مسلمان ځوان او د اوسنې عصرچلينجونه (کانفرانس)

د افغانستان اسلامي فرهنګي مرکز د ځوانانو څانګې په نوښت د (مسلمان ځوان او د اوسنې عصر چلينجونه) تر عنوان لاندې د کنفرانسونو دلړۍ

د هيواد پياوړې ليکوال استاذ پوهندوى عبدالواسع صابر

لومړنې کنفرانس د روان کال د ليندۍ په ٢٧ نيټه د يکشنبې په ورځ د ماسپښين په دوه نيمو بجو د افغانستان اسلامي فرهنګي مرکز په انګړکې د ورور قاري عبدالله عزام لخوا د قرآن کريم د څو مبارکو آيتونو په تلاوت سره پيل شو.

وروسته  محترم مولوي فضل ربي د ( مسلمان ځوان مسئوليتونه) په موضوع تفصيلي رڼا واچوله او ځوانان يې خپلو ديني او ټولنيزو مسئوليتونو ته متوجه کړل.
مولوي صاحب د خپلو خبرو په ترڅ کې وويل: ځوان د يوې ټولنې د تودې ويني د احساس نوم دى او ځوان داسي هستي ده چې د کوم شي په هکله مطمئن قانع شي بيا نو د هغې د لاس ته راوړنې لپاره له هيڅ ډول قربانۍ څخه ځان نه سپموي که څه هم  دده د سر په بيه تمام شي . نو همدا لامل دي چې د اسلام مبارک دين په ځوانانو زيات اهتمام کړې دى او په هغوى يې زيات مسئوليتونه اچولي دي.

وروسته د شمشتود نصرت مينې څخه پروګرام ته د راغلو ځوانانو له جملي صلاح الدين صلاح په خپل ښکلي غږ کې په زړه پورې ترانه واوروله چې کنفرانس ته يې لا ښکلا ور وبخښله .

د کنفرانس دوهم ويناوال د هيواد پياوړې ليکوال استاذ پوهندوى عبدالواسع صابر وو چې د ( اسلام او نشنليزم) په موضوع يې تفصيلي او هر اړخيزه وينا وکړه  او د خپلو خبرو په ترڅ کې يي وويل:  مسلمان بايد د تعصب او نشنليزم د وړو وړو کورونو نه راووځي ځکه اسلام يو نړيوال او هر اړخيز دين دى چې په دې کې قوم، ژبه ، توکم، هيواد، رنګ،نژاد، اقتصادي او سياسي ګټې د ښه والي معيار نه دي ټاکل شوې بلکې د الله په نزد تر ټولو غوره او عزتمند هغه څوک دي چې زيات تقوا دار او د الله نه زيات ويريږي .

په دغه کنفرانس کې د پيښور او خوا اوشا سيمو د مختلفو تعليمي ادارو تر ١٠٠ زياتو ځوانانو ګډون کړې وو.

ياده دي وي چې په دغه کنفرانس کې د سټيج چارې د مرکز د ځوانانو د مسئول ورور ګل احمد هاتف په غاړه وي چې اعلان يې وکړ چې دا د دې ډول کنفرانسونو د لړۍ لومړنې کنفرانس وو چې لړۍ به يې جاري وي او هره مياشت به مرکز د دغه ډول کنفرانسونو شاهد وي او له ځوانانو څخه يې غوښتنه وکړه چې ددې کنفرانسونو په کاميابۍ کي ونډه واخلي.

کنفرانس د افغانستان د اسلامي فرهنګي مرکز د رئيس قاضي محمد حسن اسلامي په دعا سره د مازيګر په څلورو بجو پاى ته ورسيد او په جماعت سره د مازيګر د لمانځه د اداء کولو څخه وروسته ځوانان په داسي حال کې چې د پروګرام ستاينه يې کوله رخصت شول.