د ارزګان ولايت په لور دعوتي وفد

راپور: صفي الله جوهر
دافغانستان جمعیت اصلاح تر نامه لاندې ديني او دعوتي بهير هغه منظم کاروان دى چې د ټاکل شوو روښانه موخو په لور له منظم پلان او برنامې سره يوځاى حرکت کوي، د اسلام مبارک دين د سرلوړي او د هيواد هر اړخيز پرمختګ په لور نه ستړي کيدونکي هلې ځلې کوي، او داسلام ستر پيغمبر محمد صلى عليه وسلم په طريقه د اسلام لور ته دعوت او بلنه خپله اصلي فريضه بولي.
په کندهار کې د جمعيت اصلاح څانګې د ټاکل شوي کلني پلان پر اساس دا ځل د يو دعوتي شپږ کسيزوفد په توګه چې ګډونوال يې ( استاد محمدمزمل اسلامي، مديرصاحب جلال الرحمن شرر، انجينرصاحب محب الله حقمل، ډاکترصاحب حبيب الرحمن همت، قاري صاحب عبدالمعز اسلامي او صفي الله جوهر) وو د ارزګان محروم ولايت ته سر ورښکاره کړ، تر څو له دغه ولايت څخه چې له هر اړخ څخه محروم دي ليدنه وکړي، علماؤ، مشرانو او ځلميانو سره د زړه خواله وکړي او د اسلامي دعوت دروند پيټى سره شريک کړي.

د ارزګان ولايت لنډه پيژنده:
د کندهار ولايت شمال ختيځ لور ته موقعيت لري، چې اوسمهال شپږ ولسوالئ لري چې نومونه يې(ترينکوټ، چوره، خاص ارزګان، شهيد حساس، دهراوت او ګيزاب) دي.

مساحت يې (٢٢٦٩٦) کيلومتره مربع ته رسيږي چې تقريبا د څلورلکو په شاوخوا کې نفوس لري، له کندهار څخه ارزګان ولايت ته تللى سرک چې تقريبا ١٥٠ کيلو متره اوږدوالى لري، چې د پيل او پاى په برخه کې تر ډير حده پوخ دى مګر منځنئ برخه يې خامه او ډيره خرابه ده، ديادونې وړ ده چې د ارزکان ولايت ترينکوټ چې کڼ ميشتې سيمه ده، يواځې يوه ليسه فعاليت لري چې په دې لحاظ دغه ځوريدلى ولس د تعليم د خوګ نعمت څخه محروم دى.

د سفر پيل:

د پنجشنبې په ورځ (١٣٩١-حمل- ١٧) نيټې د سهار په شپږنيمو بجو له اجتماعي دعا لوستلو وروسته له کندهار څخه سفر پيل شوو، دسفر دعا وويل شوه او د ارزګان په لور روان شوو، د لارې په اوږدو کې مشاعره او نور تفريحي او روحي برنامې هم ترسره شوې.

سيلاب راوړي ماشومان:

د لارې په اوږدو کې په يو خړ او ګردجنه سميه د تيردو پر مهال نا څاپي ډول ښاغلي استاد محمدمزمل اسلامي صاحب د دې لپاره چې زمونږ پام ورواړوي وويل: هلته ګوري سيلاب له ځان سره ماشومان راوړي! په خړو خاورو کې په خاورو سپيره ماشومان په يو خوړ کې په لوبو بوخت وو، چې نه يواځې د پوهې او معرفت له خوږ نعمت څخه محروم وو بلکې د غربت نښې يې له ورايه ښکاريدې، چې په ليدو سره يې ډير خوابدي شوو.

ارزګان ته رسيدل:

تقريبا له درې نيم ساعت مزل څخه وروسته د ارزګان مرکز ترينکوټ ته ورسيدو، سفر ته له رسيدو سره سم له ګڼ شمير ځلميانو، علماء کرامو چې زمونږ د ورتګ لار يې څارله، ليدنه وکړه، پيژندګلوي مو چې د دعوت مهم اصل دى سره وکړه او دعوتي پلان مو سره شريک کړ.

له علماؤسره ليدنه:

ترينکوټ ته له رسيدو سره سم دهغه عالم روښنائي راته له ورايه ښکاره شوه چا چې په هغه ځاى کې د قرانکريم ترجمه پيل کړې وه او ګڼ شمير ښاريان يې ترجمې ته ورتلل، دغه عالم دترينکوټ ښار اوسيدونکى مولوي صاحب مفتي عبدالله وو چې په ډير فصاحت سره ېي د قران تفسير کاوه، له نږدې ورسره کيښناستو د زړه خواله مو ورسره وکړه، خپل فکر مو ورسره شريک کړ، چې زمونږ يې ډير تود هرکلى وکړ او د هر راز همکارئ ژمنه يې وکړه.

همدراز له يو شمير نورو علماؤ سره هم مخ شوو، چې په ډير اخلاص سره يې د دين د خپراوي هڅه کوله، په ليدو سره يې مونږډير متاثره شوو، د دوى اخلاص صبر او نه ستړي کيدونکي هلې ځلې هغه څه وې، چې ډير خلک يې د الله تعالى دين ته متوجه کړي وو، نوموړو سره مو هم د دعوت په هکله د همکارئ خبره وکړه، چې مونږ ته يې تود ښه راغلاست وويل او د همکاري وعده يې راکړه.

له مولوي صاحب موسى کليم سره مو هم ليدنه وکړه، نوموړى ورور هم لله الحمد د دعوت دخپراوي په برخه کې هلې ځلې کولې او د کريمې مدرسې مسؤوليت يې په غاړه وو، محترم مولوي صاحب هم د همکارئ ژمنه وکړه او زمونږ يې ډير اکرام وکړ.

همداراز له ګڼ شمير نورو علماؤ سره مو هم وليدل، د اسلامي فکر د خپراوي په هکله مو ډير بحث ترسره کړ.

له ځلميانو سره ليدنه:

ارزګان ولايت ته له ورتګ سره سم له داسې يو ځلمي سره مخ شوو چې د مصر قاهرې پوهنتون ته بريالى شوى وو، د ډير استعداد خاوند ښاغلې محمد صادق نصرت وو، ده په ارزګان ولايت کې د شاګرانو دعلمې کچې د لوړوالي لپاره ډيرې هلې ځلې کولې، د همدې مقصد لپاره يې د ساينسي مضامينو يو کورس بنسټ ايښئ وو، له نوموړي سره مو هم د زړه خواله وکړه، د جمعيت اصلاح د فعاليتونو په اړه مو ورسره خبرې وکړې، ده هم د هرراز همکارئ ژمنه وکړه، همداراز له نورو ځوانانو سره مو هم د دين په هکله خبره وکړه چې د کلکې همکارئ وعده يې راکړه او په دې هکله يې ډير افسوس کاوه چې کاشکې وړاندې ورغلي واى.

ارزګان ميشتو مسافرو سره ليدنه:

د ډيرو هغو مسافرو ورونو ځايونو ته هم ورغلو چې د ارزګان ولايت کې په مختلفو ادراتو کې يې دنده ترسره کوله، له دوى سره مو هم پوره خبره وکړه، او ورسره مو تعارف هم ترسره کړ، چې د دوى لخوا هم د دعوتي کار تود هرکلى وشوو، نوموړو د جمعيت اصلاح فعاليتونه وستايل او يو اړين ضرورت يې وباله او د هر راز همکارئ ژمنه يې وکړه.

له مدرسو څخه ليدنه:

د اشخاصو له ليدنې څخه وروسته د ځينو مدرسو ليدنه مو هم له نږدې څخه وکړه، د هغه ځاى د مفتي عبدالله او دهغه په څير نورو علماء کرام له برکت څخه ډيرې منظمې مدرسې موجودې وې، په ترينکوټ کې د شاه منصور سيمې ته ورغلو، د شاګردانو له اوچت استعداد، کلک نظم او اخلاص څخه مونږ ډير څه زده کړل.

له نابغه ماشوم سره ليدنه:

افغانستان د هغه ملغلرو او استعدادونو ځاى دى چې تر اوسه پورې په خاورو او دوړو کې پټ دي، هغه چې ښکاره شي لوي شي او له پيژندلو څخه پرته پناه شي، دشاه منصور په سيمه د مفتي صاحب عبدالله په مدرسه کې مو هغه اته کلن ماشوم وليد چې په پنځه نيمو مياشتو کې يې قران حفظ کړى وو، دغه ماشوم زمونږ زړونه ډير متاثر کړل، سترګې يې راته له اوښکو ډکې کړې، او په دې سره ډير غمجن شو چې اى کاش په افغانستان کې يوې ادارې شتون درلودى، چې دا ډول استعدادونه پکې پالل شوي او لا روزل شوي واى.

د بريښنا ليکي ملګري ليدل:

د نوي ټيکنالوژئ په پرمختګ سره د دعوت ساحه نوره هم پراخه شوه، او زمونږ لپاره يې د کار ډير فرصتونه په لاس راکړل چې وکولاى شو له خپلو ورونو سره چې د دنيا په هر ګوټ کې وي دزړه خواله وکړو اود دعوت دروند پيټى سره شريک کړو، له همدې وسيلې څخه په استفادې، له ډير وخت راهيسې مې له يوملګري سره د بريښناليک لمخې اړيکه وه، او پرته لدې چې يو بل ووينو ډير بريښناليکونه مو تبادله کړي، له نيکه مرغه چې پدغه سفر کې مې دغه هڅاند او دعوتګر ورور له نږدې وليد، د ده اخلاص، اکرام او تود هرکلى هغه څه وو چې زمونږ مينه يې څو چنده کړه او حوصلې يې مو پياوړې شوې.

دسفر پاى:

له دوو ورځو او دوشپو تيرولو وروسته د شنبې په ورځ د ١٣٩١-حمل-١٩ نېټه کندهار ښار ته سهار د مسنونه دعاوو په لوستلو سره سفر پيل کړچې بيا هم له درې نيم ساعت مزل څخه وروسته چې د زړه سواند استاد محمد مزمل اسلامي د روسانو سره د افغانستان د اسلامي جهاد له خوږو او ترخو خاطرو بيانولو سره مل وو کندهار ښار ته د الله په فضل له بريالي سفر څخه راورسيدو.