په کندهار کې د جمعیت اصلاح ځوانان په رحله ووتل

راپور: احسان الله

په کندهار کي د جمعيت اصلاح د سيمه ائيز دفتر د ځوانانو څانګي لسګونه تنه ځوانان د سرطان د مياشتي په ۲۳ نېټه د جمعې په مبارکه ورځ د کندهار ښار جنوب لور ته په يوه ديني رحله ووتل.

په دغه رحله کې د جمعیت اصلاح د ځوانانو څانګې ترڅنګ، د اصلاح پیغام کاري ټیم دجمعیت اصلاح همکارانو او همفکرانو هم برخه درلوده ، سهار مهال اته بجي د خپل ټاکلی هدف په لور چي د کندهار ښار جنوب لور ته د محله نجات په سيمه کښي وو وخوځېدل.

هلته تر رسېدو او ځای پر ځای کېدو وروسته رحله د ګل احمد هاتف لخوا د قرانکريم په مبارکو آيتونو سره پيل شوه ورپسې د رحلې مسؤل احمد هجرت مشعل د رحلې د نظم او د قوانينو په هکله ځوانانو ته لارښوني وکړې.

د رحلي د مسئول مرستيال او د رحلې وياندوی ګل احمد هاتف هم په خپل وار سره ځوانانو ته د رحلي اهميت او عامو ميلو او تفريحاتو سره ه هغې فرق په ګوته کړ هغه زياته کړه چي په نورو تفريحګانو او مېلو کښي خلک او ځوانان خپل وخت عبس بې ځايه او حتی په ګناهونو کي تېروي په داسي حال کښي چي زموږ هدف هم تفريح کول دي، ولي موږ په خپلو تفريحاتو کښي هم دين ته پوره ځای ورکړی دی او دلته به هم څه لږ اندازه د بيدارۍ درسونه وي او هم به سالمه تفريح تر سره کړو ګل احمد هاتف داصلاح خصوصي ليسې مدير جلال الرحمن شرر ته بلنه ورکړه تر څو په ټولنه او دعوت کښي د ځوانانو مسؤلیتونو تر عنوان لاندي درس وړاندي کړي شرر صاحب په ډېر لنډ او هر اړخيز ډول نوموړی درس وړاندي کړ.

د درس څخه وروسته د چايو څښلو وقفه راغله چي په همدې ترڅ کښي ځوانان يو له بل سره معرفي شول. د وقفې سمدستي وروسته ځوانان په دريو ګروپونو وويشل سول پر ګروپونو د ويشل کيدو څخه وروسته د آزادي تفريح وخت راورسيد او ځوانانو د ۳۰ دقيقو لپاره تفريح وکړه.

د تفريح په تعقيب هاتف ورور احسان الله ته بلنه ورکړه تر څو فرهنګي مسابقه وړاندي کړي فرهنګي مسابقه هم په ډېر ښه شان سره تر سره شوه د مسابقې وروسته د کندهار د جمعيت اصلاح د ځوانانو د څانګي مسؤل صفی الله جوهر لخوا په اسلام کې د وخت د ارزښت تر عنوان لاندي يو کوچنی او هر اخيز درس وړاندي شو د درس څخه وروسته د ګروپونو تر منځ د رحلې د سپورت برخې مسؤول ډاکترحبیب الرحمن همت لخوا د رسۍ کشولو ورزشي مسابقه تر سره شوه چي په تعقيب يې ډوډۍ او د جمعې لمونځ په سيمه ئيز مسجد کي تر سره شو.

د لمانځه تر ادايني وروسته د ګروپونو تر منځ مشاعره په لاره واچول شوه چي ځوانانو په ډېر شوق سره پکښي برخه واخيسته د مشاعرې د پاي ته رسیدو سره سم صفي الله جوهر دعوتي ورکشاپ وړاندي کړ په ورکشاپ کښي جوهر صاحب د ځوانانو ته دوې پوښتني مخي ته کښېښودې، لمړی: افغانانو د نړی په تاریخ کې له ډیرې سترې قرباني ورکولو سره سره هم په دې ونه توانیدل چې اسلامي حکومت جوړ کړي، علت په څه کې وو؟ دوهم: د اوسنی عربي نړی د کامیابی راز (عربي بهار) په څه کې دی؟ چې د رحلې ګډونوالو هم د خپل فکر مطابق خپل نظرونه وړاندي کړل. د ورکشاپ تر خلاصيدو وروسته د ډاکترصاحب حبیب الرحمن همت له لوري يوه کوچنۍ تفريحي مسابقه وشول چي په همدې سره رحله د پای شېبو ته نژدې سول او په همدې ډول رحله د صفی الله جوهر په دعائيه سره پای ته ورسيدل.