د وردګو او میدان ولایت جمعیت اصلاح دوه ورځنی سیمینار دایر کړ

راپور: ذبیح الله حلیم
د د ميدان او وردګو ولايت ولايتي کميسيون د جوزا د میاشتې په ۱۹ او ۲۰ مه نیټه د يوه دوه ورځني تربيتی او تعريفی پروګرام کوربه وو، چی د ميدان او وردګو ولايت اړوند د جمعيت اصلاح غړيو، همکارانو او همفکرانو پکی ګډون درلود.

پروګرام د روان کال د غبرګولی د مياشتی په ۱۸ نيټه  د مازیګر په څلورو بجو پیل او د جمعی ورځی تر ۱۱ بجو پوری یی دوام وکړ. پروګرام د قرانکریم د مبارکو آیتونو په تلاوت سره پیل شو د تلاوت وروسته د پروګرام لمړی ویناوال د جمعیت اصلاح محترم ريس دوکتور عبدالصبور فخری وو، محترم استاد برخه والو ته د جمیت اصلاح مفصله معرفی وکړه او د جمعیت اصلاح په بیلابیلو پروګرامونو، برنامو او پلانونو یی رڼا واچوله، محترم استاد د خپلو خبرو به ترڅ کی دی ته اشاره وکړه چی جمعیت اصلاح د ټولنی له تل نه راټوکیدلي غورځنګ دي او هیڅ راز بهرنې منشآ نلری. همدارنګه استاد زیاته کړه چی جمعیت اصلاح په مستمر او دوامداره کار باور لری او تل یی د شعارونو پر ځای عمل ته خپل مټی رانغښتی دی. په پای کی محترم استاد د جمعیت اصلاح په مالی اړخ رڼا واچوه او په دی اړه یی ګډونوالو ته هر اړخیز معلومات وړاندی کړل.

د مازیګر د لمانځه له ادا کولو وروسته د پروګرام د ګډونوالو تر منځ  تعارف او پيژندګلوی تر سره شوه.
د پروګرام دوهم ویناوال د جمعیت اصلاح  د اداري ټیم غړی او د سلام پوهنتون استاد دوکتور مصباح الله عبدالباقی وو، استاد د ټولنیز کار پر اړتیاوو او ځانګړنو حاضرینو ته هر اړخیزه درس وړاندی کړ، ګډونوال یی دی ټکی ته متوجه کړل چی په ټولنه کی تغیر او بدلون د ټولیز کار په نتیجه کی منځ ته راتلای شی او د دین د غلبی لپاره یوازی ذهنی قناعت بسنه نه کوی بلکې خوځښت او حرکت ته اړتیا لری. محترم استاد دغه ځانګړتیاوې (د اسلام نه سمه پوهه درلودل، د دین په احکامو او اوامرو التزام، ولاء او محبت درلودل، جدیت، تسامح او شفقت او بالاخره اعتدال او وسطیت) د هغه کسانو له پاره اړینې وبللې چی په ټولنه کی مثبت بدلون راوستل یی د ژوند هیله ګرځولې ده.
د ښاغلي استاد درس د ګډونوالو په تعلیقاتو او پوښتنو سره پای ته ورسید.

د پروګرام د لمړۍ ورځې وروستۍ موضوع یوه ګروپی کار یا ورکشاپ ته ځانګړی شوی وه چی په هغه کی په میدان او وردګو ولایت کی د دعوت لپاره فرصتونه، ستونزې او حل لارې وڅیړل شوې.

د پروګرام دوهمه ورځ د سهار د لمانځه له ادا کولو وروسته  په جماعی ډول د کهف سورت په تلاوت سره پیل شوه، وروسته بیا د قرآن درس د سلام پوهنتون د استاد مولوی وزیرمحمد سعیدي لخوا وړاندې شو چی د درس عمومي موضوع یی په ورځنیو چارو کی د الله جل جلاله او د هغه د رسول صلی الله علیه وسلم اوامرو او ارشاداتو ته جدي پاملرنه وه، استاد د خپل قرآني درس په اوږدو کې د حاضرینو توجه دې ته هم راواړوله چې مسلمانانو ته باید د الله او د هغه د رسول احکام  اوامر او ارشادات تر بل هر څه وړاندیوالی ولري، هغه وخت به بیا الله پاک مونږ له دغه ځوریدلي حالته خلاصوي، د دنیا او آخرت سرلوړي، د عزت او ښیرازۍ  ژوند به را په برخه کوي.

د دوه ورځني پروګرام وروستۍ برنامه هم د میدان او وردګو ولایت د علماوو، سپین ږیرو، جهادی او مطرح شخصیتونو په حضور کې پرمخ ولاړه. دوی ټولو د جمعیت اصلاح له برنامو او پروګرامونو خوښي څرګنده کړه او لا یې د دې ډول پروګرامونو او برنامو د پراخیدو غوښتنه کوله، دوی د جمعیت اصلاح د پروګرامونو په پلي کولو کې د هر راز همکاريو ژمنه وکړه. په دې برخه کې د جمعیت اصلاح د مرکزی شورا ریس استاد نصیراحمد نویدی، قاضی محمدحسن اسلامی، دوکتور عبدالباقي امین او انجنیرصاحب نجیب الله امیری په خپلو وارونو د جمعیت اصلاح په پیژندګلوۍ، په وردګو کی د جمعیت اصلاح دپروګرامونو په تنظیم او لاګړندي کولو، د جهودو په همغږي کولو او ځینی نورو موضوعاتو ګډونوالو ته ویناوی وکړی.

د برخه والو په استازیتوب هم سرمعلم صاحب خوانی خان، مدیرصاحب عبدالفتاح خان او چکوال صاحب په خپل وار خبرې وکړې او د جمعیت اصلاح سره یی د هر راز همکاريو ژمنې وکړی.
په پاي کی د پروګرام په ګډونوالو غږ وشو تر څو په وردګو کی د جمعیت اصلاح د پروګرامونو د لا ښه توب لپاره مالي مرستې وکړي، چی وروسته بیا هر چا د خپل وس مطابق همکاري او مرسته وکړه.
نوموړی دوه ورځنی تعریفي او تربیتي پروګرام د جمعی په ورځ د سهار په ۱۰:۳۰ بجو د قاضی محمد حسن اسلامی په دعایی سره پای ته ورسید.