د ټولنیز روژه ماتي ستره غونډه جوړه شوه

د دوشنبې په ورځ د سنبلې په لومړۍ نیټه دجمعیت اصلاح د عامو فعالیتونو څانګې د روژه ماتې یوه ستره غونډه جوړه کړه چې شا او خوا ۲۵۰ تنو علمي او ملي شخصیتونو پکې ګډون کړی وو، غونډه د ګرین کابل په هوټل کې د مازدیګر په ۵ بجو د قاري صاحب شمس الحق لخوا د قرآن عظیم الشان څو مبارکو آیتونو په لوستلو سره پیل شوه

د غونډې ویاند مولوي نقیب الله حمید وو، وروسته د جمعیت اصلاح معاون مولوي مظهرالدین فایز پیلیزه وینا وکړه او د ټولنیز روژه ماتي ګډونوالو میلمنو ته یې ښه راغلاست ووایه او له هغوی نه یې مننه وکړه چې د خپلو ټولو مصروفیتونو او بوختیاوو سره یې د جمعیت اصلاح بلنې ته لبیک ووایه او په دغو مبارکو شیبو او مبارکه غونډه کې شریک شول.

نوموړي په لنډه توګه د جمعیت اصلاح په فعالیتونو او کارونو چې د هیواد په لروبر کې یې ترسره کوي رڼا واچوله او ګډونوالو ته یې وویل: تاسې پوهیږئ چې د فتنو او فساد دور دی، زمونږ د ولس د عقیدې ، هویت، تاریخ او ارزښتونو په خلاف ډلییز کار روان دی، زه یوازې د یوې موسسې یوه پروژه ستاسې مخې ته ږدم او هغه دا چې ۱۵۰۰۰ کورنۍ یې ترپوښښ لاندې نیولې دي او غواړي د هغوی بچیان په نڅا او سندرو ویلو کې وروزي ، او کله چې پدې اړه د هلکانو او نجونو ګډه غونډه جوړوي نو دغو کورنیو ته ډاډ ورکوي چې ډیر ژر به ستاسې بچیان یوځای سندرې ووایي او ګډه نڅا به وکړي.

هغه په ټینګار سره وویل چې که پدې اړه بې تفاوته پاتې شو نو لیرې نده چې د فساد دغه اور زمونږ کورونو ته هم را ننوزي او هرڅه رانه وسوزوي.

وروسته د جمعیت اصلاح د هراړخیزو فعالیتونو یو لنډ انځوریز فلم نندارې ته وړاندې شو چې د ګډونوالو د توجه وړ وګرځید.

بیا د هیواد ستر سیاسي شخصیت او پیاوړي لیکوال استاد محمد زمان مزمل وینا وکړه او ویې ویل: دظاهرشاه په دیموکراسۍ کې په پوهنتون کې جومات نه وو خو یو شمیر خلکو کار وکړ او کابل یې داسې حد ته ورساوه چې نن  زمونږ هیواد په خپل دوهم امتحان کې قرار لري.

استاد زیاته کړه: جمعیت اصلاح د هیواد په سطحه په بیلابیلو ولایتونو او سیمو کې خیر او اصلاح کارونه کوي او کرار کرار دغه جریان هم یوې تجربې ته مخ کیدونکی دی ، هیله لرم چې په نیت کې به یې اخلاص او للهیت وي ، ښه کاردی او په ځانګړې توګه په ځوانه طبقه کې ډیر اغیز لري ، زه ورته دوعا کوم چې الله(ج) دې یې کامیاب او موفق لري.

استاد مزمل په ولس غږ وکړ چې د دغه دعوت ملاتړ وکړي او ویې ویل: زه چې حالاتو او شرایطو ته ګورم ، نو یو خطرناک راتلونکی لرو او له یوه ناوړه حالت سره مخ کیدونکي یو نو ځکه خو باید ددغه جریان ملاتړي شو، د جمعیت اصلاح غږ ته باید مثبت او قوي ځواب ووایو او هراړخیز تایید یې وکړو، زه یقین لرم چې زمونږ په ملت کې اوس هم وتره او جذبه شته.

ورپسې د هیواد پیاوړي عالم او د فخري عالي دارالعلوم مهتمم مولوي عبد السلام عابد خبرې وکړې او ویې ویل: الحمد لله مونږ مسلمانان یو، په خپل دین ویاړو، خو اسلام له مونږ نه څه غوښتنې لري چې باید پوره یې کړو، یو دا چې په خپل دین ځان پوه کړو او له هغه نه سم او سهي تصور او برداشت واخلو، بل دا چې خپل دین نورو ته ورسوو، د خپراوي او تبلیغ لپاره یې کار وکړو ، نو که غواړو چې دغه دین د هیواد او نړۍ ټولو برخو ته ورسیږي باید یوڅه خلک خپل وخت، مال، ځان او هرڅه د الله(ج) په لار کې وقف کړي.

مولوي عابد زیاته کړه: جمعیت اصلاح یوه دیني ډله ده او ددې لباره جوړه شوې ده چې دین په ځان عملي کړي او نورو ته یې ورسوي، له عقیدې، اخلاقو، هویت، ارزښتونو او ننګ نه دفاع وکړي او د همدغه هدف د تحقق او لاسته راوړلو لپاره زمونږ ملت یونیم میلیون شهیدان ورکړي دي خو پدې باید پوه شو چې یوازې هغه مهال دغه کار ممکن دی چې کله ټول مسلمانان په خپل ټول توان او قوت سره د دغو اهدافو ترشا ودریږو.

بیا د جمعیت اصلاح قیادي شخصیت او د مرکزي شورا غړي دوکتور صفت الله قانت وینا وکړه او له برخوالو نه په مننې سره یې وویل: زه له تاسې ټولو نه مننه کوم چې زمونږ بلنه مو ومنله او پدې دیني غونډه کې را سره شریک شوئ.

نوموړي زیاته کړه: مونږ د تاریخ په حساسو شرایطو کې قرار لرو ، طوفان په مخه کړي یو او که متوجه نشو نو لا مو پسې وړي، نن چې زمونږ په هیواد کې کوم فکري ، کلتوري او اخلاقي یرغل روان دی او د تلویزیونونو او رادیو ګانو له لارې کوم فساد خپریږي نو یقینا مونږ ټولو ته د خطر زنګ دی.

دوکتور قانت وویل: جمعیت اصلاح د فساد په وړاندې را پورته شوې ډله ده او اصلاح ته کارکوي، د بدۍ پر وړاندې دریدلې ډله ده ، نیکي او خیر خپروي ، د خپل دین، هیواد، هویت او ارزښتونو نه دفاع ته راپاڅیدلی جریان دی او لدې پرته بل هیڅ مقصد او غرض نلري.

نوموړي زیاته کړه: ددغه راز غونډو او پروګرامونو نه زمونږ موخه داده چې خپله اصلاحي برنامه او پروګرامونه له خپل مسلمان ولس سره شریک کړو، ځکه چې دا د ټولو ګډه برنامه ده او د ټولو مشترک مسئولیت دی او باید ټول پکې برخه واخلو.

وروسته بیا د غونډې ګډونوالو د خپل ایماني رسالت په رڼا کې او د تکبیر د نارو په بدرګه په نوبت باندې د جمعیت اصلاح د پروګرامونو نه د ملاتړ او تقویې په موخه خپلې مرستې اعلان کړي چې نزدې څلویښت زره ډالرو ته رسیدې او یوه ورور پکې دوه نمرې ځمکه وقف کړه.

د یادونې وړ ده چې تردې وړاندې هم په کابل او نورو ولایتونو کې دغه راز پروګرامونه شوي دي چې د هیواد ملي سوداګرو او شتمنو شخصیتونو د خپل دیني او ایماني مسئولیت پر اساس پکې پوره مالي مرستې کړې دي او دغه لړۍ به په راتلونکي کې هم دوام لري او په پوره ډاډ او باور سره ویلی شو چې که دغه مرستې دوام وکړي نو زمونږ د هیواد راتلونکی به هم د ډاډ وړ شي.
هیره دې نه وي چې ددغه روژه ماتي ټول لګښت او مصرف یو تن ملي شخصیت په خپلو اوږو اخیستی وو.

غونډه د روژه ماتي نه وروسته د دوعا په لوستلو سره پای ته ورسیده.