د کابل پوهنتون ساحوي دفتر تربیوي رحله وکړه

راپور: روح الله ساحل
د جمعیت اصلاح د کابل پوهنتون ساحوي دفتر د سرطان د میاشتې په دریمه نیټه تربیتی او تفریحي رحله وکړه چې د کابل، طبي او سلام پوهنتونونوشا او خوا ۸۰ تنو محصلینو او استادانو برخه پکې اخیستې وه.
دا تربیتي پروګرام چې سرپرستي يې احمد ارشاد احراركوله، د استاد عبد الصمد کرامت په پرانستونکې وینا پیل شو. استاد د رحلې موخې د افرادو تر منځ هراړخیز تعارف، په سمع او طاعت باندې د دوی روزنه، د اجتماعي ژوند او د سفر د آدابو زده کړه او سالمه تفریح وبللې.
له هغه وروسته د ښه نظم او په خاطر د رحلې ګډونوال په اوو ګروپونو وویشل شول او د پروګرام د دوهمې برخې د ځای په لور سفر پیل شو.
د پروګرام دوهمه برخه د کاپیسا ولایت د صیاد په منطقه کېپه تعارف سره پیل شوه؛ د تعارف په وخت د دري ژبې ویونکو په پښتو او د پښتو ژبې ویونکو په دري ژبه خپل ځانونه معرفي کړل.
رحله وروسته په دوه درسونو سره وغزیده چې لومړی درس یې د سلام پوهنتون د استاد دوکتور عبدالباقي امین له خوا د اسلامي خوځښت په وړاندې د بدلون د پروسې په هکله وو.
استاد وویل چې د بدلون په اړه دری نظریې موجودې دي چې لومړی یې د ماده پاله کمونزم له خوا وړاندې شوه چې ویل یې: په  ټولنه کې ټول تحولات په هغه باندې د شته اقتصادي، ټولنیزو او سیاسي شرایطو محصول دی او په طبیعي ډول منځ ته راځي.
دوهمه نظریه د جبریه وو وه چې په تقدیر باندې د ناسم فهم له امله منځ ته راغله او د دې نظرېې خاوندان په دې باور وو چې هر څه د تقدیر په اساس منځ ته راځي او د بدلون لپاره یې هڅې بې ګټې دي.
دریمه نظریه د اسلام ده او هغه د دې آیت پر بنسټ جوړه ده چې:ان الله لا یغیر ما بقوم حتی یغیروا ما بانفسهم
استاد وروسته یې زیاته کړه چې اسلامي خوځښت د همدې آیت پر بنسټ د خپل ټولنې د حالت د بدلون لپاره کار کوي او له لاندې لارو څخه کار اخلي:
•    توبه
•    نصیحت (په خپله ټوله معنی سره)
•    امر بالمعروف او نهی عن المنکر
وروسته له هغه د کابل پوهنتون د شرعیاتو پوهنځۍ استاد عبدالقادر نایل په خپله ځانکړې لهجه او سبک سره د توبې په اړه په زړه پورې درس وړاندې کړ، د توبې معنی، د توبې عملي لارې او د هغه په مخکې خنډونه یې ښه وڅیړل.
په دې تربیتي پروګرام کې یوه ورکشاپ ته هم ځای ورکړل شوی وو چې ګډونوالو ټولو په ګروپي ډول دې پوښتنې ته پکې د ځواب هڅه وکړه چې (که يوازې زه وغواړم دین ته کار وکړم نو څه به کوم) دې برخې هم تفریحي بڼه درلوده او هم یې د دین د اقامې لپاره د برخه والو روحیه پیاوړې کړه.
د غرمې د ډوډۍ له خوړلو او د جمعې د لمانځه له اداء کولو وروسته یوه اوږده تفریح وشوه، چې د رحلې ټولو ګډونوالو د صیاد په سند کې په لامبو، والیبال او نورو لوبو سره تیره کړه.
ښه نظم، سمع او طاعت ته پابندي، د استادانو او محصلینو تر منځ د بې ساري صمیمیت فضا، په کارونو کې د ټولو ونډه، د قوانینو څخه د سرغړونې پر مهال ټولو ګډونوالو ته په یوه اندازه د جزا ورکول او نور د دې تربیوي پروګرام ځانګړینې وې.

د څو ګډونوالو خاطرې:

كله چې د رحلې څخه د بېرته راگرځېدو پر مهال د ملګرو له خاطرو پوښتنه وشوه نو ځينو وروڼو لاندې ټكو ته اشاره وكړه:
عبدالله- وردك:  زما لپاره تر ټولو جالب ټكى دا وو چې په څلورويشت كسيږ موټر د افغانستان د لسو ولايتونو محصلين سره ټول شوي ول چې خپل منځي خواږه تعامل يې د ايماني ورورولى څرګندويي كوله.
فريدالله – غور: زما لپاره د سفر په زړه پورې خاطره دا وه چې د لومړې ځل لپاره مې يو ورځنى سفر له موسيقي پرته په موټر كې وكړ.
ربيع: غزني: زما لپاره جالب ټكى د سمعې، طاعت او صميميت هغه روحيه وه چې آن استادان هم چې كله د جزا او خدمت لپاره وغوښتل شول په ورين تندي حاضر شول.
عبيد الله- پروان: دا زما لپاره په ژوند كې لومړنۍ تفريحي برنامه وه چې په ديني روحيه تنظيم شوې وه او د تفريح تر څنګ مو د عبادت خوند هم ترې واخيست.
احمد الله- كندهار: كله چې خلك تفريح ته ځي نو د الله عبادت ترې پاتې وي، خو موږ هم درسونه واخيستل، هم مو تفريح وكړه او هم مو د جمعې لمونځ په جماعت سره ادا كړ.
د رحلې په اړه مو د کابل پوهنتون د څلورم ټولګي د محصل محمد ربیع نظر وپوښت، نوموړي له دې تربیوي پروګرام څخه د خوښۍ له څرګندولو وروسته زیاته کړه چې په پروګرام کې مو له نورو وروڼو سره تعارف وشو، په دیني مالوماتو مو ډیر څه زیات شولد سفر آداب مو زده کړل، د الله جل جلاله د دین د اقامې لپاره مو هوډ پیاوړی شو، او د پروګرام له پیله تر پایه چې کومه د صمیمیت فضا حاکمه وه کله به مې هم هیره نه شي.
د ځمکپوهنې د پوهنځۍ د دوهم ټولګي محصل محمد اقبال بیا په ځانګړي ډول د سفر په پیل کې د مسنونې دعاء ویل، په موټر کې تفریحي برنامې او مسابقې او له استادانو سره ګډه لامبو د یادونې وړ بلله، ویل یې چې کله مې هم په پام کې نه راتلل چې داسې پروګرامونه او سفرونه هم جوړیدلای شي.
په پای کې د رحلې ګډونوالو د کابل پوهنتون له ساحوي دفتر سره د انفاق فی سبیل الله په روحیه ۳۰۰۰ افغانۍ مرسته وکړه.
د یادونې وړ ده چې رحله د جمعیت اصلاح د تربیوي سیستم یوه مهمه وسیله ده چې داونیزو تربیوي حلقاتو یو مشخص شمیر کسان پکې د یوې ورځې لپاره د خپلې ساحې څخه لرې ځي، او د خپل نوعیت له مخې د دعوت منبر، د تربیت ډګر او د نورو خلکو د میلو او تفریح په خلاف د الله جل جلاله د بندګۍ مظهر وي.