په کابل کې د قرآن پوهنې دوره پای ته ورسیده

روح الله ساحل

اصلاح رسنیز ګروپ

په کابل کې دقرآن پوهنې دوره چې د جمعیت اصلاح د دین پوهنې د څانګې له خوا د میزان د میاشتې له ۱۶ څخه تر ۲۲ تاریخ پورې د کابل د احمد شاه بابا مینې (ارزان قیمت) په سیمه کې جوړه شوې وه د جمعې په ورځ پای ته ورسیده.

د نوموړې دورې مدرس مولانا عبد الصبور وو، چې د اووه ورځو لپاره په ترتیب سره په لاندې موضوعاتو باندې درسونه وړاندې کړل:
1.    قران کریم او د هغه فضیلت
2.    لمونځ او د هغه ارزښت
3.    د لااله الا الله معنی او غوښتنې
4.    ربا (سود)
5.    حجاب
6.    انفاق فی سبیل الله
7.    د پیغمبرانو د بعثت مقاصد

د دورې وروستۍ ورځ له نورو ورځو څخه ځانګړې وه، په دې ورځ مولانا صاحب د رسول الله صلی الله علیه وسلم د بعثت د مقاصدو د بیان تر څنګ له خلکو غوښتنه وکړه چې د رسولانو کار ته دوام ورکړي ځکه نور خو پیغمبران نه راځي او دا ستره دنده یې مونږ ته پریښې ده. نو خلک باید د علم د خورولو، په نیکو اخلاقو د روزلو، د دین د تبلیغ، الله لورته د بلنې، په نیکۍ د حکم، د دین د اقامې او د عدل د نظام د راوستلو لپاره خپل ټول استعدادونه وکاروي.

د وروستۍ ورځې د درس څخه وروسته د جمعیت اصلاح د مرکزي شورا غړی او د تربیت او مهارتونو د ودې د څانګې مسؤل استاد محمد یونس ابراهیمي هم ګډونوالو ته خپله وینا واوروله او د ارزان قیمت د سیمې له مؤمنو اوسیدونکو څخه مننه وکړه چې د قرآن پوهنې د دورې د کامیابۍ او له قرآن سره د تړاو لپاره یې ډیرې هڅې وکړې.

نوموړي وروسته وویل چې قرآن کریم په الماریو کې د ایښودلو لپاره نه دی راغلی، بلکه دا د عمل کتاب دی او باید احکام یې د مسلمانانو په ژوند کې پلي شي او مونږ د دې ډول پروګرامونو له جوړولو څخه غواړو چې خلک په قرآن باندې راټول کړو او له دې کتاب سره یې وتړو.

د دورې په پای کې مولانا عبد الصبور په دې دوره باندې د شوو مصارفو تفصیل چې ټول دری لکه (۳۰۰۰۰۰) افغانۍ کیدلې خلکو ته واوراوه او له دوی څخه یې غوښتنه وکړه چې د انفاق في سبیل الله په روحیه سره د دې ډول قرآني درسونو د دوام په خاطر له جمعیت اصلاح سره مرسته وکړي. چې په پایله کې د دورې ګډونوالو په مجموعي ډول د یو لک او شل زره (۱۲۰۰۰۰) افغانیو په اندازه سره مالي مرسته وکړه او د بل هر ډول مرستې لپاره یې هم خپل چمتووالی وښود.

له کارته نو او پل چرخي سیمو څخه راغلو ګډونوالو د دورې له مسؤلینو څخه غوښتنه وکړه چې د دوی په سیمو کې هم دا ډول دورې جوړې شي.

د قرآن پوهنې د دورې د درسونو وخت د سهار له شپږو بجو څخه تر اووه بجو پورې وو چې کابو څلور زره (۴۰۰۰) نارینه او ښځینه وو ګډون پکې کړی وو.