په کونړ کې د سیرت سيالۍ پای ته ورسيدې

د جمعیت اصلاح د کونړ د څانګې په نوښت ددغه ولايت په دوه ولسواليو نرنګ او څوکۍ کې د سيرت سيالۍ پاي ته ورسيدی، او د پاي په غونډو کې يې په سلګونو ځوانانو، متعلمينو او محصلينو د ديني مدرسو طالب العلمانو، علمای کرامو او د سيمې مشرانو برخه واخيسته.

پدغه سياليو کې نارينه او ښځينه زده کوونکو برخه اخيستې وه، دوي ټولو ته د لوستلو لپاره دسيرت کتاب ورکړل شوی وو او بيا په هم هغه لوستل شوي کتاب کې سوالونه جوړ او د لوستونکو لخوا ورته ځوابونه ورکړل شول.

د جمعیت اصلاح د کونړ د څانګې د نشردعوت مسؤول قاضي رحمت الله حيدرزی چې دغه سيالۍ يې تنظيم کړی وی وویل چې په دغه سياليو کې د نرنګ ولسوالۍ د کوټکي د کلي د نسوانو د ليسې شپيته تنه زده کوونکو خويندو، او د نرنګ د ذکورو د مرکزي ليسې یوسل ديرشو تنو زده کوونکو برخه اخيستې وه، د نرنګ د سيالۍ د پاي په غونډه کې د جمعیت اصلاح د شرقي زون رئيس دکتور نجيب الله صالح او د نهاد جوانان مسلمان (نجم) رئيس دکتور رحمت الله زاهد د غونډې ګډونوالو ته خپلې ويناوې واورولي، او د سيرت د دورو اهداف او د جمعيت اصلاح د بيلا بيلو پروګرامونو موخې يې بيان کړی.

د پروګرام په پايله کې د نرنګ ولسوالۍ د معارف مدير د جمعيت اصلاح سره خپله هر اړخيز ملاتړ څرګند کړ او زياته يې کړه چې د نرنګ د ولسوالۍ ټولې تعليمي ادارې د جمعيت اصلاح د پروګرامونو پر مخ خلاصې دي او مونږ هر راز همکارۍ ته اماده يو.

ددغه ولايت په بله ولسوالۍ څوکې کې هم ورته سيالي ترسره شوه چې پکې پنځه اتیا تنه ځوانانو برخه اخيستې وه، د دغه سيالۍ د پاي غونډه د  ثور په دیارلسمه نيټه د چهارشنبې په ورځ د څوکې د بازار په جامع جومات کې ترسره شوه، چې سوونه ګډونوال يې درلودل، د پاې غونډې ته د نهاد جوانان مسلمان (نجم) د رئيس دکتور رحمت الله زاهد پرته د جمعیت اصلاح د کونړ د څانګې مسؤول قاري احمد عثمان، د نشردعوت مسؤول قاضي رحمت الله حيدرزي، د څوکې د دارالعلوم مدير مولوي صیب عمرخان، د څوکې د جمعيت د ليسې مدير او د نوموړې مدرسې يو شمير علماؤ خپلې ويناوې واورولې.

د نجم رئیس د کتور رحمت الله زاهد په خپلو خبرو کې د جمعيت اصلاح د کونړ د څانګې د ټولو مسؤولینو څخه د دغه پروګرام د تنظيم او ترتيب له امله او د څوکې د دار العلوم د مدیر، او استاذانو او د څوکۍ د معارف مديریت د کارمندانو، علمای کرامو او مشرانو څخه د پوره همکارۍ له امله مننه وکړه، او په خپلو خبرو کې يې د جمعيت اصلاح په اهدافو، پروګرامونو، او مرام باندې رڼا واچوله او هم يې ځوانان، متعلمين، محصلين او دديني مدرسو طالب العلمان ئې د نهاد جوانان مسلمان (نجم) د پروګرامونو څخه ګټه اخيستلو ته وهڅول، د پروګرام په پایله کې د سيالۍ په برخه والو باندې جوائز توزیع شول.