دجمعیت اصلاح مرکزي شوراغونډه وکړه

دجمعیت اصلاح و انکشاف اجتماعي افغانستان مرکزي شورا د ۱۳۸۸ ل کال د فعالیتونو ارزونې او د ۱۳۸۹ل کال د پلان د تصویب په اړه د شورا د رئیس محترم استاد نصیراحمد نویدي په ریاست کې په کابل کې غونډه وکړه، غونډه د جمعې په ورځ دحوت په ۲۸مه د سهار په ۸:۳۰ بجو پیل او د یکشنبې په ورځ د حمل په لومړۍ نیټه د ماسپښین په ۱ بجه پای ته ورسیده.
غونډه د محترم قاری محمد بشیرواصل لخوا د قرآن عظیم الشان په تلاوت سره پیل شوه، ورپسې د غونډې ویاند استاد محمد یونس ابراهیمي چې د جمعیت اصلاح د تربیت او مهارتونو د ودې څانګې مسئول هم دی د شورا غړو ته ښه راغلاست ووایه او د پروګرام دنظم او اجندا په اړه یې خبرې وکړې او اجندا یې د شورا نه منظوره کړه ، بیا د سکرتریت غړي عبدالواحد جهید د شورا دبحث  طرزالعمل ولوسته ورپسې الحاج صهیب روفي د مرکزي شورا د تیرې غونډې فیصلې واورولې او د هغو له عملي کولو نه یې د شورا غړو ته ډاډ  ورکړ.
وروسته د مرکزي شورا رئیس استاد نصیراحمد نویدي پیلیزه وینا واوروله او ویې ویل: د الله (ج) شکر او احسان دی چې نوی کال مو د روغتیا او سوکالۍ په فضا کې پیل کوو، په تیر کال کې مو که څه هم  ستونزې او مشکلات لرل په ځانګړې توګه د دعوت او اخلاقو نمونه  استاد فرید الله احمدزي شهادت، خو بیا هم د ښوپایلو نه ډک کال وو، زمونږ وروڼو او خویندو دهیواد په ګوټ ګوټ کې او ان بهر کې هم په خپل دعوت باندې د ژور باوراو په الهي توفیق درلودلو سره په خپل اصلاحي مورچل کې بې شمیره ښه او نیک کارونه کړي دي او زه یقین لرم چې دغه لست او فهرست به په راتلونکي کې لاپسې اوږد شي.
استاد زیاته کړه: دا دالله احسان دی چې د تیارو او فتنو په عصر کې یې مونږ ته د دین نه درست او سم فهم او برداشت را په برخه کړی او دا توفیق یې راکړی چې په خپله هم سم ژوند وکړو او نور هم سم ژوند ته راوبولو، زمونږ عملي نصب العین د الله(ج) د دین اقامه او غلبه ده  او حقیقي موخه مو د الله(ج) رضا او خوښي ترلاسه کول دي.
استاد وویل: مونږ په خبل هیواد کې عدل او انصاف غواړو په داسې حال کې چې نن سبا ورباندې زور او ټوپک واکمن دی، مونږ اتحاد او یووالی غواړو پداسې حال کې چې د ژبې ، قوم ،سمت او مذهب پر اساس د ملت د ویشلو هڅې روانې دي ، مونږ د افراط او تفریط سره مخالف او داعتدال او منځلارۍ پلوي یو، مونږ په داسې حال کې چې هیواد مو د بې سوادۍ تیارو کې ډوب دی او په فرهنګ مو د فرهنګ ته د خدمت ترعنوان لاندې بریدونه کیږي، دعلم او ارزښتونو خپرولو ته ملاتړلې ده، مونږ د هرډول فساد، رشوت او اختلاس سره مبارزه کوو او د ښو اخلاقو او ارزښتونو پیاوړي کول غواړو.
بیا د جمعیت اصلاح رئیس استاد محمد عاطف په ۱۳۸۸ لمریز هجري کال کې د جمعیت اصلاح د فعالیتونو او کړنو راپور وړاندې کړ چې د شورا د تایید او هرکلي سره مخ شو، په راپور کې د قرآن پوهنې د سترو دورو سربیره ، د معارف اسلامي کورسونو، سیرت مسابقو، سیرت دورو او په کابل او هرات کې د اخلاقي فساد پرضد او اخلاقي ارزښتونو د تقویې کمپاینونو خصوصي یادونه وشوه.
استاد عبد الوهاب عابد په کابل ښار او شاوخوا ولسوالیو کې د اخلاقي ارزښتونو د تقویې کمپاین په اړه شورا ته معلومات ورکړل.
وربسې استاد محمدیونس ابراهیمي  په ۱۳۸۹ ل کال کې د جمعیت اصلاح د فعالیتونو پلان وړاندې کړ چې د یولړ تعدیلاتو او بدلونونو نه وروسته د شورا لخوا تایید او تصویب شو.
شورا د اسرائیلي غاصب رژیم لخوا  د مسلمانانو ددریم جومات او لومړنۍ قبلې اقصی جومات په اړه د تخریبي هڅو او د (خراب کلیسا) د جوړولو غندنه وکړه او پدې اړه یې یو پریکړه لیک هم صادر کړ.
د غونډې په ترڅ کې د ښاغلي مولوي عبدالصبور لخوا درس قرآن او ښاغلي دکتور رفیع الله عطاء لخوا درس حدیث وړاندې شو.
دغه راز شورا د کندهار جمعیت اصلاح مسئول او کندهار پوهنتون شرعیاتو رئیس شهید استاد فرید الله احمدزي او د ختیځ زون جمعیت اصلاح مشر او ننګرهار پوهنتون شرعیاتو پوهنځي استاد دوکتور نجیب الله صالح د ښاغلو والدینو د وفات په اړه د مرحومینو روح ته دوعا وکړه.
دغونډې په پای کې د مرکزي شورا رئیس استاد نصیراحمد نویدي اختتامي وینا وکړه، د شورا غړي یې خپلو مسئولیتونو ته متوجه کړل او د راتلونکي په اړه یې لازم هدایات او لارښوونې وکړې.
غونډه د مولوي عبد الصبور لخوا ددوعا په لوستلو سره پای ته ورسیده