په کارته نو کې د قران پوهنې ستره دوره پيل شوه

د کابل ښار په سيد نورمحمد شاه (کارته نو) سيمه کې د قرآن پوهنې ستره غونډه د غويي په ١٦مه، سهار مهال د کارته نو او شاوخوا سيمو د سلګونو په دين مينو خويندو او وروڼو په ګډون جوړه شوه.
دغه شانداره غونډه، چې د جمعيت اصلاح د کارته نو ساحوي دفتر د غړو او همکارانو په ګډون د خپلو دعوتي او تربيتي پروګرامونو په لړ کې پيل شوه، د غويي مياشتې تر ٢٢مې (جمعې ورځ) به هره ورځ سهارمهال له ٥:٣٠- ٧:٠٠ پورې دوام وکړي.

په دې قراني جشن کې شيخ القران مولانا عبدالصبور د يوې اونۍ لپاره په بېلابېلو ديني او قراني مفاهيمو باندې بحث کوي.

د غونډې لومړۍ ورځ د قران کريم د څو مبارکو ايتونو په تلاوت پيل شوه، بيا د جمعيت اصلاح غړي دوکتور محمدعارف عطايي د حديث شريف درس وړاندې کړ.

ورپسې شيخ القران مولانا عبدالصبور، په خپلو لومړنيو خبرو کې د دې سترې غونډې پر اهميت او ارزښت رڼا واچوله او زياته يې کړه، چې دا قراني جشن د يوه ځانګړي قوم، ژبې او سمت غونډه نه ده، بلکې دا د مسلمانانو غونډه ده؛ د هغه چا غونډه ده چې له قران کريم سره مينه لري او غواړي د قران کريم پر ارشاداتو او مفاهيمو ځانونه پوه کړي.

مولانا د غونډو ګډونوالو ته په خطاب کې وويل: تاسو نه د چا د خوشحالولو له پاره راټول شوي ياست او نه هم له چا څخه د تمې لپاره، بلکې د راټولېدو موخه او هدف مو يواځې او يواځې د الله تعالى رضا حاصلول او د هغه په کتاب ځانونه پوهول دي.

له دې مقدماتي وينا وروسته، شيخ القرآن مولانا عبدالصبور د غونډې پر لومړۍ موضوع، چې د قرآن کريم فضيلت او برکت ته ځانګړې شوې وه، هراړخيزه او مفصله رڼا واچوله.
نوموړي وويل، چې له دغسې قراني محفلونو او حلقو پرښتې راچاپېرېږي، ترڅو ورباندې رحمتونه او برکتونه رانازل کړي.

مولانا د غونډې ګډونوال د قرآن کريم فضيلتونو او برکتونو ته متوجه کړل او ويې ويل، چې قرآن کريم به د خپلو مينه وال شفاعت د اخرت په ورځ کوي.

ورپسې د (الفاتحې) او (الاخلاص) سورتونو ژباړه وشوه او د هغو دواړو سورتونو مفاهيم يې بيان شول.
مولانا عبدالصبور د خبرو په پاى کې د غونډې ټولو ګډونوالو ته کورنۍ دندې ورکړې، چې هر تن به سبا (د غونډې دوهمه ورځ) لسو تنو د دې قراني غونډې په اړه خبر ورکوي او دوه، دوه کسان به له ځان سره راولي. دغه راز د (السلام عليکم ورحمة الله وبرکاته) سنت راژوندي کولو په موخه ټولو ته دنده ورکړل شوه، چې له دې وروسته به د دې سنت په دودولو او پلي کولو کې پورته هڅه کوي.

د يادونې وړ ده، چې دا قراني جشن د سيد نورمحمد شاه (کارته نو) سيمې، درېيم سړک د سيد نورمحمدشاه لېسې ته مخامخ پارک کې جوړ شو او ٧ ورځې به دوام لري.