په روداتوکی دقرآن پوهنې شپږورځنۍ دوره ترسره شوه (۱۳۹۰)

راپور: ضیاءالرحمن فاروق
د ننګرهار جمعیت اصلاح د روداتو سمییزدفترلخوا د ۱۳۹۰ کال حمل دمیاشتې په ۲۷مه نیټه د روداتو ولسوالۍ دحصارک دلوی کلي په جامع جومات کی  د محترم شیخ القرآن مولانا عبدالصبور لخوا د قرآن کریم اونبوي احادیثو په رڼا کی دقرآن پوهنې شپږ ورځنۍ دوره پیل شوه،  د دوری دلومړۍ ورځې درس چې دمؤمن صفات وو د یوتن ګډون وال قاري محمدامین لخوا دقرآن کریم دڅو آیتونو په تلاوت سره پیل شو، ورپسې دمحترم مولوي عتیق الله ثاقب لخوا ګډون والوته یونبوي حدیث تشریح شواوله هغه څخه وروسته شیخ القرآن محترم مولوي عبدالصبورخپل درس پیل کړاوپه ډیرښه انداز کې یې موضوع وڅیړله.
د مومنانو صفات
مولوی صاحب دخپلو خبروپه جریان کې وویل چې موږ او تاسې چې دلته راجمع شوي یو د خپل رب سره تعهد او ژمنه کوو چې د اسلام نه او اسلامي شعایرو نه په دفاع کې به هرډول قرباني ورکوو، داسلام ددشمنانو سره به مقابله کوو، مونږ دالله پاک ددین عسکر یو نو باید دالله تعالی پوره اطاعت وکړو، الله پاک ترهرڅه لوی ذات دی اوموږ د هغه بندګان یو، موږ باید پدې پوه شو چې مونږ الله پاک د کوم هدف لپاره پیداکړي یو، مونږ به خپل الله(ج) ته نزدې کیږو اوخپل ایمان به تازه کوو، دالله پاک د دین د اقامې لپاره به هرډول قرباني ورکوو، دمومنانو صفات به ځان کې پیدا کوو، هغه صفات چی رسول الله صلی الله علیه وسلم اوقرآن کریم بیان کړي دي، راځئ چې دمؤمن صفات دقرآن اوحدیث څخه زده کړو، سوچ پرې وکړواووروسته یې په ځان کې په عملي ډول راولو، قرآن کریم کې الله تعالی پدې اړه مؤمنانو ته خطاب کړی دی ( وعبادالرحمن الذین یمشون علی الارض هونا واِذاخاطبهم الجاهلون قالوا سلاما …)الایه
محترم مولوي صاحب وویل چی دا آیت دوه برخې لري یوه دا چې دالله تعالی بنده ګان ګرځي او پرځای نه کیني،  درسول الله(صلی الله علیه وسلم ) امت به جدوجهد کوي اوپه ځای به نه کیني، زمونږ پیغمبر متحرک وو اوامت یې هم په تحرک او خوځښت راوستلی دی.

دوهم دا چې مؤمن به په کبرنه ګرځي ځکه د رحمن بندګان تکبر نه کوي خو د ورو ورو ګرځیدلو څخه دا مطلب هم نه دی چې د مریض غوندې به ګرځي اوپه دې اړه یې دحضرت عمر(رض) اوحضرت عایشې (رض) اقوال او واقعات بیان کړل.
لمونځ او دلمانځه اهمیت
دیکشنبې ورځ ماسپښین درې بجې د دورې ددوهمې ورځې درس د پلان سره سم دمحترم قاري نثاراحمد لخوا دقرآن کریم دڅوآیتونوپه تلاوت اودمحترم مولوی عتیق الله ثاقب  لخوا د درس حدیث په وړاندې کولو سره پیل شو، ددوهمی ورځې موضوع (لمونځ اودلمانځه اهمیت) وومحترم مولوي صاحب پرې په پوره وضاحت سره رڼا واچوله چې دګډونوالو دعلاقې وړ وګرځیده.

د حجاب اهمیت
د دورې په دریمه ورځ محترم مولوي صاحب د حجاب اوپردې په اهمیت باندې مفصله رڼا واچوله اوویې ویل چې مسلمان باید حیا ولري اوپدې اړه یې درسول الله (صلی الله علیه وسلم ) هغه حدیث وړاندې کړ چی په هغه کې یې د اوښانو څارنه هم بې حیا  انسان ته د نه سپارلو حکم کړی و.

د قرآن کریم عظمت او فضیلت
په څلورمه ورځ محترم مولوي صاحب دقرآن کریم په عظمت اوفضیلت باندې وغږیده اوداسلام ددښمنانو ټولې هغه توطیې چې دقرآن کریم دعظمت اوفضیلت په خلاف یې کړې او کوي یې په خپلو خبرو کې بیان کړې او هغه یې په کلکه وغندلې او د دورې له ګډونوالو یې غوښتنه وکړه چې ویښ او بیدار اوسي او د دغه راز توطیو د شنډولو کلک هوډ او قوي عزم ولري.

ژوند د قرآن په رڼا کې
په پنځمه ورځ محترم مولوي صاحب دقرآن کریم په رڼا کې په ټولنیز ژوند تیرولو باندې رڼا واچوله اوګډونوالوته یې په خطاب کې وویل چې په ټولنه کې باید د قرآن پاک اونبوي سنتو په رڼا کې ژوند تیرکړو.

توحید او الهي حاکمیت
د دورې وروستۍ ( شپږمه ) ورځ د پلان سره سم دماسپښین په درې بجو دمولوي صاحب عتیق الله ثاقب په تلاوت سره پیل شوه، دتلاوت څخه وروسته محترم شیخ القرآن مولانا عبد الصبور د توحید اوالهي حاکمیت ترعنوان لاندې موضوع باندې خبرې وکړې.
محترم مولوي صاحب د خپلو خبروپه جریان کې وویل کله چې مونږ دا کلمه وویله چې ( لااله الاالله ) نو په دې مونږ اقراروکړچې حاکمیت به یوازې الله(ج) لره وي اوالله پاک به حاکم اعلی وي اوانسان به په دنیا کې دالله پاک خلیفه اونایب وي اوهغه قانون به چې د الله پاک له لوري نه راغلی دی، دمسلمانانو اساسي قانون وي، هر ډول موضوعي او د ځان نه جوړشوي قوانین د مسلمانانو ستونزې نه شي حل کولی، ځکه چې الله پاک چی انسان پیداکړی دی نو دهغه ټول حالات اوضروریات هم  ورته معلوم دي،  نو دانسانانو د ټولومشکلاتو د حل لار یوازې  د الله پاک او رسول (صلی الله علیه وسلم ) په سنتو کې ده.
مولوي صاحب زیاته کړه: چې هیچا ته داحق نشته چې دمسلمانانو په اساسي قانون ( قرآن پاک ) کې زیاتونه او کمونه وکړي بلکې دا قانون دهرډول تحریف څخه پاک دی اوترقیامته به په همدې حال وي اودا ځکه چې الله پاک یې د ساتنې او حفاظت  وعده کړې ده.

د امریکایانو پوځي هډې نه منو
محترم شیخ القرآن د خپلو خبرو په جریان کې دخلکوڅخه دا وعده اوژمنه واخیستله چې دامریکایانو د دایمي هډو په خلاف به کلکه دریږی اوکه ضرورت شو نوسرکونو ته به راوزي، اوپه میاشتو میاشتوبه خپل مخالفت  ته دوام ورکوي او دهیڅ ډول ګواښ څخه به نه ویریږي اوترهغه به مقابله کوي ترڅوحکومت ددې ناوړه اوغلط تصمیم څخه واړوي. محترم مولوي صاحب زیاته کړه چې موجوده پارلمان، لویه جرګه اود سنا مجلس دافغانانو نماینده ګي نشي کولای اونه  دومره غټ تصمیم نیولای شي .
محترم مولوي صاحب دغه مسئله دافغانانو اومسلمانانو دمصلحت خلاف وګڼله اودحکومت څخه یې په کلکه غوښتنه وکړه چې امریکایانوته دې له دایمي هډوورکولو څخه جداً ډډه وکړي.
همداډول محترم مولوي صاحب دامریکایي لیوني پادري لخوا د قرآن کریم دنسخې سوځول په کلکه وغندل او له خلکوڅخه یې وغوښتل چې په قرآنکریم منګولې ولګوي اوخپل اولادونه دقرآن کریم درس ته کینوي.
شیخ القرآن  زیاته کړه :  غرب اوکفري نړۍ دتعقل او منطق ځواک له لاسه ورکړی دی اونشي کولای چې دعقل اومنطق له لارې نړۍ ته ځواب ورکړي نو ځکه یې په داسې دښمنانه او دلیونتوب نه په ډک عمل لاس پورې کړی دی. دمحترم مولوي صاحب وینا دګډوون والولخوا په ډیرجوش اوولولو او د تکبیر له نعروسره بدرګه شوه.
په افغانستان کې د پردیو په اشاره حکومت نشي کیدلای
له درس څخه وروسته د دورې دپای دورځې په اړه جوړه شوې غونډه پیل شوه، دستیج چارې یې (استادعبدالله نصرت د روداتو جمعیت اصلاح مسؤل) به غاړه درلودې، دغونډې په لومړي سر کې  دهیواد مشهور اونامتو لیکوال او د افغانستان دجهاد دلومړیولیکوقاید استادمحمدزمان مزمل عالمانه وینا واوروله او دهیوادپرانقلابي دوراوروانوحالاتو یې لنډه رڼا واچوله اوویې ویل چې:  افغانستان دافغانانو دی اودهمدې وطن اصلي بچیان به دلته حکومت کوي، هیڅوک نشي کولای دپردیو په اشارو دلته حکومت وکړي.
محترم استاد په غونډه کې په ډیرتعداد دمسلمانانو د راټولیدو څخه خوښي څرګنده کړه اوویې ویل دازموږ لخوا یوه سروې ده اوموږ په دې نتیجه ورسیدو، چې دا ولس یوژوندی اودین دوست  ولس دی اوتاسې پدې راتللو او دومره ګڼ شمیر کې را ټولیدلو سره داثابته کړه چی افغان ولس یو مسلمان ولس دی.
استاد په ټینګار سره وویل:  ولسونه باید ویده پاتې نه شي، د دښمنانوتوطیې باید وپیژني اوپه وړاندې یې باید محکم ودریږي.
استاد مزمل  له جمعیت اصلاح څخه دزړه له کومې مننه وکړه چې په داسې شریطو کې د دین د اقامې لپاره کارکوی.  وروسته دجمعیت اصلاح  د ځوانانومسؤل محترم دکتور رحمت الله زاهد عالما نه وینا واوروله اوویې ویل چې تاسې دلته په خپل راتګ سره دا ثابته کړه چې په زړونوکې مو دقرآن شمعې بلې دي اوبا احساسه قوم یاست، جمعیت اصلاح ستاسې ددې احساس قدرکوي، ستاسې ددې احساس ترجماني کوي او ستاسې دا احساسات به نړۍ ته رسوي.
ځوانان دې د جمعیت اصلاح ترشا ودریږي
نوموړي په ځوانانو غږ وکړ چې راویښ شي اودجمعیت اصلاح ترشا ودریږي ترڅو مو هیواد په اسلام سره اباداوسوکاله شي.
ورپسې د جمعیت اصلاح دمرکزي شوری غړي او د ستراتیژیکومطالعاتود مرکزرئیس محترم دکتورصفت الله قانت ارزښتناکه ویناواوروله اودجمعیت اصلاح افغانستان په نماینده ګۍ یې ددورې دټولوګډونوالواوپه خاص ډول دهغه کسانوڅخه مننه وکړه چې پ

ه دورې کې يط خدمت او منډې ترړې کړې دي.

دمحترم دکتورصاحب دخبروڅخه وروسته شیخ القرآن مولانا عبدالصبور لخوا اجتماعي دعا وشوه اودمازدیګردلمانځه په اداکولو سره  دوره پای ته ورسیده
د یادونې وړ ده چې په دوره کې د وروڼو تعداد ترڅلورزرواو دخویندو تعداد ترلسو زرو شا او خوا وو اودخویندولپاره دپردې او جلا ځای خاص انتظام شوی وو.