د جمعیت اصلاح افغانستان د مکرویانو څانګې استالف ته رحله وکړه

محمد مدثر اسلامي
د جمعیت اصلاح افغانستان د مکرویانو څانګې ځوانان د پنج شنبې په ورځ د ستالف تخت ته په رحله تلي و. رحله چې د پنج شنبې په ورځ سهار له مکرویانو پیل شوه، شپیتو تنو پکې برخه اخیستې وه. په لاره فرهنګي او تفریحي برنامې وشوې.

د ستالف تخت ته له رسیدو سره سم ځوانان په بیلابیلو ګروپونو وویشل شو او هر یوه ګروپ د خپل مشر تر نظر لاندې چارې په مخ بیولې. په څو شیبو کې د ناستې ځای جوړ شو او ورپسې جوخت تعارف پیل شو. د تعارف په پیل کې مولوي منیر د قرآن او سنتو په رڼا کې د تعارف ارزښت وڅیړه او بیا هر ورور په نوبت خپل ځان معرفي کړ. له تعارف وروسته د جمعیت اصلاح افغانستان د مکرویانو څانګې غړي ډاکټر همایون لودین ځوانانو ته جمعیت اصلاح افغانستان وروپیژنده او د رحلې موخه یې بیان کړه.
د ښاغلي لودين له وینا وروسته په لږ ځنډ کې چای وڅښل شو. ورپسې د جمعیت اصلاح افغانستان د مکرویانو څانګې غړي حمدالله فایق د ټولنیز کار د ارزښت په اړه لنډ درس وړاندې کړ. ښاغلي حمدالله فایق پدې تاکید درلود چې د دعوت کار نظم او ټولنیزو هڅو ته اړتیا لري. د فایق په وینا که په یواځې ځان ډیر لوی کار هم وکړه د یوه وړوکي ټولنیز کار ځای نشي نیولی.
تر ډوډۍ مخکې بیلابیلې فرهنګي مسابقې او لوبې ترسره شوې. د سیرت مسابقه، د کیک خوړلو، په خوله د چاکلیټ رانیولو، رسۍ کشولو، او هګۍ نیولو مسابقو ګډون کوونکو د څو شیبو لپاره خوشاله کړل.
بیا ډوډۍ وخوړل شوه او په ازاده فتره کې ځوانان د سین غاړې ته ولاړل او لامبو یې وکړه. د ماسپښین له لمانځه وروسته د توتو او امونو خوړلو پرواګرام و. د رحلې هره شیبه نه هیریدونکې وه.
سیمې ته چې کوم خلک په چکر راغلي و، هغوی هم د استادانو د درس په اوریدو ټول راټول شول او له مونږ سره یې یو ځای درس واوریده. تر ټولو په زړه پورې شیبه خو هغه وه چې ځوانانو د رحلې د لګښتونو د پوره کولو لپاره د مرستې په صندوق کې لاسونه ښکته کول. نږدې مازیګر رحله په دعا پای ته ورسیده.