اصلاح میدیا ګروپ رحله وکړه!!

د جمعې په ورځ د زمري (اسد) په ۸مه نیټه په کابل کې د جمعیت اصلاح د رسنیو ( اصلاح میدیا ګروپ) د کارکوونکو او همکارانو لپاره یوه رحله ترتیب شوه، که څه هم چې نزدې پنځوسو تنو ژورنالستانو ، لیکوالانو او ادیبانو ته بلنه ورکړل شوې وه خو ایله ۳۰ تنو وکولی شول چې په دغه مهم او خوندور پروګرام کې برخه واخلي او نورو یې د معقولو او منل شویو عذرونو له امله د نه ګډون اجازه غوښتې وه.

د رحلې عمومي مسئول د اصلاح غږ رادیو مدیر ښاغلی عبد الظاهر حمیدي وو ، خو  برنامه د اصلاح انلاین مدیر ښاغلي محمدیونس برهان پرمخ بیوله ، د رحلې پیل له خوشحال مېنې د نشراتو له پخواني دفتر نه وشو.
د رحلې لپاره د پغمان سیمې یوه باغ (د جرمنیانو زراعتي فارم یا قوریې) ساحه ټاکل شوې وه ، سهار ۷ بجې حرکت پیل شو، په موټر کې د سفر دوعا ویلو وروسته د شعر ویلو مسابقه پیل شوه چې ډیره په زړه پورې او خوندوره وه.

باغ ته په رسیدو سره لومړی تعارف او پیژندګلوي وشوه او بیا ښاغلي عبد الظاهر حمیدي د رحلې په موخو او اهدافو رڼا واچوله، ورپسې ګډونوال په ( د سیدجمال الدین افغاني، استاد خلیل الله خلیلي او استاد ګل پاچا الفت ) دریو ګروپونو وویشل شول .

په رحله کې لومړی ویناوال د جمعیت اصلاح مرکزي شورا رئیس استاد نصیر احمد نویدي وو چې د رسنیو په معاصر کشمکش کې د جمعیت اصلاح د رسنیو په رول وغږید او ویې ویل : مونږ خپل دعوتي او رسنیز بهیر په کابل کې له یوې میاشتینۍ مجلې (مستقبل) نه پیل کړی وو چې نن د الله (ج) په توفیق او تایید او د مسلمان ولس په ملاتړ ګڼې رسنۍ لرو چې د اصلاح غږ رادیو، اصلاح انلاین ویب پاڼه، ملي اصلاح اونیزه، قافله میاشتینۍ فکري څیړنیزه مجله، په ختیځ افغانستان کې د ژوند میاشتینۍ مجله، په لویدیځ افغانستان کې معرفت میاشتینۍ مجله، د اخلاق او معرفت وېب پاڼه، د وردګو نه خپریدونکې اذان مهالنۍ مجله ، د فراه نه خپریدونکې مهالنۍ اسوه مجله ، دهرات نه د خویندو مهالنۍ بینه مجله د یادونې وړ دي.

استاد د رسنیو د دومره زیات کمیت ترڅنګ د هغوی په کیفیت ښه کولو باندې ډیر ټینګار وکړ ترڅو په ښه بڼه د دعوت الی الله او اقامت دین پیغام  ټولنې ته ورسوي.

د جمعیت اصلاح د تربیت او مهارتونو د ودې څانګې مسئول استاد محمدیونس ابراهیمي هم د لنډ وخت لپاره په رحله کې شریک شو او له ګډونوالو نه یې لیدنه وکړه.

بیا د غرمې ډوډۍ له خوړلو نه وروسته ګډونوال د جمعې د لمانځه ادا کولو په موخه نزدې جوماتونو ته لاړل.

د لمانځه نه وروسته په ۲:۳۰ بجو د هیواد د تکړه او وتلي شاعر ښاغلي پیرمحمد کاروان په مشرۍ مشاعره جوړه شوه چې دکاروان صاحب په ګډون ګڼو وروڼو لکه خاکسار وقار، عبد البصیر عتق زي، احمد ارشاد، سردارمحمد دیندارخیل او نورو پکې خپل شعرونه ولوستل.

وروسته د هیواد وتلی سیاستوال او پیاوړي لیکوال او شاعر استاد محمدزمان مزمل وینا وکړه، د هیواد اوسنی حالت یې وڅیړه او د افغانستان د ویش شوم او ناولي پلان ته په اشارې سره یې د استعمار له دسیسو نه پرده پورته کړه.

بیا د افغانستان د ستراتیژیکو څیړنو د انستیتوت مشر دوکتور صفت الله قانت وینا وکړه او ژورنالستان او لیکوالان یې په قلمي جهاد کې لا فعالیدو ته وهڅول او ټینګار یې وکړ چې اوسنی استعمار هراړخیزې اجنډاوې لري چې یوه مهمه برخه یې کلتوري یرغل دی ، چې د هغه لپاره یې ګڼ تلویزیونونه او رادیوګانې فعالې کړې دي نو د اصلاح رسنیز ګروپ مهمه دنده داده چې په دغه ډګر کې مهم او قوي ګامونه واخلي ، او ولس د استعمار له دسیسو او کلتوري او اخلاقي تروریزم نه خبر کړي.

رحله مازدیګر پنځه بجې د جوایزو په ویشلو او دوعا لوستلو سره پای ته ورسیده.

د یادونې وړده چې اصلاح میدیا ګروپ د هیواد په لر او بر کې د یوه فعال رسنیز ګروپ په توګه نزدې ۸۰ تنه غړي او همکاران لري، چې ددغه ګروپ له ګڼو رسنیو سره همکاري لري او انشاء الله چې په راتلونکي کې به یې د غړو د زیاتیدو او رسنیو قوي کیدو سره د هیواد په مطبوعاتي ډګر کې د یوه پیاوړي رسنیز محور په توګه وځلیږي.