دمرغومي ۶مه :نه هېرېدونکی ، که تکرارېدونکی تاریخ (کانفرانس)

راپور: د.نجات

راتلونکي نسل ته دتیرتاریخ حقیقی توریث په موخه دجمعیت اصلاح ننګرهار څانګې دمرغومي شپږمې یاد د سه شنبې ورځ ماسپښین ۲ بجې د امام ابویوسف تعلیمي مرکز په انګړ کې دیوکانفرانس په ترڅ کې چې سلګونو مشرانو او محصلینو پکې ګډون کړی و، وکړ.

کانفرانس دکلام الله مجید په مبارکوآیتونو پیل او وروسته دجمعیت اصلاح دختیځ زون مسئول دوکتورنجیب الله صالح ګډونوالو ته ښه راغلاست ویلو سره زیاته کړه چې نورملتونه خپل تیرتاریخ څخه عبرتونه اخلي خوافغانان دغه عادت نه لري نو ځکه ورته تراژیدي ورباندې تکراريږي، دملت د تیرې قربانۍ په هدف نه یوازې زمونږ اوسني ځوانان نه پوهیږي بلکې تیر مشران اوملت پرې هم نه پوهیدل، ددارنګه غونډو اوناستو څخه مو موخه داده چې راتلونکی نسل مو له تیرتاریخ او د تیروقربانیو له اهدافو سره اشنا شي.

د روسانو د راتګ لاملونه:
د سیمییزو او ستراتیژیکومطالعاتو مرکز رئیس دوکتورصفت الله قانت وویل چې دښمنان غواړي اسلامي امت خپل تیرتاریخ اوتیرو مجدونو اوعظمتونونه غافله کړي او اړیکي یې سره پری کړي.

استاد قانت د روسانو د راتګ لاملونه په عاجلو اوستراتیژکو لاملونو وویشل، د ستراتیژیکو اسبابو مخینې ته په کتو يې دتزاري روسیې پطرس کبیر وصیت یاد کړ(چې د نړۍ کنترول په خاطرباید دتزارې روسیې امپراطورې پولې تر هنده وغځوئ اوددې لپاره دوامداره جګړه باید وکړئ) خوپه افغانستان کې د روسانولاس وهنې هغه وخت برملاشوې کله چې دظاهرشاه د واکمنۍ پرمهال کمونیستي حزب جوړشو، چې دغه راز حزبونه جوړیدل په یو ملک کې د روسانو د اشغال لپاره مقدماتې صفحه ګڼل کیده، کمونیستانو د داود رژیم څخه د یوې وسیلې په توګه دکمونیزم پراختیا لپاره استفاده وکړه خود داودخان دنظربدلون سره سم کمونیستانو کودتا وکړه وروسته دخلق اوپرچم ترمنځ خپل منځې اختلافاتو او په هغوی د روسانو بدګوماني ددې سبب شوه، چې شورویانو په ۱۳۵۸ه ل دجدي په شپږمه خپلې قواوې افغانستان ته داخلې کړې.

استاد زیاته: افغانستان په ماضي اوحال کې دوخت زبرځواکونو لخوا دمرکزي آسیا طبیعي زیرمو اوخلیج نفتو ته درسیدوپه خاطر دل کیږي.

نامرده شوروي
دکانفرانس بل ویناوال مشهورلیکوال اوسیاستپوه استاد محمدزمان مزمل دجدي شپږمه په دریو ملحوظاتو نامرده تاریخ وګاڼه:

1. شوروي غوندې لوی بلاک چې په اروپاکې يې بلاژوندي اوپرمختللي ملتونه د یو بلاک په توګه ترتسلط لاندې و خو ددې ټول عظمت سره سره یې په یوه کوچني اوبیرته پاتې ملت باندې هم تجاوزوکړ دایوه لویه نامردي وه.

2. افغانستان دلوي شوروي ګاونډی و خوهغه د ګاونډیتوب حق ته هم ونه کتل او نامرده یرغل یې وکړاودیرغل باج یې هم ورکړ.

3. شوروي نامرده په افغانستان کې هماغه نظام له منځه یووړ چې دثورد انقلاب په پاېله کې منځ ته راغلی و اوحامیانویې شوروي بزرګ خپل رفیق ګاڼه.

استاد مزمل زیاته کړه: افغانانوشهیدان اوقربانۍ ورکړې اوڅومره قربانۍ چې پکار وې دهغوی دوه بربراه یې ورکړې که په نظامي لحاظ مو یو زعامت درلودلای شاید په څلورلکه شهیدانو ورکولو مو شوروي مات کړی وای، خوپه هرصورت دا ارقام را باندې په ناروا طریقې زیات شول، دا ماته یوتاریخي ارزښت دی، مونږ چې د کومې مسئلی لپاره قیام کړی و، هغه مو ترلاسه کړه خودا چې مونږ ددې لویې فتحې دظرفیت مطابق رهبریت ایجاد نه کړ دا زمونږ بې وسي وه او په اضطراري حالاتو کې فوق العاده غوښتنې هم د منطق نه لرې خبره ده.

استادمزمل هغه کارونه چې باید شوي وای په لاندې ډول ذکرکړل:

1. د مرکزی تنظیمونوترمنځ باید د اختلاف دوسیه تړل شوې وای او ډیرهغه شیان چې مونږ پرې اختلاف کاوه مسخره او بې ارزښته وو.

2. د وحدت په دوامداره ډولونو فکرشوی وای، ځینې تنظیمونو د قوي اتحاد غوښته کوله خو رانغی او مونږ یې د کمزوري اتحاد نه هم محروم کړو.

3. په راغلي وحدت باندې (چې څو کرته راغی) مو باید اعتماد کړی وای، مونږ خو د هرځل وحدت ماتیدو نه وروسته بدتره وضعې ته تللو.

4. دقضیې سیاسي اړخ باندې مو ژورغور ونکړ خصوصا کله چې نجیب ملي مصالحه اعلان کړه ددې معنا یې درلوده چې مونږ نور نظامی نه، سیاسي خلک یو او هغه د هغې سیاسي تشې او خلا لپاره چې د روسانو له تګ وروسته منځ ته راتله تیاری نه درلوده، نو زمونږ سیاسی تمثیل هم کمزوری و ځمونږخبرې پاکستان له نجیب سره وکړې.

5. د تنظیمونو تعدد تر یوه حده صحیح کار وو، ځکه هرمهاجرته که ملا وو، که پېر و، او یا اخواني یو مناسب همفکره تنظیم ورته د منظم کیدو لپاره موجود و خو نظامي تعدد هیڅ کله دزغم وړنه و او نه د مطبوعاتي جګړې او ترټولو خطرناکه داوه چې مونږ سره ډیرې خطرناکې بین المللي استخباراتي شبکې ژوند کاوه او دا شبکه تراوسه لکه دشیطان سیوری مونږه تعقیبوي اوس هم مسائلو باندې مونږ پردي فکرونه مطرح کوو ښه مثال یې تیره لویه جرګه وه.

دکانفرانس د ستیج چارې اکرام الله واحدي مخ ته وړلې او دغوث نوري ترنمونو کانفرانس ته لاښکلا ورکړې وه.
کانفرانس په دعایه سره پای ته ورسیده.