په جلال آباد کې د جمعیت اصلاح له لورې فلسطین د مظلوم ولس او حماس په ملاتړ غونډه

راپور: ح زیار
د جمعې په ورځ ماسپښين دوه بجې جمعيت اصلاح د ننګرهار څانګې په فلسطين باندې د اسراييلو د وحشيانه تيري د غندلو په موخه په عيدګاه جومات کې احتجاجي غونډه وکړه چې په کې د جلال اباد په دين مينو ښاريانو، محصلينو، متعلمينو او د پوهنتون استادانو ګډون وکړ. د ګډون کوونکو شمېر د ۱۵۰۰ تنو په شاوخوا کې و.

دغه غونډه د قارې عبدالوارث لخوا د کلام الله مجید د څو مبارکو آیاتونو په تلاوت سره د ماسپښین په دوه بجوپیل شوه، له تلاوت وروسته د ننګرهار اسلامي پوهنتون د شرعیاتو پوهنځي استاد پوهندوی مولوې محمد شریف رحماني ته بلنه ورکړل شوه تر څو د غونډې ګډونوالو ته خپله وینا واوروي. استاد رحماني ډیره له احساساتو ډکه او په زړه پورې وینا وکړه او زیاته یې کړه: چې زمونږ د ننۍ غونډې هدف همدا دې چې نړیوالو ته دا وښایو چې فلسطین یواځې ندې او د یو مسلمان امت په حیث یې مونږ ټول ملاتړ کوو، مونږ د اسراییلو تیرې په سختۍ سره غندو او د تش په نامه ملګرو ملتونو سازمان، بشر حقوقو او نورو نړیوالو غواړو چې د اسراییلو دا تیرې محکوم کړي. استاد رحمانې د غونډې له ګډونوالو هیله وکړه چې که نور څه مو له لاسه نه کیږې نو اقلا خو د پیپسي او کوک څښل بند کړو د کومو ګټه چې اسراییلو ته ځې.

د غونډې بل ویناوال د ننګرهار د اسلامي پوهنتون استاد او د جمعیت اصلاح د ختیز زون مسول دکتور نجیب الله صالح وو، دکتور صالح هم په سختو ټکو سره د اسراییلو تیرې وغانده او زیاته یې کړه چې اسراییل او امریکا او په ټوله کې غرب تل د اسلامي امت د ټوټه ټوټه کولو هڅې کوي، همدوی وه چې په ترکیه کې د اسلامي خلافت د راپرځولو لپاره له هیڅ راز کارونو څخه دریغ ونکړ.

همدوی وه چې سلطان عبدالحمید ته یې وړاندیز وکړ تر څو د فلسطین په خاوره د اسراییلو شتون ومني خو هغه په ډیر جرات سره ددوی دا وړاندیز رد کړ او د فلسطین په خاوره کې یې په اسراییلو د زمکو په خرڅلاو بندیز ولګاوه او هیڅ اسراییلي ته اجازه نه وه چې له درې میاشتو زیات وخت په فلسطین کې تیر کړي. خو متاسفانه چې سلطان عبدالحمید هم د همدوی د دسیسي ښکارشو او د زهرو په ورکولو سره یې په شهادت ورساوه. دکتور صالح د فلسطینې مجاهد دکتور عبدالله عزام یادونه هم وکړه او ویې ویل چې نوموړې هم د فلسطین څخه وو او هغه څوک وو چې د افغانستان جهاد یې په نړیوالو وپیژانده او د افغانستان د مجاهدینو لپاره یې د نړیوالو په کومک جلبولو کې ډیرې هڅې وکړې چې مونږ به یې هیڅکله هم له یاده ونه باسو.

له دکتور صالح وروسته د ننګرهار د علماوو د شورا ریس مولوې حمیدالله وینا وکړه او په مسلمانانو یې غږ وکړ چې د کفارو او یهودو له دسیسو خبر شې او هغوې د ناټو او وارسا د تړونونو په خلاف یو موټې شي. د مولوې صیب حمیدالله له وینا وروسته د غونډې یو تن ځوان برخوال قارې نجیب الله مجروح د مولوي صاحب محمد یونس خالص په زړه پورې شعر (مه خانده ظالمه کړپهار د زولنو ته مې، ګوره نتیجه کې اخر کار د زولنو ته مې) په ډیر خواږه غږ واوراوه.

لدې وروسته د نهاد جوانان مسلمان (نجم) ریس دکتور رحمت الله زاهد ته بلنه ورکړل شوه ترڅو خپله وینا حاضرینو ته واوروي. دکتور زاهد د فلسطین په بې وزله ولس د اسراییلو وحشیانه تیرې وغانده او زیاته یې کړه: نن مونږ ددې لپاره راټول شوې یو تر څو د اسراییلو د وحشیانه تیرې غندنه وکړو او دغه راز د فلسطیني وروڼو په خاص ډول د حماس د غازیانو بریالیتوب هم وستایو چې د څو ورځو سخت مقاومت وروسته یې اسراییل مجبور کړل تر څو اوربند وکړي. پدغه اوربند کې یقینا د مصر د جمهور ریس دکتور مرسې هڅې هم د یادونې وړ دي چاچې د خپل حکومت صدراعظم هشام قندیل د فلسطین سره د خواخوږۍ ښودلو په منظور غزی ته ولیږه.

دغه راز د ترکیې د صدراعظم رجب طیب اردوغان هڅې چې خپل د بهرنیو چارو وزیر یې غزې ته ولیږه او همدارنګه د تونس د حزب االنهضه مشر راشد الغنوشې په خاصه غوښتنه د تونس د بهرنیو چارو وزیر هم له غزې لیدنه وکړه چې مونږ ورڅخه مننه کوو.

دکتور زاهد زیاته کړه: اصلا اسراییل خپله هیڅ شې هم ندې خو همدا غرب او په خاص ډول امریکا ده چې ددوی ملاتړ کوي او دا جرت یې ورکړي تر څو دغه ډول ناوړه تیري وکړي.

هغه وویل که نن مونږ د فلسطین حمایت کوو نو په افغانستان کې د امریکا د تیریو په خاص ډول په کنړ، لغمان، هلمند، ننګرهار او په ټول افغانستان کې هم په شدید ډول سره غندنه کوو او په ډاډ سره ویلو شو چې نور د امریکا دسیسې ټولو خلکو ته رسوا شوي او د امریکا د ناکامۍ وخت رارسیدلې. دکتور زاهد زیاته کړه، پدغه ننۍ غونډه کې له مونږ سره د ۸۰ کلونو په عمر سپین ږیري او د ۷ کلونو په عمر هلکان برخه لري چې دا ددې ښکارندوې دې چې ټول افغانان د فلسطین سره خپله خواخوږي څرګندوي او د اسراییلو وحشیانه تیری غندي.

د غونډې وروستۍ ویناوال د امام ابو یوسف دارالعلوم مدیر مولوي میر عباس ګوهري وو چې د غونډې ګډونوالو ته یې د غونډې لاندې پریکړه لیک ولوست:
دا چی د فلسطين په ځمکه کې د ټولې اسلامي نړۍ لمړۍ قبله وجود لري او د بلې خوا نه ټول اسلامي امت د يو جسد او بدن حيثيت لري چې د منطقې، ژبې، رنګ او نژاد په توپير سره نشي جلا کيدای، نو له همدې امله د فلسطين د خلکو ملي حاکميت، د هغوی د خاورې بشپړتيا، د بيت المقدس د خپلواکۍ او ازادی لپاره مبارزه او د فلسطين د مظلوم ولس څخه دفاع او حمايت د ټولې اسلامي نړۍ د هر فرد-فرد اسلامي او ايماني دنده او وجيبه ده، چی د همدې ايماني وجيبې او د مسوليت د احساس پر بنياد مونږ د افغانستان ټول مسلمان ولس هم د فلسطيني ولس سره د لاندې پريکړه ليک په صادرولو خپل حمايت، ملاتړ او پيوستون اعلانوو:
• مونږ پر غزه د اسراییلو د وحشیانه تیري په مقابل کی د فلسطین مسلمان ملت ملاتړي یو.
• اسراییل دې د فلسطین ټولې غصب شوې ځمکې زر تر زره فلسطینیانو ته پریږدي.
• د مسلمانانو په لمړۍ قبله یعنی بیت المقدس د یهودو کرغیړن نیواک نشو زغملی.
• پر غزه باندی د یهودو د تیري په مقابل کی د تش په نامه د بشر حقوقو سازمانونو چوپتیا په کلکه غندو.
• پر غزه باندې د یهودو ظالمانه تیري په هکله د ملل متحد د امریکا د لاس پوڅې ادارې دریځ په کلکه غندو.
• د غزې د ناورین په قابو کولو کی د مصر، ترکیی او قطر د موقف او هلو ځلو قدر داني کوو.
• د اسلامي کانفرانس نه د اسراییلو د دې ناروا تیري په مقابل کی د جدي غبرګون غوښتنه کوو.
• عرب لیګ نه مو غوښتنه ده چی د فلسطین مظلوم ملت سره خپل هر اړخیزه ملاتړ اعلان کړي او د اسراییلو وحشیانه تیری په جدي ټکو وغندي.

دغه پریکړه لیک د غونډې ټولو ګډونوالو لخوا د لاس په پورته کولو سره تایید شو.

غونډه د مفتې عبدالستار په اختتامیه دعا پای ته ورسیده. د یادونې وړ ده چې د غونډې د ګډونوالو له لورې د غونډې په جریان کې په زړه پورې شعارونه (مرګ په امریکا، مرګ په اسراییلو، زنده باد افغانستان، زنده باد فلسطین……) ورکول کیدل.