په چهاردهي كې دقرآن پوهنې كاميابه دوره!

دقرآن پوهنې ددورو په لړ كې داځل دجلال آباد ښار ختيځ خواته  تورخم ته په غځيدلې لاره پرته دبټي كوټ ولسوالۍ چهاردهي كلي كې دقرآن پوهنې دوره اعلان شوې وه ، دجمعيت اصلاح ننګرهارڅانګې او په ځانګړې توګه دچهاردهي سيمې ميشتوغړيو دورې ته دكمپاين په ترڅ كې په سلګونو پوسټر او زرګونه بلن پاڼې ويشلې وې او ترڅنګ يې د شااوخوا كليو او سيمو په جوماتونوكې اعلانونه هم كړي ووخو هغه پراخ ګډون او برخه اخيستنه چې په دغه دوره كې يې شتون درلود دټولو لپاره حيرانوونكې وه، په وروستۍ ورځ دنورو په پرتله شميره ډيره لوړه وه دچاردهي كلي  پراخه او ستر ميدان  دسړيو نه ډك وو په داسې حال كې چې ورسره ترڅنګ دروغتون ستره اوپراخه ساحه د خويندو لپاره تنګه شوه نو كليوالو ورته دڅنګ كورونه هم خالي كړل .
 دوره د يكشنبې په ورځ د حمل په 30 مه نيټه پيل شوه چې دجمعې ورځ دثور تر 4مې نيټې يې دوام وكړ ، دهرې ورځې درس به جلا عنوان درلود چې دقرآن كريم په تلاوت او دپيغمبر صلى الله عليه وسلم دمباركو احاديثو په درس به پيل كيده، مولوي ميرعباس ګوهري به دحديثو درس پرمخ بيوه .
شيخ القرآن مولانا عبدالصبور دنورو دورو په څير په بيلابيلو موضوعاتو لكه انسان ته دقرآن پيغام، دښځو حقوق،دبندګانو حقوق، حلال رزق او توحيد باندې د ولولو نه ډك درسونه وركړل چې دګډونوالو ضمير او احساس يې ويښاوه او دعمل جذبه يې وربښله.
نوموړي په خپل درس كې په دې ټينګار وكړ چې داسلام مبارك دين دبل هر قانون ، ايديالوژۍ اونظام په پرتله ښځو ته لوړ او مناسب حقونه وركړي دي،لكه دميراث حق،دملكيت اوشتمنۍ لرلو حق ،دزده كړې او تعليم حق او له سړيو نه جلا او داسلام داساساتو سره سم ماحول كې دكارحق.
نوموړي زياته كړه:له اسلام نه وړاندې ښځې ارزښت او حيثيت نه درلود،دانسان په څير چلند او تعامل به نه ورسره كيده اوان لوڼې به ژوندۍ ترخاورولاندې كيدلې، خو چې اسلام راغى نو دانسانانو په ذهنونو كې  يې دښځو ارزښت لوړ كړ ترهغه وروسته مسلمانانو كله هم نه ښځې وژلې او نه يې ترخاورو لاندې كړې دي.
دتوحيد په درس كې مولوي صاحب په  ډاګه وويل چې څوك دالله نه پرته دبل چا واكمني او حاكميت مني ،په حقيقت كې دالله نه باغيان دي او هغه شريعت ته يې شاكړې ده .
نوموړي زياته كړه :دافغانستان مجاهد او غيرتي ولس په اسلام او قرآان مين ولس دى او دالله دشريعت نه پرته بل هيڅ نظام او واكمني نه ومني.
دوكتور صفت الله قانت دجمعيت اصلاح مركزي شورا غړي دورې ته دوينا پرمهال دبټي كوټ ولسوالۍ دخلكو نه مننه وكړه چې دالله جل جلاله دپيغام اوريدو ته په دومره مينه او ليوالتيا راغلي دي او ددومره سترې ديني غوندې جوړيدل يې ددغې سيمې نيكمرغي وبلله .
دوكتورقانت زياته كړه :نن زمونږ په هيواد كې سيكولر او لادينه قوتونه هڅې كوي څوهراړخيز فساد خپور كړي خو دالله په فضل دخير او اصلاح قوتونه شته چې د قرآني پيغام په خپرولو سره به دهغو مقابله كوي، خو دغه  مبارزه له مونږ نه غوښتنه لري څو دالله جل جلاله په پيغام ځان پوه كړو ، جاهليت وپيژنواو بيا يې په علمي او معقوله  توګه مقابله وكړو.
نوموړي دجمعيت اصلاح په اړه وويل : دايوه تربيتي او اصلاحي برنامه ده چې فرد ،كورنۍ او ټولنه جوړوي او دالله دكتاب او نبوي سنتو حاكميت ته زمينه برابروي نو دا دولس دنده ده چې ملاتړيې وكړي .
دورې ته دجمعيت اصلاح ننګرهار مسئول مولوي ميرعباس ګوهري هم  وينا وكړه  او دګډونوالو نه مننه وكړه چې دجمعيت اصلاح بلنه يې ومنله او په دومره بې سارې توګه يې په دې ستره او تاريخي  دوره كې ونډه واخيسته.
دغونډې وروستى ويناوال  دچاردهي سيمې اوسيدونكى مولوي صفى الله وو چې دسيمې دوګړو په استازيتوب يې دجمعيت اصلاح له ادارې او دقرآن پوهنې ددورو نوښتګرمولوي عبدالصبور نه  مننه وكړه چې دچاردهي سيمې ولس ته يې دقرآن پيغام واوراوه اوداوياړ يې وروباښه چې شپږ ورځې دقرآن كريم په مجلس كې حاضر شي او خپلې غيږې د اجرونواوثوابونو نه ډكې كړې.
ددورې په پاى كې محترم مولوي عبدالصبور له خشوع اوخضوع نه ډكه دوعا وكړه .

---