په خوږياڼو کې د مکې د فتحې د ورځې په وياړ غونډه

راپور: محمدګلاب توحيديار

دننګرهارولايت په خوږياڼو ولسوالۍکې دمکې دفتحې په وياړ يوه شانداره غونډه جوړه شوه.

دروان کال دمبارکې روژې په شلمه  نيټه  جمعيت اصلاح دخوږياڼو څانګې لخوا دکږې بازار په جامع مسجدکې دمسلمانانو دلويو لاسته راوړنو اوفتوحاتو څخه دمکې دفتحې په وياړ يوه پرتمينه غونډه جوړه شوه ،چې نېژدې دوه زره تنو ديني عالمانو ،قومي مشرانو، دپوهنتون اولېسو استادانو ، محصلينو ،متعلمينو اوديادې سيمې په دين مينو وګړو پکې ګډون کړى ؤ.
غونډه پداسې حال کې چې قاري خالد مخلص يې وياندويې کوله دقاري صاحب  غلام رحمان   په تلاوت پيل شوه ،ورپسې دجمعيت اصلاح دخوږياڼوڅانګې مسؤل اودننګرهارپوهنتون استاد مولوي نصيراحمد محب ټولوګډنوالو ته ښه راغلاست اوهرکلى ووايه دغونډې په اهميت يې خبرې وکړې اودايې دجمعيت اصلاح وجيبه وګڼله چې خپل درانه هيوادوال له خپل اسلامي او وياړلي تاريخ سره تړلي وساتي .
نبوي سيرت زمونږلپاره غوره بېلګه ده
دهيوادجيدعالم اودجمعيت اصلاح دنشراتو مسؤل مولوي صاحب محمدنعيم جليلي لومړى په نبوي سېرت لنډه رڼاواچوله او ويې ويل دخوږنبي صلى الله عليه وسلم په ژوند کې زمونږلپاره په هرډکرکې   دکوردمشر لپاره  ،دمعلم اوښوونکي لپاره ،دغازي اوقومندان لپاره ،او آن ديوعادي انسان لپاره  نيکه اوبهتر بېلګه ده .دمسلمانانولپاره يې دوه مسائل ډېرضروري اوبنيادي وګڼل لومړى دالله جل جلاله په کلام پوهيدل اوپه غوښتنو يې عمل کول ،اودوهم دپيغمبر صلى الله عليه وسلم دژوندنه ځان خبرول نوځکه بايد په هرمسجد ، کور،ښوونځي ،دوکان ،حجره اوديره کې دسېرت درسونه عام شي.
دپيغمبرصلى صلى الله عليه وسلم غزاګانې :
دنبي کريم صلى الله عليه وسلم  دژونديوه برخه   غزوات دي ، چې خپلو ورونو اوبچيانو ته يې بايد  وروښايو چې پدې لاره کې هغه صلى الله عليه وسلم زخمي شويدى ،لوږې اوتندې يې تېرې کړيدي ،مبارک غاښونه يې شهيدان شوي اومونږته يې يوشمېر معيارونه راپه ګوته کړيدي چې فتح په ډيرو وسائلونده بلکې الله  ته په نزديکت کې ده ، بل داچې فاتح يوې سيمې ته داخليږي نودهغه ځاى مسؤليت به په غاړه اخلي که په چاظلم کيږي نوالله جل جلاله به يې له ده څخه پوښتنه کوي ،بل داچې داستعمارګرسره يې لوى فرق همدادى  چې استعمارګرکومې سېمې ته داخل شي هلته په فساد بربادۍ اوورانۍ لاس پورې کوي اودهغه سېمې مشران ذليله کوي ،مګرفاتح هغه سېمه رغوي او وګړو اومشرانوته يې په درنه سترګه کوري  اوپدې هم بايد پوه شو چې مسلمانان په څه شي کاميابيږي اوپه څه شي ناکاميږي داځکه ځينې داسې مسائل شته چې بايد په نظرکې ونيول شي مثلاً دحنين په غزوه کې مسلمانانو دکبر له امله ماتې وخوړه، داحد په غزوه کې يوې وړې ډلې دنبي صلى الله عليه وسلم دامرمخالفت کړى ؤ نوځکه يې ماتې وخوړه .خوبرعکس کله چې مسلمانان الله جل جلاله ته نېژدې شوي نوبيا لږشمېرمسلمانان په زيات شمېرکفاروبريالي شويدي لکه داحدغزا ، دفارسيانو سره جګره چې دهجرت په ديارلسم کال دمثنى ابن حارث رض په مشرۍ  ٨٠٠٠  اته زره مسلمانان په يولک فارسيانو بريالي شوه چې دفارسيانو   ٩٠٠٠٠  نوي زره تنه ووژل شوه .همداراز استاد دمکې دفتحې کيسه په پوره تفصيل سره وړاندې کړه چې دحاضرينو دتوجو وړ وګرځيده  اودتکبيرونو په زم زمو يې بدرګه کړه.
دکږې بازار جامع مسجد خطيب مولوي صاحب نورالله ناصح له ټولوګډونوالو مننه وکړه چې په دومره زيات شمېر ورونه غونډې ته دلرې لرې سيموڅخه راغلي دي جمعيت اصلاح ته يې هم دالله جل جلاله له دربارڅخ دلا زيات توفيق غوښتنه وکړه چې داډول پروګرامونه نورهم ګړندي کړي .

غونډه دمولوي  صاحب محمد هاشم لخوا ددعاء په لوستلوپاى ته ورسيده.