انجمن فرهنګي رسالت دوهمه ناسته وکړه

راپور: اصلاح رسنیز ګروپ

د روانې میاشتې په نهمه نیټه چې د دوشنبې له ورځې سره سمون لري انجمن فرهنګي رسالت له خوا چې د جمعیت اصلاح د نشراتو د څانګې تر څارنې لاندې نوی تأسیس شوې ده دوهمه نوبتي ناسته وشوه.
د دې ناستې پیل د مازدیګر په ۳:۳۰ بجو د انجمن د مسؤل انجنیر محسن امین په پیلیزو خبرو سره وشو چې په خپلو خبرو کې یې د افغانستان په رسنیو کې روان فساد ته اشاره وکړه او په دې اړه یې د مثالونو په رڼا کې څرګنده کړه چې رسنۍ خپل رسالت نه اداء کوي، ریښتیني حقایق خلکو ته نه څرګندوي او د ټولنې اخلاقي او ټولنیزو ارزښتونو ته اصلا پاملرنه نه کوي. نوموړي په خپلو خبرو کې وروسته وویل چې رسنۍ باید له دې حالت څخه وایستل شي او د دې لپاره باید قلمونه خوځند او له شته استعدادونو څخه باید ګټه واخیستل شي.
په لومړۍ ناسته کې ټولو ګډونوالو ته دنده ورکړل شوې وه چې د ځوانان او د واده ستونزې تر عنوان لاندې لنډې لیکنې وکړي چې د ټولو ګډونوالو څخه یې دو لسو کسانو په دې اړه لیکنې کړې او د خپلو ګروپونو د مشرانو له خوا اصلاح شوې وې. په دې ناسته کې د هغو کسانو له ډلې څخه چې په یاده موضوع یې لیکنې کړې وې عبد الباقي سلطاني او احمد قیس  خپلې مقالې د ګډونوالو په مخ کې ولوستې چې د عبدالباقي سلطاني لیکنه له ټولو څخه غوره لیکنه وبلل شوه او جایزه هم ورکړل شوه.
په دې پروګرام کې د خبر جوړونې او لیکنې په اړه یو مسلکي درس ته هم ځای ورکړل شوی وو چې د هیواد تکړه لیکوال او ژورنالیست او د جمعیت اصلاح د نشراتو د کمسیون غړي استاد احمد ضیاء رحیمزي له خوا وړاندې شو.
په پای کې ټولو ګډونوالو ته چې شمیر یې له ۴۰ کسانو څخه اوښت، دنده ورکړل شوه چې د اختر په اړه به لیکنې کوي او د اصلاح په موخه به یې خپلو سرګروپانو ته لیږي؛ دا لیکنې به له ایډیټ وروسته د همدې انجمن په سایټ کې نشریږي.