ستره وسیله ده، چې باید هر راز ملاتړ یې وشي.

د دکتور صالح له خبرو وروسته د غونډې ګډونوالو، د اصلاح غږ راډیو کارکوونکو او همکارانو ته وخت ورکړل شو چې د راډیو د خپرونو په اړه خپلې مشورې او وړاندیزونه شریک کړي، تر څو خپورنې لا په زړه پورې شي.

ورپسې د ننګرهار اصلاح غږ راډیو د تمویل څانګې مسؤل استاد محمد ګلاب توحیدیار لخوا (د ویاند ځانګړنې) تر عنوان لاندې یو درس وړاندې شو، نوموړي د یوه ویاند په ځانګړتیاوو خبرې وکړې او په یوه رسنۍ کې یې د ویاند پر اهمیت رڼا واچوله، ورسره په څنګ کې د همکارانو او ګډونوالو لخوا پوښتنې وشوي، چې د استاد لخوا ورته ځوابونه وویل شول.

له لمانځه او غرمنۍ وروسته د استاد محمد ګلاب توحیدیار لخوا د خبر ، راپور او مرکه څنګه ترسره کړو موضوعاتو باندې لنډ بحث وشو.
د استاد له خبرو وروسته د ننګرهار اصلاح غږ راډیو د خپرونو مسؤل عبدالصبور مبارز د ژوندیو خپرونو لیست ګډونوالو ته واوروه او په ترڅ کې یې د هرې خپرونې کوربه د غونډې ګډونوالو ته ورپیژانده، چې د خپرونو د لا ښه والې لپاره د ګډونوالو له خوا نظرونه ورکړل شول.

د غونډې وروستۍ وینا د ننګرهار اصلاح غږ راډیو مسؤل حبیب الله زیار وکړه. زیار د ټولو همکارانو څخه مننه وکړه چې دغه د اسلامي دعوت ممبر پر مخ بیایې. غونډه د مازدیګر په ۳ بجو او ۳۰ دقیقو د مولوی محمد اشرف لخوا د دعا په کولو سره پاي ته ورسیده.

د یادونې وړ ده چې ننګرهار اصلاح غږ راډیو د څه دپاسه یوه کال راهیسې د ننګرهار ولایت مرکز جلال اباد ښار څخه خپرونې پیل کړي، چې تر دې دمه هره ورځ لس ساعته خپرونې لري او د شاوخوا ۳۰ تنو کارکوونکو لخوا پر مخ وړل کیږې چې ۶ تنه یې دایمې او پاتې نور یې افتخاري کارکوونکي دي