په كندهار ولايت كې د ټولنيز روژمات غونډه جوړه شوه

راپور: عبدالنصير مرستيال

د يك شنبې په ورځ د سنبلې په پنځلسمه نېټه جمعيت اصلاح د كندهار ساحوي دفتر د روژماتې غونډه جوړه كړه چې شا او خوا ۱۰۰ تنو علمي او ملي شخصيتونو په كې ګډون كړى وو، غونډه د جمعيت اصلاح دفتر ته نژدې د زنداني صيب د كور په انګړ كې د مازديګر په ۴:۳۰ بجو د حافظ نقيب الله لخوا د قرآن كريم د څو مباركو آيتونو په لوستلو سره پيل شوه.

د غونډې وياند د كندهار د جمعيت اصلاح مسؤل مولوى صيب صديق الله ميوندوال وو، ښاغلي ميوندوال صيب پيليزه وينا وكړه او د ټولنيز روژه ماتي ګډونوالو ميلمنو ته يې ښه راغلاست ووايه او له هغوى نه يې مننه وكړه چې د خپلو ټولو مصروفيتونو او بوختياوو سره يې د جمعيت اصلاح بلنه قبوله كړه او په دغو مباركو شيبو او مباركه غونډه كې شريك شول.

نوموړي په لنډه توګه سره د جمعيت اصلاح په فعاليتونو او اهدافو رڼا واچوله او د جمعيت اصلاح لخواپه ټول افغانستان كې تر سره شوي فعاليتونو يې واضح كړل چې جمعيت اصلاح په افغانستان كې د څه له پاره كار كوي او څه اهداف لري؟
وروسته د كندهار ولايت يو تن مولوى صيب ښاغلي استاذ سعد الله صيب د ( دعوة الى الله) تر سر ليك لاندې مختصره وينا وكړه او دعوت ارزښت اړوند يې ګډونوالو ته مالومات وركړل.

بياد هغه نه وروسته د تعليم الاسلام ولسي راډيو رئيس شيخ الحديث مولوى صيب محمد عمر خطابي د ځوانانو د مسؤليت په اړه وينا وكړه او ځوانان يې خپل مسؤليت ته متوجه كړل، هغه زياته كړه چې ځوانان بايد د ژوند په دې حساسه مرحله كې خپل مسؤليت درك كړي او له دې فرصت څخه پوره ګټه لاسته راوړي، او داسې ونه شي چې دغه د ځوانۍ شپې او ورځې په لهب او لعب ور باندې تېرې شي. تر هغه وروسته يې د روژې مباركې د فضليت په اړه هم لنډه وينا وكړه.

وروسته د مازديګر د لمونځ  په جماعت سره ادا شوه او تر لمانځه وروسته د اشرفيې مدرسې د تاليف او ترجمې سر پرست مولوى صيب عبد الهادي حماد د ( ټولنې د اصلاح) په اړه خاصه وينا واوروله او د كورنۍ  او د ټولنې د اصلاح له پاره يې د هر فرد مسؤليت ته په اشارې سره زياته كړي چې دا د ټولنې د هر فرد مسؤليت دى چې د كورنۍ او ټولنې د اصلاح په برخه كې هر اړخيزه كار وكړي.
او په اخر كې شيخ القرآن و التفسير او د جمعيت اصلاح د مركزي شوراى غړي ښاغلي استاذ محمد مزمل اسلامي صيب د( جمعیت اصلاح د اهدافو) په اړوند ګډونوالو ته مالومات وركړل. هغوى په خپلو خبرو كې د جمعيت اصلاح اساسي موخې په لاندې ډول تشريح كړي:

۱- په ټولنه كې د ين د صحيح فهم خپرول.
۲- ټولنه د جزيي او فرعي مسائلو او اختلاف څخه د دين اساسي او سترو موخو ته متوجو كول او د الله تعالى پر توحيد او د نبې كريم صلى الله د سنتو اتباع باندې راجمع كول.
۳- خلك د بندګانو د عبادت څخه د يو الله تعالى عبادت ته رابلل.
۴- خلك د نهضت اسلامي د منظم كار او اهدافو سره تړل.
۵- ټولنه او امت د منظم او ټولنيز كار كولو ته تشويق كول
او په اخر كې يې دې خبرې ته اشاره وكړل چې زموږ دښمنان كه هغوى اروپايان دي او كه امريكايان د خپلوپروګرامو له پاره سل كلن پلان لري او منظم كار تر سره كوي خو يوازې اسلامي امت دى چې د خپلو سترو اهدافو له پاره منظم پلان نه لري او هم دا وجه ده چې د غربت او ذلت سره مخ او ګريوان دى. په ټولو خلكو يې ږغ وكړ چې د افغانستان د اسلامي تحريك ملاتړ وكړي او په منظم كار لاس پوري كړي
د اسلامي صيب له وينا څخه وروسته او لږ وخت مخكې له روژماتي څخه ټولو ګډونوالو ته امر وشو چې د روژمات تر وخت پورې مسنون اذكار ولولي.
بيا د ماښام د اذان سره سم په ټولو ګډونوالو خرما او  شربت ووېشل شول چې هغوى روژې ماتې كړې، د روژماتي څخه وروسته د ماښام لمونځ ادا شو او د لمانځه څخه وروسته د غونډې ګډونوالو  په شريکه سره ډوډۍ وخوړه.
غونډه له ډوډۍ وروسته پاى ته ورسېده، البته ځينو ملګرو د اوويشتمه د شپې په مناسب په ټولنيزه توګه شپه تر سهار په عبادت تېرولو فيصله وكړه چې يو شمېر ملګرو په كې ګډون وكړ.