د ( افغاني ټولنې ستونزې او د حل لارې ) تر سرلیک لاندې پروګرام ترسره شو

جمعیت اصلاح تل زیار باسي چې د ګران هیواد د ستونزو د حل لارو لپاره ګڼ شمیر پروګرامونه ترتیب کړي ، د همدغو هڅو په لړ کې د اسلام آباد جمعیت اصلاح د (د افغاني ټولنې ستونزې او د حل لارې) تر سرلیک لاندې پروګرام ترتیب کړ چې د اسلام آباد نړیوال اسلامي پوهنتون او د نمل پوهنتون څخه ګڼ شمیر محصلینو پکې ګډون درلود.

پروګرام د پوهنتون په انګړ کې د ماښام لمانځه څخه وروسته د محترم قاري هارون الرشید لخوا د سپیڅلي قرآن د څو مبارکو آیتونو په تلاوت سره پیل شو ، د ویاندویي چارې ورور حمزه مومن حکیمی پر مخ بیولې.

نوموړي خپله پیلیزه وینا واوروله او بیا یي د پروګرام میلمه د نګرهار اسلامي پوهنتون استاذ ښاغلې شیرزاد عزیزي ورونو ته ور وپیژاند.

محترم استاذ د الله(ج) د حمد او ثناء څخه وروسته د سپیڅلي قرآن د دغه آیت (إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ…..) په اورولو سره خپله وینا پیل کړه.

استاذ وویل چې : په افغانستان کې د ستونزو لړۍ له اوږدې مودې دا هیسې روانه ده چې تل یي افغاني ټولنه د تباهۍ او نابودۍ کندې ته غورځولې ده.

استاذ زیاته کړه : ځني هاغه ستونزې چې مونږ ورسره مخ یو عبارت دي له  جهل او ناپوهۍ ، دهیواد په هر ډګر کې د استعمار موجودیت ، د افغانانو تر مینځ بې اتفاقي ، فقر او بیوزلي او په ډیره کچه د تعصب موجودیت دی.

استاذ محصلین خپلو مسؤلیتونو ته متوجه کړل او د ټولنې په جوړیدو کې یي د هغوي رول په ګوته کړ.
نوموړي د نصیحت په توګه وویل چې : د ټولنې ستونزې ځوانان پیدا کوي او همدا ځوانان یي حل کوي او د دغو ستونزو حل لاره همدا ده چې په دې اړه غور او فکر وکړو او د حل لارې یي وڅارو.

استاذ زیاته کړه چې : مونږ باید په ګران هیواد کې د عدل ، انصاف او یواولي نظام را مینځ ته کړو ، نن مو په هیواد کې د ژبې ، قوم ، سمت او مذهب پر اساس د ملت د ویشلو هڅې کیږي ، په دین کې د افراط او تفریط درسونه او غونډې جوړیږي په داسې حال کې چې هیواد مو د بې سوادۍ په تیارو کې ډوب دی ، په کلتور او ثقافت مو د خدمت تر عنوان لاندې بریدونه کیږي ، نو مونږ ته اړینه ده چې د علم د خپرولو او ستونزو حل ته په متحد ډول ملا وتړو.

پروګرام د محترم قاري صاحب حمیدالله نجیب د جمعیت اصلاح اسلام آباد مسول په اختتامیه وینا او دعا سره پای ته ورسید.
راپور : محمد ابرار