دخیبر پښتونخوا په تیمرګره کې دتفسیر دورې

اصلاح آنلاین/پیښور: د تېمرګرې د جمعيت اصلاح د ساحوي دفتر له خوا  په تېمر کېمپ کې د خويندو او وروڼو لپاره د تفسير جلا جلا دورې وشوې.

د خيبرپښتونخوا د تېمرګرې د سيمې د تېمر کېمپ څخه (چې تر اوسه يو زيات شمېر افغان مهاجرين په کې اوسيږي) په رارسيدلي راپور کې ويل شوي دي چې د شعبان د مياشتې له 21 څخه تر 27 نېټې د رمضان المبارک پورې هلته د خويندو لپاره د تفسير شريف دوره وشوه .

دغه دوره د محترم ورور استاد الحاج محمد وکيل صادق د جمعيت اصلاح د مهاجر زون د تېمرګرې د ساحوي دفتر د مسئول په زیار جوړه شوه .

دوره د معاذ بن جبل رضي الله عنه په مدرسه کې وه دخویندو لپاره ددتفسیر درس داغلى مفسرې خور مسلمې صادق پر غاړه وه چې سږ کال د لوې دورې څخه فارغه شوې وه .

دوره هره ورځ د سهار له ۷ بجو څخه د غرمې تر يوې بجې پورې دوام درلود چې د مهاجرينو د کېمپ خويندو هره ورځ له 450 څخه تر 500 تنو پورې شرکت کاوه او په وروستۍ ورځ تر اووه سوه پورې خويندې راغلې وې او د کېمپ فضا په قرآني انګازو ښايسته وه، چې د هجرت د ټول 33 کلن دور څخه جلا کيفيت خپور وو.

خلکو ډېره خوښي ښکاره کوله ځکه په دې کېمپ کې دا لومړنى دقرآن دتفسیر دوره وه چې د خويندو لپاره په څه باندې يوې مياشت کې د رمضان په مبارکو ورځو کې وړاندې شوه.

يقيناً هلته د کېمپ فضا بدله بدله ښکارېده د ښځو په مينځ کې يو روڼ قراني بدلون محسوسېده، د کورنيو له قرآن سره تړاو مضبوط شو او کورنۍ په قرآن منورې شوې، قرآني پوهې کور ته لار ومونده او خويندو دا هوډه کاوه چې نور به خپل اولادونه له قرآن څخه غافل او بې خبره نه پرېږدي.

همدارنګه محترم استاذ دکتور محمد حکيم صابر صاحب هم د کېمپ په يوه جومات کې د قرآن کريم او تفسير دوره د شعبان مياشت کې پيل کړه چې د حاضرو کسانو نه علاوه کور کور ته د لوډسپيکر په ذريعه د تفسير غږ رسېده او خلکو په ډېرې توجه سره په دې درس کې ګډون وکړ چې د زياتو تفصيلې بحثونو له کبله دوره اوږده شوه چې لا هم روانه ده.