د کارته نو ساحوي دفتر رحله وکړه

د جمعيت اصلاح افغانستان د کارته نو ساحوي دفتر خپل علمي سير د (فکر او عمل) تر شعار لاندې د ۱۳۹۱لمريز کال د چنګاښ په ۹مه د جمعې په مبارکه ورځ، ترسره کړ.

په دې علمي سير کې د کارته نو ساحوي دفتر پر غړو او همفکرانو سربېره، د کارته نو او شاوخوا سيمو علماوو، مشرانو او ځوانانو، چې شمېر يې شاوخوا ۱۵۰ تنو ته رسېده، ګډون کړی وو، درحلې ځای د کابل ولايت اړوند د ګلدرې ښکلې او زرغونه ولسوالي وه.

د سهار په اوه نيمو بجو، ټول وروڼه د کارته نو درېيم سړک د خالد بابا جومات ته راټول او له هغه ځايه د لا ښه تنظيم له پاره په پنځو ګروپونو ووېشل شول، چې هر ګروپ ته يو مسؤول هم وټاکل شو. هر ګروپ خپل اړوند موټر ته په منظم شکل ولاړ او د سفر ددعا په ويلو سره يې خپله رحله د سهار په اته نيمو بجو پيل کړه. په لاره کې په هر موټر کې له وخت څخه د ښې استفادې په موخه ذهني سيالۍ ترسره شوې.

د جمعې له لمانځه او د غرمې ډوډۍ له خوړلو وروسته، رحله د قرآن کريم د څو مبارکو آيتونو، چې د قاري صاحب شفيع الله له خوا ولوستل شول، په رسمي ډول پيل شوه.

ورپسې شيخ القرآن مولانا عبدالصبور، چې له نېکه مرغه په دې رحله کې يې ګډون کړی ؤ، د رحلې ګډونوالو ته خپلې ارزښتناکې څرګندونې وکړې.

مولانا عبدالصبور د فکر جوړونې، ځان جوړونې او تنظيم، د ټولنې اصلاح، انقلاب امامت او د نړۍ استادي په لاس کې نيولو په اړه مفصل او هراړخيز معلومات وړاندې کړل.

نوموړي ټول او په ځانګړي توګه ځوانان د پوهې او تخصص پيداکولو په لور وهڅول او زياته يې کړه: که غواړو ځانونه او ټولنه اصلاح کړو، نو بايد علم ترلاسه کړو او هر يو تن د يوه تخصص خاوند شي. مولانا د خپلو خبرو په پای کې د ګډونوالو پوښتنو ته قناعت بښونکي ځوابونه هم ورکړل.

ورپسې د کارته نو ساحوي دفتر غړي دوکتور محمدعارف عطايي خبرې وکړې چې په هغو کې يې نظم، سمع او طاعت او ځينو نورو اړينو او مهمو ټکو ته اشاره وکړه او زياته يې کړه، چې د رحلې يوه مهمه موخه په افرادو کې د يادو شويو اساساتو دودول او عملي کول دي.

له دې وروسته د بېلا بېلو وروڼو له خوا ذهني مسابقې، تفريحي پروګرامونه ترسره شول، دغه راز هغو ماشومانو چې په دې رحله يې ګډون کړی وو، يوه ښکې تمثيلي ټوټه وړاندې کړه.

 د مازديګر د لمانځه له ادا کولو وروسته، د جمعيت اصلاح د کارته نو ساحوي دفتر مسوول دوکتور قاري فصيح الله په خپله اختتاميه وينا کې د رحلې ګډونوال د الله تعالی په مخلوقاتو کې فکر او تامل کولو ته وهڅول او ويې ويل: د الله تعالی د لارې لارويان له لوړو او مستحکمو ونو څخه دا درس اخلي، چې هغوی به هم په لوړو ارادو او مستحکمو قدمونو د دين په لاره کې ګامونه اخلي. په رحله کې په عملي ډول ايثار، نظم او د خدمت کولو احساس له انسان سره پيدا کېږي.

نوموړي د کارته نو او شاوخوا سيمو له ټولو هغو مشرانو او ځوانانو څخه مننه وکړه، چې په دې علمي سير کې يې په پوره دلچسپۍ او نظم ګډون وکړ. هغه له ټولو ژمنه واخيسته، چې د کارته نو په سيمه کې به د خپلو ځانونو او ټولنې د اصلاح له پاره سره لاسونه يو کوي او په ګډه به د اسلام د مبارک دين د اساساتو او د وګړو د اصلاح او اخلاقو د سمون له پاره له هېڅ ډول همکارۍ درېغ نه کوي او په دغه کار به د جمعيت اصلاح له ټولو وروڼو سره په پوره اخلاص اوږه په اوږه ونډه اخلي.

ورپسې هغو ځوانانو ته چې په دې رحلې کې يې فعاله ونډه اخيستې وه او مسابقو کې ګټونکي اعلان شوي وو، ډالۍ ورکړل شوې. دغه راز کله چې د رحلې د مصارفو له پاره د اعانې غږ وشو، نو ټولو ګډونوالو په پوره اخلاص مرسته وکړه او (١٢٦٧٧) افغانۍ راټولې شوې.

دا رحله د مولوي عبدالصبور عربي د دعا په ويلو سره پای ته ورسېده او هر ګروپ په منظم ډول د خپل موټر په لور روان شو.

راپور : محمداصف احمدزی