انجمن فرهنګي رسالت خپله نوبتي ناسته وکړه

راپور: اصلاح آنلاین

د جدی د میاشتې په ۲ مه نیټه ماسپښین مهال د رسالت فرهنګي انجمن خپله دريیمه ناسته د جمعیت اصلاح د خوشحال خان په ساحوي دفتر کې دایره کړه.

غونډه چې لسګونو کسانو ګډون پکې کړی وو، د قاري حامد شاه حماد په واسطه د قرآن کریم د مبارکو آیتونو په تلاوت او د محمد اکبر مؤحد په ویندویۍ سره پیل شوه. محمد اکبر مؤحد د رسنیو په رول باندې خبرې وکړې او دا یې وویل چې افکار تل په لیکلې بڼه لیږدیدلي او اغیزناک پریوتي دي او استعمار هم د خپلو پوچو افکارو د خپراوي په موخه په زیاته کچه په رسنیز ډګر باندې تکیه کړې ده.

احمد ارشاد احرار د علامه اقبال شعر چې د اسلامي نړۍ حالت پکې انځور شوی ؤ ولوست.

د دې غونډې مرکزي درس د مقاله لیکنې د اصولو په اړه وو چې په سلام او مشعل پوهنتونونو کې د استاد سید ناصر تقدسي په واسطه وړاندې شو. استاد لومړی په عمومي ډول د مقالې په اړه معلومات وړاندې کړل؛ وروسته یې خپل درس د مقالې د انواعو څخه د تحقیقي مقالې په اړه په درس سره وغزاوه، د هغه مهمې برخې او اصول یې وڅیړل او د ګډونوالو پوښتنو ته یې ځوابونه ورکړل.

د غونډې په پای کې د رسالت کلتوري انجمن د غړو د لیکنو له منځه د عبدالباقي سلطاني لیکنه چې د اختر په اړه وه کره کتنې ته وړاندې شوه چې ګډونوالو یې په اړه خپل آندونه سره شریک کړل. روح الله ساحل هم په دې غونډه کې خپل شعرونه ولوستل.

د یادونې وړ ده چې د رسالت کلتوري انجمن دری میاشتې وړاندې د باهدفه قلمونو د روزلو په موخه جوړ شوی وو چې لیکنې یې د اصلاح ملي په اونیزه، اصلاح آنلاین او د انجمن په بلاګونو کې خپریږي.