په جلال اباد کې د پاکوالي کمپاين

دجمعیت اصلاح له لوري په جلال اباد کې د پاکوالي کمپاين

راځئ خپل ښار او چاپېريال پاک وساتو!

وحيدالله مصلح
drwahidm@gmail.com

په (۱۳۹۰، کب، ۱ دوشنبه) نېټه سهار ۹ بجې جمعيت اصلاح په خپلو هېوادوالو کې د پاکونې د فرهنګ عامولو په موخه د چاپېريال پاکونې کمپاين په ليار واچاوه، نوموړی کمپاين د ننګرهار عامې روغتيا په سيمه ايز روغتون کې افتتاح او وروسته د روغتون د انګړ پاکونې کار عملاً ترسره او په تعقيب يې ښاريانو ته د انګېزې ورکولو په موخه د جلال اباد په ښار کې اوږود مارش تر سره شو.
په نوموړي کمپاين کې د جمعيت اصلاح پر غړيو، همفکرانو او همکارنو باندې راټولو نزدې ۳۰۰ محصلينو، استادانو، زده کوونکو، د امام ابويوسف عالي دارالعلوم ګڼو طالبانو، او ديني عالمانو برخه اخېستې وه. دغه کمپاين د ننګرهار عامې روغتيا او ښاروالۍ رياستونو سره په تفاهم کې تر سره شو.

د پيل کيسه!

د سهار په اته نيمو بجو په ننګرهار کې د جمعيت اصلاح سيمه ايز دفتر ته په مختلفو ډلو کې ګډونوال راورسېدل، د امام ابويوسف عالي دارالعلوم د طالبانو ډله، د انجنير صاحب شفيق په مشرۍ د زده کوونکو ډله او په فردي ډول د نورو ګډونوال پتمن راتګ ډېر زړ ه راښکونکی وو… دغه ګډون يو عجيب امتزاج رامنځته کړی وو، ديني طالبانو او عصري زده کوونکو په ګډه له خپلو خلکو او خاورې سره د مينې بې پنا مظاهره کوله، دغسې ګډون په خپله يو عظيم درس وو.

د ګډونوالو تر پوره کېدو وروسته ګډونوالو ته د جمعيت اصلاح پر نومونو ښکلې شوې واسکټونه، دستکشې، ماسکونه، لوی پلاستيکونه، او اړين وسايل وسپارل شول.

ګډونوال په لسو ګروپونو وويشل شول او هر ګروپ ته يو يو مشر ټاکل شوی وو. ليکل شوي بينرونه پر هر ګروپ وويشل شول. نوموړيو بينرونو ډېر ښه پيغامونه له ځان سره لېږدول، د بېلګې په توګه:

پاک چاپېريال د عالي فرهنګ نښه ده
راځئ خپل ښار او چاپېريال پاک وساتو

راځئ د پاکوالي فرهنګ ته وده ورکړو
پاکوالی د ايمان غوښتنه او ملي وجيبه ده

(پاکوالی نيم ايمان دی)، (پاکوالی د ايمان يوه برخه ده) حديثونه

روغتيا په پاک چاپېريال کې ده

او داسې نور…

تر دې وروسته په ننګرهار کې د جمعيت اصلاح ولايتي مسئول او د مرکزي شورا غړي استاد عبدالرحيم صراف ګډونوالو ته لارښوونې وکړې، نوموړي وويل چې زمونږ ننی کمپاين د عبادت پر بنسټ او نيت تر سره کيږي. مونږ بايد ددې هڅه وکړو چې خلکو او ټولنې ته د پاکوالي په اړه سالم او روغ پيغام ولېږدوو، مونږ بايد د کمپاين به جريان کې د پوره نظم او اطاعت څرګندونه وکړو او بالاخره کله چې راستنيږو نو د سرک دواړو غاړه ته به په منظم ډول راځو او خپلو ګرانو هېوادوالو ته به په ډېره مينه د پاکوالي پيغام ورکوو او بروشرې به پرې ويشو.

ورپسې ګډونوال د موټرو په ذريعه د عامې روغتيا روغتون انګړ ته ورسېدل.

د ننګرهار عامې روغتيا په انګړ کې!

ګډونوال د عامې روغتيا روغتون ته په منظمو ډلو کې راورسېدل او بيا هلته په چمن کې په منظمو کتارونو کې ودرېدل، هغوی پيغام لرونکي بينرونه له ځانونو سره درلودل او په روغتون کې موجودو پايوزانو او کارکوونکو په ډېر شوق او رغبت سره دې نوې پديدې ته کتل، هغوی په ډېره مينه ګډونوال د افرين په غږونو او دا چې خدای دې تاسو سره ښه وکړي نازول.

د افتتاح لپاره لنډ پروګرام په پام کې نيول شوی وو، په مجموع کې د پروګرام مسئول حبيب الله زيار وو او ويندويي محمد ګلاب توحيديار پر مخ وړله، د تلاوت لپاره قاري باختر احسان راوغوښتل شو.
ورپسې شيخ القرآن مولانا عبدالصبور صاحب د لنډې وينا په ترڅ کې وويل چې په اسلام کې پاکوالی او طهارت لوړ مقام لري، کله چې حضرت محمد صلی الله عليه وسلم مبعوث شو نو په همغه لومړيو کې ورته د خپل رب له اړخه وويل شول چې (وثيابک فطهر ) خپلې جامې پاکې کړه… د فقهې د ټولو کتابونو قدوري، کنز، شرح وقايه او نورو کتابونو پيل د طهارت پر مسئلو شوی، دا ټول مونږ ته په اسلام کې د پاکوالي لوړ مقام راښايي. نوموړي وويل چې که څوک له بهره زمونږ هېواد ته راشي نو هغوی د يو څو شتمنو کورونو څخه نه بلکه د هېواد له مجموعي وضعيته د پاکوالي تاثر اخلي. مولانا صاحب وويل چې زمونږ د شتمنو خو دا حال دی چې په ميليونونو روپۍ پر خپلو کورنو لګوي خو د کور مخې ته يې د کثافاتو ډېرانونه پراته وي او دوی يې د پاکولو هيڅ مالي لګښت ته تن نه ورکوي، که د يوې کوڅې مېشت کورونه مشخص شمېر روپۍ د کوڅې د پاکولو په خاطر سره راغونډې کړي نو چاپېريال په ښه شکل د پاکوالي په لور درومي. مولانا صاحب د هېواد په لروبر کې د جمعيت اصلاح په ټولنيزو برنامو او فعالیتونو رڼا واچول.

ورپسې د ننګرهار د عامې روغتيا روغتون رئيس ډاکټر صاحب شمس الله لنډې خبرې وکړې، هغه له جمعيت اصلاح څخه ډېره مننه وکړه او ددغسې ابتکار په کولو سره يې ورته مبارکي ورکړه، هغه وويل چې مونږ ډېر خوشاله يو چې جمعيت اصلاح دغسې يو پيل وکړ او له نورو يې غوښتنه وکړه چې د چاپېريال پاکونې دغسې برنامې په ليار واچوي.

ورپسې د ښاروالۍ د تنظيفاتو مدير بريالي خبرې وکړې هغه هم په خپل نوبت له جمعيت اصلاح څخه ددې ابتکار مننه وکړه او ويې ويل چې زمونږ د ټولو دنده ده چې خپل ښار او چاپېريال پاک وساتو.

د کمپاين موخې!

په پای کې په ننګرهار کې د جمعيت اصلاح ولايتي مسئول استاد عبدالرحيم صراف وويل چې مونږ غواړو خپلو خلکو ته دا پيغام ورکړو چې ځانونه، کورونه او چاپېريالو پاک وساتو. نوموړي د پاکونې ددغه کمپاين موخې په لاندې ډول يادې کړې:

په ټولنه کې د پاکوالي فرهنګ ته وده ورکول.

ددې شعور پياوړي کول چې مونږ په خپله بايد کار وکړو.

په اجتماعي کارونو کې د خلکو د ګډون هڅول.

ددغسې ګډ عمل په واسطه له خپلې خاورې او خلکو سره د مينې پياوړي کول.

او په ټولنه کې داوطلبانه کار ته وده ورکول.

نوموړي په پای کې د عامې روغتيا له رياست او روغتون او همدا راز له ښاروالۍ مننه وکړه چې له جمعيت اصلاح سره يې خپله همکاري ونه سپموله.

تر دې وروسته ګډونوال په منظم ډول د روغتون په چاپېريال کې خپاره او د اوږده وخت لپاره د پاکونې پر کار بوخت شول، له دې سره په څنګ کې موجودو پايوازانو او کارکوونکو ته ددې پرله پسې پيغام ورکول کېده او هيله ترې کېده چې ايضافي مواد دې هلته په شته کثافت دانيو کې غورځوي او د چاپېريال پاکونې په برخه کې دې خپل مسئوليت تر سره کړي.

په ښار کې لوی مارش!

د عامې روغتيا روغتون د چاپېريال پاکونې تر مراسمو وروسته ګډونوالو په منظم ډول د ښار په لور په داسې ډول مارش وکړ چې پنځه ډلې د سرک يوې غاړې او پنځه ډلې د سرک بلې غاړې ته روانې شوې. يوه څو کسيزه ډله ددې لپاره وټاکل شوه چې د دغو ډلو په پای کې دې راځي او ځای پر ځای دې د چاپېريال پاکونې اوږده بينرونه د ښار په مختلفو ځايونو کې لګوي. د ګډونوالو مارش په منظم ډول د ښار له منځه تېر شو او د پاکونې په اړه يې ۶۰۰۰ پيغام لرونکي بروشرې پر ښاريانو وويشلې.

ګډونوال ماسپښين نزدې يوه بجه په جلال اباد کې د جمعيت اصلاح سيمه ايز دفتر ته ورسېدل، هلته يې په منظم ډول له ځان سره شته وسايل د جمعيت اصلاح ادارې ته وسپارل، شيخ القرآن مولانا عبدالصبور صاحب ورته د پای وينا واوروله او د دعا په کولو سره پروګرام پای ته ورسېده.

د ګډونوالو خاطرې!

قدرت الله جاهد خپله خاطره داسې بيانوي:

نزدې نهه بجې د عامې روغتيا روغتون ته ورسېدو. ټول ورونه په نظم ودرېدل او لارښوونې ورته وشوې او د پرانستې پروګرام پېل شو. د ښاروالۍ او روغتون مسؤلېنو او عامو خلکو ددې ستر کار ډېره ستاينه کوله او رښتيا هم د ستاينې وړ کار و.

د امر سره سم ورونو په ډېر اخلاص د خپل ګروپ مشر په لارښوونو د ځمکې نه د خځلو په ټولولو شروع وکړه. ما هغه استادان هم د خځلو په ټولولو وليدل چې د ډېر ستر علم خاوندان دي، د هغوي له برکته نن په سلګونو ځونان د خپل ژوند اصلي هدف پېژني. په رښتيا چې د اخلاص، عمل او ايثار يوه ننداره وه.

د روغتون تر پاکولو وروسته پلان دا و چې تر تالاشۍ چوکه به په پښو ځو او د لارې نه به خځلې راټولوو، خلکو ته به چاپې پېغامونه ورکوو او په خوله به ورته هم د پاکۍ په اړه وايو. الحمدلله د پلان سره سم په ډېر نظم او بې مثاله توګه په ښار کې ځوانان په پښو روان و او کار يې کاوه. کله چې مو د مخابراتو او تالاشۍ چوک تر منځ د دوکانونو له مخې ګند په پاکټونو کې اچولو عام خلک او دوکانداران ډېر متاثره و او هوډ يې کاوه چې بيا به خپله مخه پاکه ساتي.

ما له ځان سره وويل چې دا ټول د جماعتي کار برکت دی چې نن سلګونه ځوانان راټولېږي او په زرګونو خلکو ته د پاکۍ پېغام ورکوي او خلک ترې پند اخلي.

ډاکټر مطيع الله امانزی وايي:

زما لپاره په دې کمپاين کې ډیره جالبه خو د فکر وړ خبره داه وه چې کله موږ د عامې روغتيا په روغتون کې د پاکولو کار پيل کړ نو ومې ليدل چې په يو چمن کې يو کثافت داني ايښي وه. کثافت داني په پاک پلاستيک پوښلې وه چې هیڅ د کثافت داني ګمان پرې نه کيده. خدای دې وکړي چې د جمعيت اصلاح د دغه کمپاين له برکته په خلکو کې د پاکې او نظافت په اړه مثبت بدلون رامنځته شي ترڅو کثافات مو د چاپيريال پر ځای په کثافت دانيو کې پراته وي.

ضيا الرحمن فاروق وويل چې:

په دغه کمپاین کې زمونږ ګروپ دصحت عامې شرقي برخې ته چې هلته خوړنځای هم موجوددی، ورسید،مونږټول لګیا وو او صفايي موکوله چې پدې وخت کې مې یواواز واورید چې: تاسو دموسسی والا یاستئ اوکه نورڅوک؟

ما چې پورته وکتل پوه شوم چې دی د خوړنځای اشپز دی نو ورته ومی ویل چې مونږکومه مؤسسه نه یو بلکی دجمعیت اصلاح غړی او همکاران یو او غواړو چې دخپل ښار اوچاپیریال پاک ساتلو روحیه په خپلو خلکو کې پیدا کړو، نو هغه راته وویل چې الله دې تاسو ته اجر درکړي چې دخپلې ټولنی یو غم درسره شته او غواړئ چې ټولنه خپلو مسؤلیتونو ته متوجه کړئ، دلته خو ټول خلک پدې تمه دې چې مونږ ته به هرڅه خارجیان او خارجی مؤسسې کوي حتی زمونږ هیوادوال خپل کورونه هم په صحیح توګه نه پاکوي پاتې شونورچاپیریال.

ما ورته وویل چې زمونږ دجمعیت اصلاح همدا کاردی چې افغان ولس خپلو مسؤلیتونو ته متوجه کړواو هغوی ته داسې رهنمايي وکړو چې په دنیا اواخرت کی کامیاب شي.

محمد منيب ليکي چې:

مونږچې کله صحت عامې ته ورسیدو،دمریضانوپه پیوازانو مې سترګې ولږیدې و مولیدل چې ډیرخفه ښکاري اوپه کمپلوکې پېچلي ناست دي ځکه يخني وه، کله چې هغوی زمونږ پروګرام ولیده چې ځوانان په پاکوالي بوخت دي نوخپلې کمپلې یی وغورځولي اومونږسره یی دپاکوالي په پروګرام کې برخه واخېسته، دننګرهارښاریان ډیرخوشحاله وه اومونږته یی په ټوله لاروئیل چې (جزاکم الله خیر) دننګرهارپه ښاریانوکې یونوي ذهنیت خپورشواو دا پيغام عام شو چې پاکوالي دایمان یوه برخه ده اوباید داوجيبه ترسره کړو.

محمد ګلاب توحيديار وايي چې:

څه وخت چې د عامې روغتيا د پاکوالي چارې تر سره شوې ټولو ملګرو ته وويل شول چې د ښار په لور وخوځېږئ، تر څو په ښار کې هم ورته چارې تر سره شي، روان شو ماسره لاوډ سپېکر وو او پيغامونه مې تکرارول، په همدې مهال يو چا راباندې غږ وکړ چې له دې وروسته به زه په خپله هيڅ شی بې ځای ونه غورځوم، که مناسب ځای نه وو نو له ځان سره به يې ساتم او بيا به يې په مناسب ځای کې غورځوم.

يو بل ګډونوال عبدالصبور وويل چې:

زما لپاره جالبه خاطره دا وه چې مونږ د مارش په حال کې د جلال اباد په ښار کې روان وو همدغه مهال يو ډاټسن موټر راغی په ډاله کې يې څلور پينځه نفر ناست وو، ددوی له منځه يو تن لګېدلی سګرېټ زمونږ مخې ته په سرک وغورځاوه، زه ورغلم هغه مې ګل کړ او په کثافت دانۍ کې مې وغورځاوه، نوموړی نفر ډېر خجالت شو.