په کندهار کې د کوچنیانو لپاره یو ورځنی تربیوي پروګرام ترسره شو

راپور: صفی الله جوهر
تخم له کرلو وروسته پرلپسې څارنې او روزنې ته اړتیا لري، د همدې مقصد لپاره د کرنې دعلم پوهان د نیالګي لمړني درې کاله څارنې ته د تریننګ مرحله وايي، پدې وخت کې د نیالګي چوکاټ جوړیږي او له غیرمناسبې ودې څخه یې مخنیوی کیږي، او که په دغو درې کلونو کې ورته سمه پاملرنه ونه شي، نو بیا ډیر کار ته اړتیا لري چې سم حالت ته راوګرځول شي، په همدې توګه انسانان هم کلونه کلونه روزنې ته اړتیا لري، تر څو د ژوند کولو چوکاټ یې یو مناسب چوکاټ شي، او مسؤلیتونو او دندې په سمه توګه وپیژني، د همدې مقصد لپاره د افغانستان جمعیت اصلاح دکندهار سیمه ایز دفتر دځوانانو څانګې د کلني پلان پر اساس د جمعې په ورځ د کوچنیانو د سالمې روزنې لپاره یو ورځنی تربیوي پروګرام جوړ کړی وو، تر څو دغه سپینې پاڼې چې تر بل هر وخت اوسمهال ډیرې پاملرنې ته اړتیا لري په درست او سالم فکر وروزي.

د پروګرام پیل اود مینې هرکلی
کوچنیان د اختر او یا نورو خوښیو لپاره ډیر خوشحاله وي، ان چې دشپې مهال خوب هم نه کوي، دسهار لمانځه څخه وروسته ټاکل شوي ځای ته په ډیره مینه ماشومان ډلې ډلې راورسیدل او د پروګرام پیل ته یې په بې صبرئ سره انتظار کاوه، په ټاکل شوو ګروپونو وویشل شول او په منظم شکل سره ودریدل، د (الله اکبر ولله الحمد) شعارونه یې په ډیر خوند او جذبې سره زمزمه کول، ټول کوچنیان په دوه ګروپونو ویشل شوي وو، چې لمړی د (محمدبن قاسم) ګروپ وو، چې د ګروپ مسؤول ښاغلی قاری عبدالمعزاسلامي ټاکل شوی وو او دوهم ګروپ د (صلاح الدین ایوبی) ګروپ  چې مسؤول یې استاد قریب الرحمن سعید انتخاب شوی وو، د پروګرام عمومي مسؤول انجینرصاحب محب الله حقمل وو.

نابغه استعدادونه:
په دغه پروګرام کې ټول کوچنیان په فعالیتونو کې ښه و ځلیدل خو ځینې تر نورو د ډیر نابغه استعدادونو لرونکی وو، صفی الله نهه کلن کوچنی چې د ډیرې بااستعداده کورنئ پورې اړه لري په زړه پورې معلومات شریک کړل، احسان الله د مولوی صاحب عصمت الله زوی هم په خپلو ویناؤو کې ډیرو باریکو ټکو ته اشاره کوله، د اصلاح لیسې د صفر صنف زدکوونکی مزمل چې د څلور نیمو کلونو وو نه مننوونکی وړتیاوې لرلې په ډیر کم عمر کې  د دروند خوی څښتن دی، د محمدالله بابی زندانی صاحب ځوی سوری د تکبیر جذباتي نعرو خوږې انګازې خپرولې او په ډیرو مسابقو کې یې لمړی مقام ترلاسه کړ، د استاد حسین خیل صاحب ځوی سباوون د روڼ سباوون په شان ډیرو مسابقو برخه واخیسته او د جایزو ګټونکی شوو تر ټولو یې زیات د قرانکریم حفظ کړی وو.

لنډ درس او د سیالیو پیل
ښاغلی استاد محمد شفیق صادق کوچنیانو ته لنډ درس وړاندې کړه، او دصحابه کرامو لنډې کیسې یې ورته ووارولې چې کوچنیان ډیر په خوند سره غوږ وو، ښاغلی استاد یادونه وکړه چې تاسو د سبا مشران یاست، او مسؤلیتونه به درسپارل کیږي، په خپلو درسونو کې هڅه وکړئ او دمشرانو احترام کوئ له درس څخه وروسته سیالئ پیل شوې، چې کوچنیانو په خورا دلچسپئ سره برخه واخیسته او د ډالیو ګټونکي هم شول.

تربیوي درسونه:
نمونوي اودس او د ضحی لمونځ: د استاد فضل الرحمن لخوا کوچنیانو ته یو نمونوي اودس وکړل شو تر څو په ښه شکل اودس وکړي، او په سنت طریقې سره اودس زده کړي، چې تر دې وروسته ټولو کوچنیانو په همدې طریقه اودس وکړ او ځینو د دوهم ځل لپاره اودس تشریح کړ، چې وروسته د کوچنیانو ته د ضحی لمونځ تشریح او عملا ټولو د ضحی لمونځ اداء کړ.
تعارف: د کوچنیانو ترمنځ تعارف وشو، چې ټولو کوچنیانو خپل ځانونه معرفي کړل
د میږیانو فلم: د حضرت سلیمان علیه السلام د قصې پر اساس د میږیانو ډیر جالب فلم وښودل شو، چې کوچنیانو ته ډیر په زړه پورې وو.
دنابغه ماشومانو تقریرفلم او مسابقه: د اسلامي نړئ د نابغه ماشومانو فلم وښودل شو، چې تر دې وروسته کوچنیانو ترمنځ د خطابې مسابقه وشوه، چې واقعا ډیر په زړه پورې او حیرانوونکې وه.
د ترانو مسابقه: د ترانو مسابقه هم ترسره شوه، چې ډیرې په زړه پورې ترانې تقدیم شوې.
د سورتونو او دعاوو مسابقه: کوچنیانو سورتونو ولوستل او ښه تلاوت کوونکی ته ډالئ ورکړل شوه، همداراز د مسنونه دعاګانو سیالئ هم ترسره شوه.
دجعیت اصلاح لنډه معرفی او فلمونه: کوچنیانو ته جمعیت اصلاح په لنډ ډول وروپیژندل شوه او د جمعیت اصلاح د فعالیتونو لنډ فلمونه وښودل شول.
د زنداني صاحب په زړه پورې وینا: ښاغلی محمدالله بابی زندانی چې تر نورو ډیر د کوچنیانو په ژبه پوهیږي په ډیر جالب ډول عبرتناک قصه وکړه او دوی یې خپلو کړنو ته متوجه کړل.

د پروګرام پای:
د جمعې لمونځ په جماعت سره له اداء کولو وروسته پروګرام پای ته ورسید، او ټول کوچنیان له ډیرو خوږو خاطرو سره خپلو کورونو ته ستانه شول، دیاونې وړ ده چې په دغه پروګرام کې تقریبا پنځه ویشت کوچنیانو برخه اخیستې وه.