جلال اباد ته د ځوانانو علمي او تربيتي سفر ترسره شو

 راپور: عبدالرزاق حبيبي

د ١٣٨٧ لمريز هجري کال د لړم د مياشتې په ١٣ د پنجشنبې په ورځ د افغانستان د ټولنيزې اصلاح او پرمختګ ټولنې ( جمعيت اصلاح و انکشاف اجتماعى افغانستان ) د کابل ولايت د خوشحال د ساحوي دفتر د غړيو لخوا د جلال اباد علمي او سياحتي دوره وکړه .
د رحلې ګډونکوونکي د خوشحال خان مېنې څخه د ماسپښين په دوه نيمو بجو په دوو کاسټر موټرو کې روان شول او په پلچرخي کې يې د موټرو له بدلولو وروسته د جلال اباد په لور حرکت وکړ .
په دواړو موټرو کې د رحلې ګډوونکي په دوه دوه ګروپونو ووېشل شول  او بيا علمي مسابقې  په يوموټر کې د ښاغلي عبدالله حميدي لخوا د ګروپونو څخه د سوالونو په کولو او په بل موټر کې د  ښاغلي ذبېح الله احساس لخوا ترسره شول.
په پايله کې د مسابقې د لارښودانو لخوا د مسابقې ګټونکي اعلان او په جلال اباد کې ورته د انعامونو ورکولو اعلان وشو.
له مسابقو څخه وروسته د ذهنونو د پرمختيا په موخه شعر جنګي  په دې ډول پيل شوه ، چې يو ګروپ به شعر وويلې او بل ګروپ به خپل شعر د ذکر شوي شعر په اخري حرف پيلولو.
د مازيګر او ماښام مونځونه په په لاره کې ادا کړى شول .
د رحلې ګډونوال تقريباً اووه نيمي بجې د جلال اباد ساحوي دفتر ته ورسېدل او د ساحوي دفتر د غړيو او مسئولينو لخوا راغليو مېلمنو ته تود هرکلى وويل شو. له هر کلي وروسته د جمعيت اصلاح د ختيځ زون مشر او د ساحوي دفتر رئيس  او د ننګرهار ولايت د شرعياتو د پوهنځي د استاذ دوکتور نجيب الله صالح لخوا راغليو مېلمنو ته ښه راغلاست  وويل  شو . نوموړي په خپله وينا کې زياته کړه ،چې زمونږ او ستاسو ګډ هدف د اسلام خدمت او د هغه د رسول صلى الله عليه وسلم د لارې خپراوى دى ؛ په دې لاره کې صحابه و ډېر تکليفونه ګاللي دي او مونږ او تاسو ته د هغوى د دې تکليفونو په پايله کې دا دى د اسلام مبارک دين را رسېدلى دى ، نوموړي زياته کړه ، چې زمونږ د جلال اباد په ساحوي دفتر کې کېدى شي ، چې تاسو له ستونزو سره مخ شئ ، کېدى شي خوراک ناقص وي او يا ستاسو په طبعه نه وي او يا کېدى شي ، چې د شپې لخوا د اغوستن او فرش په مسئله کې له ستونزو سره مخ شئ . زمونږ او ستاسو د داسې رحلو او علمي چکرو څخه ګډ هدف همدا دى ، چې په دې لاره کې پېښېدونکي هر ډول قربانۍ او زغم ته غاړه کېږدو او هر ډول ستونزې او مشکلات په ورين تندي وزغمو.
د نوموړي د لنډې وينا څخه وروسته ډوډۍ وخوړل شوه او بيا د لمونځ لپاره تيارى ونيول شو او د ښاغلي مولوي صاحب عبدالصبور په امامت کې د ماسخوتن لمونځ په جمعه ادا کړى شو.
له لمانځه وروسته دغونډې په تالار کې ، چې په کې د ننګرهار ، کونړ، لغمان او کابل ملګري راټول شوي و ښاغلي دوکتور نجيب الله صالح  خپله عالمانه وينا پيل کړه اود خپلې وينا په يوه برخه کې يې  زياته يې کړه :
(( د نړۍ مسلمانان او په ځانګړې توګه افغان ولس  په موجوده وخت کې له سترو مشکلاتو سره لاس او ګرېوان دي، افغانستان چې جګړو ، وچکالۍ ، او بې اتفاقۍ ځپلى اوس يې له دې مشکلاتو خلاصول په کار دي ، په اوسني وخت کې افغانان له خپل دين څخه ناخبره او د دين داسې تږي دي لکه يو تږى تن چې په يوه دشته کې د اوبو په لټه کې وي او اوبه پيدا او خپله تنده پرې ماته کړي ، نوموړي زياته کړه ، چې د جمعيت اصلاح غړي ، چې د افغانستان هرې برخې ته تللي ډېر تود هرکلى يې شوى دى  او ښه استقبال شوي دي ، دوکتور صاحب زياته کړه ، چې مونږ نورستان ته لاړو او هلته مو خپل دعوتي کار پيل کړ او د نورستان خلکو زمونږ ډېر تود هرکلى وکړ او ويې ويل ، چې مونږ خو همېشه د همداسې بې طرفه خلکو په لټه کې يو  او مونږ ستاسو سره له مال او اولاد څخه نيولې تر سرونو پورې قربانۍ ورکولو ته چمتو يو، دوکتور صاحب زياته کړه ، چې اوس د هغې ځاى خلک مونږ ته هر وخت احوال راکوي ،(( چې تاسو بيا کله راځئ؟ دلته مو مونږ هماغسې په تنده کې پرېښي يو اوس ولې نه راځئ ؟ )) مونږ  د خپلو زياتو مصروفيتونو اوستونزو له لامله تر اوسه وخت نه دى پيدا کړى ، چې هغوى ته يوځل بيا ورشو او خپل دعوتي پروګرامونه ورسره مطرح کړو.
صالح صاحب زياته کړه ، چې په اوسني وخت کې هرڅوک بايد د يوې داسې ټولنې سره ځان يوځاى کړي ، چې د اسلام او دين خدمت وکړي  نوموړي زياته کړه ، چې زمونږ له ټولو افغانانو څخه خواهش دى ، چې د جمعيت اصلاح په پروګرامونو کې برخه واخلي او دا دين په خپل ځان ، کورنۍ او ټولنه کې حاکم کړي ، که څوک بيا هم د جمعيت اصلاح سره څه مشکل لري او يا په جمعيت اصلاح نيوکې لري نو لومړۍ بايد جمعيت اصلاح ته نوموړي په ګوته کړي تر څو اړوند کسان نوموړې ستونزې له منځه يوسي او يوه سالمه ټولنه رامنځ ته شي او که داسې هم نه او خپل شخصي اغراض په کې نه ويني نو بيا دې خپله يوه داسې ټولنه رامنځ ته کړي ، چې دا ستونزې په کې نه وي .
 د ښاغلي دوکتور نجيب الله صالح له وينا وروسته چاى وڅښل شو او له هغې وروسته مشرانو او سپين ږيرو نه غوښتنه وشوه ، چې په مرکز کې موجودو خونو ته تشريف يوسي او هلته د څملاستو انتظام ونيسي او ځوانانو نه غوښتنه وشوه ، چې په تالار کې څملي.
دغونډې ګډونوال په ٤:٤٥د سهار د لمانځه لپاره راپاڅول شول او د لمانځه د ادا کولو څخه وروسته ښاغلي استاذ عبدالصبور د (الدين النصيحه)) پر حديث اوږده وينا وکړه او ځوانان او ګډونوال يې متوجه کړل ، چې د دين رسول له پېغمبرصلى الله عليه وسلم نه وروسته زمونږ وظيفه ده او اوس دا د نبوت دنده هر مسلمان ته سپارل شوې ده  او هر مسلمان مسئول دى ، چې دا ستر نعمت ټولې نړۍ ته ورسوي.

د ښاغلي مولوي عبدالصبور له وينا وروسته د سهار سپورت ترسره شو ، چې په کې د غونډې ټولو ګډونوالو برخه واخسته 
له سپورت نه وروسته  چاى وڅښل شو او بيا درحلې ګډونوال په خپلو اړوندو موټرو کې د بهسودو د پل څخه ليدنه وکړه بيا شيرزي لوبغالي ته لاړل او هلته يې د منډۍ مسابقه وکړه او بيا له هغې ځاى څخه د امير شهيد باغ ته لاړل او د امير شهيد په باغ کې يې د امير حبيب الله خان او په سيمه کې موجودو له نورو قبرونو څخه ليدنه وکړه .
د امير شهيد باغ له ليدو وروسته بيا د هډې فارمونو ته لاړل او  هلته په چمنونو کې له کېناستو وروسته ګډونوال په دوه ګروپونو ووېشل شول او ذهني مسابقه تر سره شوه د ذهني مسابقې له پيل وروسته سپورتي مسابقې پيل شوې ، چې په کې د واليبال او فوټبال مسابقې ترسره شوې د مسابقو له پاى ته رسېدو وروسته د ټولو مسابقو په ګټونکيو انعامونه ووېشل شول .
د ډوډۍ له خوړلو وروسته ګډونوال د هډې کلي جامع جومات ته لاړل او هلته د جُمعې لمونځ له ادا کولو وروسته يو شمېر کسانو د هډې د اخونزاده يعنې مرحوم نجم الدين اخونزاده له قبر څخه ليدنه او نوموړي ته د مغفرت دعا وکړه  ، وروسته له هغې په خپلو موټرو کې د کابل پر لوري حرکت پيل او په درونټه کې له لږ ساعت تم کېدو وروسته د کابل سفر پيل شو. د مازيګر او ماښام لمونځونه په لاره کې په جمعه ادا کړى شول او دا رحله د کابل د پښتونستان په واټ پاى ته ورسېده او ګډونوال په هغې ځاى کې له موټرو څخه تر ښکته کېدو او مخه ښې وورسته د خپلو کورونو په لوريو لاړل .