اصلاح رسنیز ګروپ د روژه ماتي غونډه وکړه

راپور: عبدالفتاح جواد
د شنبې په ورځ ماښام د جمعیت اصلاح د نشراتو او فرهنګي څانګې ( اصلاح میډیا ګروپ ) په کابل کې د سید جمال الدین افغان په تالار کې د روژه ماتي ( افطاري) ګډه غونډه وکړه چې د مازدیګر په ۵:۴۰ بجو پیل او د ماسخوتن لمانځه له ادا کولو سره پای ته ورسیده او د جمعیت اصلاح د رسنیو ( اصلاح غږ رادیو، اصلاح انلاین ویب سایټ، ملي اصلاح اوونیزې او نورو ) اړوند لیکوالانو، ژورنالیستانو او کارکونکو  او یو شمیر نورو چې په نورو رسنیو کې کار کوي ، پکې حضور درلود، چې شمیر یې  ۵۰ تنو ته رسیده.
غونډه د قاري قبول احمد نثاري لخوا د قرآن عظیم الشان د څو مبارکو آیتونو په لوستلو سره پیل شوه، ورپسې د ملي اصلاح اوونیزې مسئول مدیر عبد الفتاح جواد د غونډې ګډونوالو ته ښه راغلاست ووایه او د پروګرام په کیفیت او اهمیت یې رڼا واچوله.
بیا د جمعیت اصلاح د نشراتو څانګې مسئول او مرکزي شورا غړي استاد محمد نعیم جلیلي د تقوا د مفهوم او د ژورنالیزم ( تبلیغ الدین ) په جهاد بوختو خلکو  کې د تقوا  ضرورت او بیا د رسول الله صلی الله علیه وسلم د ماثورو دوعاګانو په مفاهیمو ، له سوز او درد نه ډکه ایماني وینا واوروله او پدې یې ټینګار وکړ چې باید د خپل ګران پیغمبر د متابعت او پیروي په اساس په هر ډول شرایطو کې خپل رب او پالونکي ذات ته د اړتیا، عجز، خضوع او خشوع لاسونه پورته کړو او دوعا ترې نه وغواړو.
د ماښام لمانځه له ادا او ډوډۍ خوړاو نه وروسته یوځل بیا استاد محمد نعیم جلیلي د اصلاح رسنیز ګروپ د معرفي او په ټولنه کې د هغه د رسالت او له نورو رسنیو سره نه د هغه د ځانګړینو په اړه وینا وکړه او ویې ویل: زه په پوره ډاډ سره ویلی شم چې اصلاح رسنیز ګروپ یوازینی ګروپ دی چې قیادت یې افغانی دی، احساس یې افغانی دی، پیغام یې افغانی دی او پیسه یې هم افغانۍ ده ، ځکه چې  د خپلو مسلمانو هیواد والو په هراړخیز ملاتړ خپرونې لري.
استاد جلیلي زیاته کړه: د نورو رسنیو سره زمونږ د رسنیو توپیر دادی چې مونږ په خپله ټولنه کې د اسلام اصلي تصور او برداشت خپروو او له دین نه غلط او ناسم برداشتونه سموو او هغه د الله(ج) د کتاب او د رسول الله صلی الله علیه وسلم د سنتو مطابق جوړوو، مونږ هغه ارزښتونه چې له دین او ملي مصالحو سره مطابقت او سمون لري ساتو او پیاوړي کوو او چې مخالف وي نو په خلاف یې کار کوو، مونږ د حوادثو او پیښو په دوران کې د ملت سمه توجیه کوو، ، مونږ د خپل ملت او هیواد مصالح او زیانونه د شریعت په چوکاټ کې ګورو او په اړه یې دریځ نیسو.
استاد زیاته کړه: اصلاح رسنیز ګروپ په هیواد او ټولنه کې د لارښوود او توجیه ګر رول لري او د ملت د قضایاوو سره د یوه دردمن او بامسئولیته مومن بچي په څیر چلند کوي ، په ښو چارو کې د هرچا سره مرسته او سیالي کوي خو په بدو چارو کې نه یوازې دا چې مرسته نه کوي بلکې برم وړاندې یې دریځ نیسي، مونږ په اصلاح میډیا ګروپ کې هره شیبه او هره کلمه عبادت ګنو او له الله(ج) نه یې اجر او ثواب غواړو.
بیا د غونډې ګدونوالو د اصلاح میډیا ګروپ د کار په اړه په زړه پورې خاطرې بیان کړې او مناسب او سم وړاندیزونه یې هم وړاندې کړل.
وروسته د جمعیت اصلاح د مرکزي شورا رئیس استاد نصیر احمد نویدي د غونډې بهیر په ستایلو سره وینا وکړه او د هغو ټولو وروڼو نه یې مننه وکړه چې د اصلاح رسنیز ګروپ کې په کار او فعالیت بوخت دي او د خپل دین ، ملي ګټو، خپلواکۍ، هویت، کلتور او ارزښتونو نه دفاع کوي.
استاد د اصلاح میډیا ګروپ د غړو او د غونډې د ګډونوالو نه ټینګه ژمنه او وعده واخیسته چې د خپلو څیړنیزو لیکنو، مقالو، شعرونو، راپورونو په لیکلو، کارتونونو په رسمولو او رادیویي ویناوو سره نور هم ددغه رسنیز ګروپ په بیاوړتیا کې هڅه وکړي.
استاد نویدي د غونډې د ګډونوال او د هیواد د تکړه او ویښ ځوان اسرار احمد کریمزي له هغو هڅو او همکاریو نه هم په ځانګړې توګه یادونه وکړه چې د اصلاح انلاین ویب سایټ په جوړولو کې یې کړې دي.
غونډې ته په لندن کې د یتیمانو سره د مرستو افغاني ټولنې مسئول استاد مصطفی منګل هم وینا وکړه، د جمعیت اصلاح هڅې او فعالیتونه یې وستایل او د خپلې ټولنې په کارونو، فعالیتونو او له یتیمانو سره د هغې په همکاریو یې رڼا واچوله.
د یادونې وړ ده چې د دغه روژه ماتي ټول لګښت په سعودي عربستان کې میشت ورور استاد فضل الله ممتاز په غاړه اخیستی وو .
غونډه د خوست د شیخ زاید پوهنتون د شرعیاتو پوهنځي رئیس استاد عبد الغفار صافي لخوا د دوعا په لوستلو سره پای ته ورسیده.