جمعيت اصلاح د اجتماعي افطار کوربه شو

راپور: روح الله ساحل

جمعیت اصلاح د رمضان د ایماني فرصت څخه په استفادې سره د هیواد د مخورو، تاجرانو او ایماندارو شتمنو لپاره یو اجتماعي افطار جوړ کړ.
نوموړی پروګرام د رمضان د میاشتې په څوارلسمې نیټې مازدیګر ۵:۳۰ بجې د کابل ښار د ممتاز محل په رستورانت کې پیل شو چې د جمعیت اصلاح نزدې دری سوه غړو، همکارانو او همفکرانو پکې برخه اخیستې وه.
پروګرام د تعلیم او تربیې پوهنتون د استاد عبدالاحد مسلم په ویندویۍ او د قاري عبد الرؤف په ښکلي غږ د قرآن کریم د مبارکو آیتونو په تلاوت سره پیل شو.
د پروګرام لومړی ویناوال د جمعیت اصلاح افغانستان معاون مولوي مظهرالدین فایز وو چې له خپلو ایماندارو او شتمنو هیوادوالو سره یې په اجتماعي افطار کې په ګډون خوښي څرګنده کړه او ټولو ګډونوالو ته یې ښه راغلاست ووایه.
مولوي صاحب د هر مسلمان فردي او اجتماعي مسؤلیتونو ته اشاره وکړه؛ ویې ویل چې په فردي ډول هر مسلمان مسؤلیت لري چې خپل ټول ژوند د رسول الله صلی الله علیه وسلم د ژوند سره عیار کړو او په اجتماعي ډول د خپلې ټولنې د غړو او خپلو شا او خوا خلکو په اړه مسؤلیت لرو. دین ته د خلکو او یا ټولنې رابلل یوازې د پیغمبرانو دنده نه وه بلکه په دې ستره فریضه کې ټول امت شریک دی.
مولوي صاحب زیاته کړه چې جمعیت اصلاح په هیواد کې د اصیلو اسلامي ارزښتونو د خپراوي، په ټولنه کې د اخلاقي مفاسدو سره د مبارزې او د فقر، مرض، بې کارۍ او بې سوادۍ د له منځه وړلو لپاره کار کوي، جمعیت اصلاح غواړي چې د افغانستان په هر اړخیزه وده او پرمختګ کې برخه واخلي او د هیواد د راتلونکې لپاره علمي کدرونه وروزي. او له تاسو درنو دوستانو څخه غوښتنه کوي چې زمونږ سره د دې لوړو او سترو اهدافو د لاس ته راوړلو په لاره کې ملګري شی او د تل په شان له مونږ سره معنوي او مادي مرستې وکړئ.
مولوي فایز وویل: مونږ د خپل وس په اندازه کار کولی شو خو مونږ چې کله په تاسو غږ کوو دا د دې په خاطر چې غواړو تاسو هم په دې مبارک کار کې له ځان سره ملګري کړو او له دې ښکلي فرصت څخه د ځان او خپلې ټولنې د ګټې لپاره کار واخلو.
وروسته یو لنډ کلیپ نندارې ته کیښودل شو چې د جمعیت اصلاح افغانستان ځينې دعوتي او روزنیز فعالیتونه پکې ښودل شوي وو.
شیخ القرآن مولوي عبدالسلام عابد هم پدې پروګرام کې وینا وکړه چې د انفاق في سبیل الله په اړه یې د قرآن کریم او احادیثو احکام واضح کړل. نوموړي ټول خلک د الله په لاره کې منظم انفاق ته راوبلل او ویې ویل چې که په انفاق فی سبیل الله کې هم نظم نه وي نو ګټه به یې ډيره زیاته نه وي.
مولوي صاحب عابد وویل:  جمعیت اصلاح یو داسې دیني جریان دی چې زمونږ دیني آرمانونه تمثیلوي او د هغوی لپاره کار کوي نو راځئ چې په خپلو مادي او معنوي مرستو سره یې حمایت وکړو.
د پروګرام وروستی ویندوی دوکتور رفیع الله عطاء وو چې د ګډونوالو په نمایندګۍ يې خبرې وکړې او په خپل وار سره یې د جمعیت اصلاح له فعالیتونو سره د مالي او معنوي ملاتړ غوښتنه وکړه او د انفاق في سبیل الله او په نیکیو کې د بیړې په اړه د قرآن کریم آيتونه ولوستل.
له دې وروسته ګډونوالو په ډیره مینه او ایماني جذبه د جمعیت اصلاح سره د خپلو مادي او معنوي مرستو اعلان وکړ، د تالار له هرې خوا د مرستو د اعلان آوازونه کیدل، دغې ایماني فضا یو ځل بیا د جمعیت اصلاح مشرانو، کارکونکو او عامو ګډونوالو ته دا ډاډ ورکړ چې زمونږ مؤمن ولس لا هم د خپل دین د غلبې او برلاسۍ په لار کې هر ډو ل قربانۍ او سرښندنې ته چمتو دی، او دا یې څرګنده کړه چې دغه ایمانداره ملت به پر خپلو مټو د هر ډول یرغل او یرغلګرو پر وړاندې مقاومت کوي.
نوموړی پروګرام چې په تالار کې یو ناست میلمه یې ټول مصارف په غاړه  واخیستل د افطار او د ماښام د لمانځه  په سر ته رسولو سره پای ته ورسید.