په استراليا كې د ميشتو افغان ځوانانو علمي او تفريحي رحله سرته ورسيده

د يكشنبې په ورځ د دسمبر په ۱۲ مه نيټه د استراليا د ويكتوريا په ايالت كې د ميل بورن په ښار كې د ميشتو افغان ځوانانو ، محصلینو او متعلمینو لخوا يو علمي او تفريحي رحله يا علمي سير سرته ورسيده. په رحله كې د ديرشو بااحساسه ځوانانو برسيره د كابل پوهنتون دري پخوانيو استادانو هم برخه اخستى وه.

دغه علمي او تفريحي رحله د ډاكټرسيدخالدراشد چې د روغتيا د نړيوال سازمان ( WHO لخوا د يو علمي سيمينار لپاره هلته تللي وو په ابتكار او د استراليا ميشتو افغاني ځوانانو په ليوالتيا د [اخوت ما قوت ما] ترسرليك لاندې سرته ورسيده.

الحمد لله رحله به ډيره ښكلى بڼه پيل شوه . د رحلې خدماتي مسؤليت د غزني ولايت اوسيدونكي ښاغلي نقيب الله ، د خوست ولايت اوسيدونكي ښاغلي علي زى مسلميار او د كنړ ولايت اوسيدونكي ښاغلي حاجي عاشق الله لخوا سرته ورسيده . د  رحلې فرهنګي مسؤليت د تخار ولايت اوسيدونكي استاد خليل الرحمان حامد په غاړه وو. د نطاقۍ دنده ځوان متعلم ښاغلي سيدعبدالله هاشمي پرمخ بيوله.
دغه علمي سير د جيلس په نوم يو ښكلي پارك كې سرته ورسيده . په استراليا كې ميشتو افغاني ځوانانو د يكشنبې په سهار د خپلو خپلو ځايونو څخه د جيلس په نامه يو مشهور پارك ته ځانونه راورسول . له هاغه ځايه بيا د جيلس پارك دوهمې برخې ته چې ډيره ستره او ښكلې برخه ده په منظم ډول سره ولاړل . د رحلې پروګرام د كمكي ځوان عبيد الرحمان لخوا د قرآن كريم  دمباركو ايتونو په تلاوت سره پيل شو. ورپسې ښاغلي استاد خليل الرحمان حامد په اسلامي دعوت او بلنه كې د منظم كار په اهميت او بيلابيلو ابعادو رڼا واچوله .

د استاد خليل الرحمان څخه وروسته ډاكټر سيدخالدراشد د ځوانانو په مسؤليت وغږيده او په دې اړه يې په استراليا كې اوسيدونكو ځوانانو ته د خپل ديني او ملي مسؤليت په اړه هر اړخيزه خبره وكړه.
د ډوډۍ ، ريفريشمنټ او تفريح نه وروسته د رحلې ټول برخوال د ماسپښين د لمانځه د ادا كولو  لپاره د ډافټن په سيمه كې د افغانانو مسجد ته ستانه شو چې هلته د لمانځه نه سمدستي وروسته د رحلې دوهمه برخه [زمونږ د ټولنې ستونزې او د حل لارې يې] ترعنوان لاندې د يو وركشاپ په بڼه پيل شوه.

ددغه وركشاپ په ترڅ كې ټول ځوانان په څلورو ګروپونو وويشل شو او هرګروپ خپل نظريات د يو اوږده بحث څخه وروسته د يو كاغذ په مخ خلاصه كړل چې بيا په عمومي ناسته كې د هر ګروپ د نماينده لخوا ولوستل شو.
رحله د مازديګر په پنځه بجو په داسې ډول پاى ته ورسيده چې ځوانانو د اسلامي دعوتي كار لپاره خپله ژمنتيا ښوده او دداسې برنامو او پروګرامونو څخه يې خپل ملاتړ او خوښي څرګندوله. يو ځوان وويل چې دا لومړى ځل دى چې مونږ له داسې يو پروګرام سره مخ كيږو چې له يوې خوا تفريحي بڼه لري ، د ځوانانو ترمنځ د مينې او محبت فضا رامنځ ته كوي او له بل پلوه مونږ د خپل دين او خپلو ارزښتونو سره تړي. دغه راز يو بل ځوان وويل چې دا لومړى ځل دى چې يواځې ځوانان په خپلو منځونو كې راټوليږي او د خپل وطن او خپلې ټولنې په اړه د خپل زړه دردونه شريكوي او په ګډه يې د حل په لټه كې فكر كوي.
ديادونې وړ ده چې يواځې د ويكتوريا په ايالت كې د پنځه زرو څخه زياتې افغاني كورنۍ ژوند كوي چې له بده مرغه تراوسه هيڅ تربيوي او روزنيز پروګرام يې د ځوانانو او تنكيو ځوانانو لپاره نه شته دا په داسې حال كې ده چې په استراليا كې د ميشتو نورو مسلمانو قومونو لكه تركان ، البانويان ، لبنايان ، پاكستانيانو اوداسې نورو قومونو د ځوانانو لپاره ځانګړي پروګرامونه موجود دي.