په ختيځ زون کې د جمعيت ا صلاح د فعاليتونو په اړه غونډه

راپور: محمد ګلاب (توحيديار)

جمعيت اصلاح چې د ولس او ملت له منځ څخه راټوکيدلې ازاده ديني اوغيري دولتي ټولنه ده تل هڅه کوي چې خپلې کړنې او پلانونه له خپل خواخوږي ملت سره شريک کړي دا ځکه چې هر خوځښت او جريان هغه وخت بريالى او کامياب وي چې د الله(ج) مرسته او کومک ورسره وي او د خپل ولس له ملاتړ څخه برخمن وي. همدا لامل دى چې ولس د جمعيت اصلاح په ټولو ديني او اصلاحي پروګرامونو کې په پوره مينه او خلوص ګډون کوي، ملاتړ يې کوي او فعاليتونه او کړنې يې خپلې ګڼي. د خوشحالۍ او نيکمرغۍ ځاى دى چې د ټول هيواد په کچه په ختيځ زون کې د جمعيت اصلاح فعاليتونه ځليدلي او روښانه دي. دا د الله عزوجل فضل او د خپل ولس د هر اړخيزې همکارۍ برکت دى.

د دې لپاره چې خپل ولس سره زمونږ اړيکې نورې هم غښتلې او پياوړې شي د روان کال د ثور د مياشتې په پنځمه نېټه د يکشنبې ماسپښين په (2) بجو په جلال اباد ښار پنج ستاره هوټل کې د يوشميراحساس لرونکو شخصيوتو، پوهانو او تجارانو لپاره يو غونډه جوړه شوه.

غونډه د قاري صاحب عبدالغفور لخوا د قران کريم د څو مبارکو اياتونو په لوستلو پيل شوه. د جمعيت اصلاح د ننګرهار ولايت مسؤل استاد عبدالرحيم (صراف) پداسې حال کې چې د غونډې وياندويي يې کوله د غونډې په اجنډا رڼا واچوله، ميلمنو ته يې ښه راغلاست ووايه او راغلي حاضرين يې نيکمرغه وبلل چې د ديني چارو لپاره د خپل وخت او مال قربانۍ ته چمتو دي، د جمعيت اصلاح تېر فعاليتونه يې روښانه کړه او راتلونکي پلانونه يې د حاضرينو پر وړاندې کېښودل.

امر باالمعروف او نهى عن المنکر د هرمسلمان دنده:

د جمعيت اصلاح د ختيځ زون مسؤل او د ننګرهار پوهنتون استاد دکتورنجيب الله صالح د خپلې وينا په ترڅ کې وويل: دا د هرمسلمان دنده ده چې په نيکيو لارښوونه او له بديو څخه ممانعت وکړي. او زياته يې کړه جمعيت اصلاح تل هڅه کوي چې په خپله ټولنه کې ديني معيارونه راښکاره کړي او ځوانان ديني اخلاقو او کړنو ته وهڅوي استاد وويل: د جمعيت اصلاح غړي ستاسو په نمايندګۍ او ستاسو په ملاتړ د خپلې ټولنې لپاره ډول ډول ديني پروګرامونه لکه ازاد ديني درسونه، د قرآن کريم د تفسيردورې، د قرآن پوهنې دورې، د سيرت پوهنې دورې، د سيرت سيالۍ، اونيز درسونه، سيمينارونه، ورکشاپونه، د خويندو لپاره درسونه او…… دايروي او همداشان د ديني شعايرو د سپکاوي، او د اسلام د دښمنانو د شومو پلانونو د بربنډولو په اړه خپل ولس راويښوي.

په فرهنګي څانګه کې يې د ژوند مجلې يادونه وکړه چې په ټول هيواد کې لوستونکي لري په تعليمي برخو کې د الفلاح د نجونو د مدرسې، د کامې اسلامي دارالعلوم، د امام ابويوسف دارالعلوم، او د زيدبن ثابت دارالحفاظ نومونه ياد کړه چې پورته ياد شوي فعاليتونه او دې ته ورته نور ټول مونږ ستا سو په همکارۍ او ملاتړ ترسره کړيدي او انشاءالله په راتلونکي کې به هم دوام ورکوو.

مسلمانان يووالي ته اړتيا لري: د جمعيت اصلاح رئيس استاد محمد عاطف غونډي ته وينا واوروله او د ختيځ زون وګړي يې نيکبخته وګڼل چې په ټول هيوادکې په ديني او علمي لحاظ پياوړي او وړاندې دي، د جمعيت اصلاح د ختيځ زون او د ننګرهار د سميزې څانګې هڅې او فعاليتونه يې وستايل چې په ټول هيواد کې د ديني هڅو لپاره بيلګې او نمونې دي د قرآن پوهنې دورې، د سيرت پوهنې دورې، د سيرت سيالۍ، علمي مسابقې، فرهنګي لاسته راوړنې او….. مونږ له دى څخه الهام اخلو. استاد وويل: مونږ ځکه خپل پلانونه ستاسومخې ته ږدو چې دا زمونږ شخصي کار ندى بلکى مشترکه وظيفه مو ده چې لاسونه سره يو کړو او په ګډه يې مخ په وړاندى بوځو.

څوک به قلم خوځولى شي. څوک به کارکولاى شي، څوک به وينا کولاى شي، څوک به پلانونه جوړولاى شي، څوک به مال لګولاى شي او…. زياته يې کړه: هغه هڅې چې داخلي ملاتړ او همکاري ولري د ملت انرژي پکې مصرف شي. مال او وخت يې پکې مصرف شي هغه خپل کار ګڼي او د خرابيدو لورته يې نه پريږدي، مګر د دې برعکس چې څوک په يو کار کې دخيل نه وي هغه بيګانه او پردى ګڼي او چندان مينه ورسره نلري.

استاد وويل: جمعيت اصلاح تل هڅه کوي خپل هيواوال په يو فکر سره راټول کړي ځکه چيرته چې فکرونه مخالف وي هلته يواوالى نشي رامنځته کيدلاى. د جمعيت اصلاح د فرهنګي هڅو څخه يې د بيلابيلو مجلولکه ملى اصلاح اونيزه، قافله، ژوند، اذان….، د اصلاح انلاين ويب پاڼه چې د يونيم ميليون څخه زيات ليدونکي لري، د اصلاح غږ راديو چې په شپه او ورځ کې څوارلس ساعته خپرونې کوي، د څلور سوه زره (400000) ديني کتابونو د چاپ او……… يادونه وکړه.

په تعليمي څانګو کې يې د اصلاح عالې ليسو اودمختلفوديني مدرسويادونه وکړه ويې ويل: زمونږ ځوانان بايد داسې وروزل شي چې فرائض او واجبات ادا کړي او په فضايلو کې بايد له اختلافاتو څخه ځانونه وساتي.

بيا د جمعيت اصلاح د فعاليتونو په اړه يو ويدويې راپور چې د جمعيت اصلاح د نشراتو څانګې لخوا ترتيب شوى ؤ د پروژيکتور له لارې حاضرينو ته وښوودل شو.

سالمې تربېې اوروزنې ته اړتيا:

د الفلاح مدرسې مهتم او د هيواد جيدعالم مولوى صاحب عبدالصبور د انفاق فى سبيل الله موضوع وړاندې کړه ويې ويل: صدقه په الله (ج) باندې حسن قرض دى اوالله (ج) به يې دوه برابره بدله بلکى له هغې څخه زياته ورکوي پدې اړه يې د پيغمبر (ص) مبارک احاديث واورول د صحاپه کرامو په زړه پوري واقعې يې بيان کړې. او زياته يې کړه: بهتره خلک هغه دي چې الله (ج) علم او مال ورکړى وي او د االله (ج) په لاره کې يې مصرف او خرچ کوي، بل هغه خلک چې علم لرى مال نلري خو دا يې ارمان وي چې مال ولري او د الله (ج) په لاره کې يې ولګوي اوهغه خلک چې شتمني لري مګر جاهلان وي او غلط تصرفات پکې کوي دا بد، تباه او برباد خلک دي.

مولوى صاحب وويل: زمونږ په ټولنه کې داسې وګړي هم شته چې په خپلو ودونو او نورو خوښيو کې له کچې زيات لګښتونه کوي آن تردي چې خپل ودونه په دوبۍ کې کوي او د خلکو لپاره له دى ځايه ټيکټونه اخلي او بل لورې ته بې وزله واړه ماشومان او يتيمان په لارو کوڅو او کثافت دانيو کې کاغذونه، هډوکې او ټيمان راټولوي وچه ډوډۍ راټولوي او د خلکو پاتي شوني خواړه خوري، همدا ماشومان چې بې تعلميه رالوى شي بد اخلا قه کېږي، غله اولاره شکوونکې ترې جوړيږي او د همدى شتمنو او مالداره خلکو لپاره مضر تماميږي.

د جمعيت اصلاح ټول غړي او همکاران د همدې هڅو لپاره را پاڅيدلي تر څو خپل بچيان په ديني او ملي روحيه وروزي او خپل شتمن وهڅوي تر څو د هغوى د تدريس لپاره تعاون اوهمکاري وکړي.

مولوى صاحب وويل: مونږ هغه خلک يو چې په کمو او لږو امکاناتو ډېر کار کوو او مونږ له شکمنو او مشکوکو ځايونو او اشخاصو څخه روپۍ او مال نه اخلو.

مونږ ستاسو لپاره د خدمت او مرستې کولو فرصتونه برابر کړيدي ستاسو مالونه د الله (ج) په لاره کې لګول کيږي، ستاسو مالونه نه ضايع کيږي او پايلې به يې انشا‌‌ءالله مثبتي او اغيزناکې وي

بيا يې د امام ابويوسف دارالعلوم پلان چې د جلال آباد ښار لسمې ويالې، توحيد اباد په سيمه کې نوى د جوړيدو په حال کې دى د غونډى ګډونوالوته وړاندې کړو چې د ګډونوالو لخوا نېږدې (700000) اوه لکه کلدارى او (350000) درې لکه او پنځوس زره افغانۍ مرسته وشوه او د دوه کوټو د تعمير د جوړيدلو وعده هم ورکړل شوه

————————————————————————–

د جمعيت اصلاح له ختيځ زون نه خپرېدونكې ژوند مجلې څخه په مننه