د کابل په ارزان قیمت کې د قرآن پوهنې ستره دوره پیل شوه

روح الله ساحل – اصلاح رسنیز ګروپ

د قرآن پوهنې د دورو په لړ کې دا دی د کابل ارزان قیمت (احمدشاه بابا مینه) هم د قرآن پوهنې د سترې دورې کوربه شو.
د دې دورې لپاره مخکې له مخکې کور په کور دعوت شوی وو او په ښار او لویو لارو کې لوی لوی بینرونه لګیدلي وو.
د دورې د پیل څخه مخکې ټاکل شوي ځای ته چې د ارزان قیمت د آتم بلاک د چهار یار کبار د مسجد تر څنګ لوی میدان ټاکل شوی وو، خلک ډله ډله روان وو او په ډيره مینه سره یې د قرآن د زده کړې په لور ګامونه اخیستل.
دوره د سهار په شپږ بجو د دوکتور فصیح الله په زړه راښکونکي غږ د قرآن کریم د مبارکو آیتونو په تلاوت سره پیل شوه.
په پیل کې مولوي صاحب احمد الله صافې ټولو ګډونوالو ته ښه راغلاست ووایه او له دوی څخه یې مننه وکړه چې په سیمه کې د قرآن کریم د مبارکې غونډې کوربانه شول.
د دورې استاد مولانا عبد الصبور وو چې د خپل درس څخه مخکې یې د لنډې مقدمې په ترڅ کې وویل چې دا د کوم تنظیم غونډه نه ده، دا د کومې ډلې شخصي غونډه نه ده او دا د کوم ځانګړي قوم غونډه هم نه ده، دا د کوم مشر او لیډر استقبالیه نه ده، بلکه دا د ټولو مسلمانانو غونډه ده او میلمه هم ډیر د قدر وړ دی، زمونږ د ژوندانه قانون، زمونږ د دنیا او آخرت د کامیابیو تضمین کوونکی او زمونږ د رب سپیڅلی کلام، زمونږ میلمه قرآن کریم دی.
مونږ دلته د قرآن په خاطر راغلي يو، راغلي یو چې قرآن زده کړو، د قرآن په ارشاداتو باندې خپل ولس راټول کړو او له قرآن سره ېې اړیکې ټینګې کړو.
وروسته یې د قرآن کریم د فضیلت په اړه د قرآن کریم او احادیثو په رڼا کې مفصلې خبرې وکړې، د قرآن د تلاوت، له هغه سره د تړاو او په هغه باندې د مصروفیت د ارزښت په اړه یې خبرې وکړې.
مولانا صاحب وویل چې په دې وروستیو کې د نړۍ په سراسر کې د قرآن لور ته خلک راګرځیدلي دي، خلک قرآن لولي او په هغه باندې خپل ځانونه پوهوي، او دا به ان شاء الله د مسلمانانو لپاره د خیر او نیکې راتلونکې په لوري د بدلون زیری وي.
د لومړۍ ورځې په درس کې د قرآن کریم د فاتحې او ناس د دوه مبارکو سورتونو تفسیر وړاندې شو.
د دورې لومړۍ ورځ چې د سیمې کابو یو زر تنه نرانو او ښځو ګډون پکې کړی وو د سهار په اوه بجو پای ته ورسیده.

د دوه يمې ورځ درس د قاري صاحب نقيب الله حيات په تلاوت پيل شو، ورپسې د استاد احمد الله صافي صاحب لخوا د حديثو درس تقديم شو.

بيا مولوي صاحب عبدالصبورد دويمې ورځ درس تقديم کړ چې موضوع يې مونځ وه، مولوي صاحب د مونځ په اړه تفصيلي خبرې وکړې او د خپلو خبرو په يوه برخه کې يي وويل چې د احاديثو له مخې چې مونځ د دين ستنه ده، نو  کله چې د يو شي ستنه او اساس سست وي نو هيڅکله به هغه شی محکم پاتې نه شي او ورځ تر بلې به سستېږي او بالآخره نړېږي.نو مونږ او تاسو ته هم پکار دي، چې مونځ قايم کړو، ځکه چې مونځ هيڅکله هم له سړي څخه نه ساقطېږي او د مسلمان او کافر تر منځ فرق هم مونځ دی.

د قرآن پوهنې دا دوره به اوه ورځې اوږدیږي چې هره ورځ به په بیلو بیلو موضوعاتو درس وړاندې کیږي.